चालू घडामोडी आणि दिनविशेष - 27 जून 2023

• रा. ना. गोडबोले ट्रस्ट तर्फे प्रदान केलेला सातारा भूषण पुरस्कार हा माझ्या आयुष्यातील सर्वोच्च बहुमान असल्याचे उदगार प्राज इंडस्ट्रीजचे सर्वेसर्वा व जगभरात इथेनॉल मॅन म्हणून प्रसिध्द असलेले डॉ. प्रमोद चौधरी यांनी काढले.रा. ना. गोडबोले (सार्वजनिक) ट्रस्‍ट व सातारकर नागरिकांच्या वतीने प्रतिवर्षी आपल्‍या उत्तुंग कर्तुत्‍वाने सातारा जिल्‍ह्याचे नांव उज्‍ज्‍वल करणार्‍या व्‍यक्‍तीला सातारा भूषण पुरस्‍काराने गौरवले जाते. २०२२ सालचा हा पुरस्‍कार प्रसिध्‍द प्राज इंडस्‍ट्रीजचे डॉ. प्रमोद चौधरी यांना प्रदान करण्‍यात आला. यावेळी डॉ. चौधरी बोलत होते. पुरस्कार विधान परिषदेचे माजी सभापती आमदार रामराजे निंबाळकर यांचे शुभहस्ते व आ. शिवेंद्रसिंहराजे भोसले यांचे अध्यक्षतेखाली, ट्रस्टचे विश्वस्त अरूण गोडबोले, डॉ. अच्युत गोडबोले, अशोक गोडबोले यांच्या उपस्थीतीत संपन्न झाला. रु. ३०,०००/- व सन्‍मानचिन्‍ह असे पुरस्काराचे स्वरूप आहे.
• यावेळी बोलताना डॉ. प्रमोद चौधरी म्हणाले की, हा सन्मान माझा नसून आज पर्यंतच्या माझ्या वाटचालीत मला सहकार्य करणाऱ्या सर्व स्टाफचा आहे. बायोफ्युएल निर्मिती बरोबरच येत्या काळात कचऱ्यापासून इंधन निर्मिती, फॉसिल्स इंधन निर्मिती व संपुर्ण जगाला प्लॅस्टीक कचऱ्यापासून सुटका करणाऱ्या बायो प्लॅस्टीक निर्मितीचा संकल्प केला असून सातारा भूषण सारख्या पुरस्कारांनी मला काम करण्याचे अधिक बळ मला मिळेल.आजपर्यंत अनेक मान सन्मान पुरस्कार मला मिळाले आहेत. पण आपल्याच मातीत आपल्या माणसांनी केलेला सन्मान हा सर्वात मोठा असल्याचे त्यांनी सांगितले.यावेळी डॉ. प्रमोद चौधरी यांनी पुरस्काराच्या रक्कमेत स्वतःची रक्कम वाढ करून सदरची रक्कम ही पर्यावरणासाठी कार्य करणाऱ्या संस्थेला मदत म्हणून देत असल्याचे जाहिर केले.
• यावेळी बोलताना रामराजे निंबाळकर म्हणाले की, जगात अनेक उद्योजक पैसा मिळवण्याच्या उद्देशाने काम करीत असतात पण डॉ. प्रमोद चौधरी हे एक उत्कृष्ठ उद्योजक असून उत्कृष्ठ शास्त्रज्ञ व उत्कृष्ठ नागरिक आहेत. व्यवसायात काम करताना आपले काम समाजाला उपयोगी कसे होईल याचे उत्कृष्ठ उदाहरण म्हणजे डॉ. चौधरी आहेत. संपुर्ण जगाला बायोफ्युएल च्या माध्यमातून उपकारक ठरणाऱ्या पर्यावरण रक्षक व संवर्धन करणार्‍या डॉ. चौधरी यांचे कार्य असेच बहरत राहो अशा शुभेच्छा दिल्या. समारंभाच्या अध्यक्षस्थानावरून बोलताना शिवेंद्रसिंहराजे भोसले यांनी सांगितले की, डॉ. प्रमोद चौधरी यांच्या शोधामुळे साखर इंडस्ट्री, एव्हीएशन इंडस्ट्री , पर्यावरण व फ्युएल इंडस्ट्रीजला मोलाची मदत होणार असल्याचे मत व्यक्त केले. तसेच गोडबोले ट्रस्टच्या या अभिनव उपक्रमाचे कौतुक केले.

• आषाढी एकादशीनिमित्त विठू नामाचा जयघोष करीत पंढरपूरच्या दिशेने रवाना होणाऱ्या वारकऱ्यांसाठी एसटी महामंडळ पुन्हा एकदा सज्ज झाले आहे. दोन वर्षे करोनाच्या संकटानंतर मागील वर्षापासून पंढरपूर येथे आषाढी एकादशीची वारी नियमित सुरू झाली. यंदा या यात्रेसाठी एसटी महामंडळातर्फे सुमारे ५ हजार विशेष बस चालवण्यात येत आहेत.
• २५ जून ते ०५ जुलै दरम्यान या विशेष गाड्या धावणार असून वाखरी येथील माऊलींच्या रिंगण सोहळ्यासाठी मंगळवारी २०० अतिरिक्त बस उपलब्ध करून देण्यात आल्या आहेत. यात्रेसाठी मुंबईसह पुणे, नाशिक, औरंगाबाद, नागपूर, अमरावती या सहा प्रदेशातून बसचे नियोजन करण्यात आले आहे. यात्रेनिमित्त राज्यातून पंढरपूर येथे जाणाऱ्या वारकरी आणि भक्तांनी या बस सेवेचा लाभ घ्यावा, असे आवाहन एसटी महामंडळाकडून करण्यात आले आहे, अशी माहिती एसटी महामंडळाने दिली आहे. औरंगाबाद प्रदेशातून १,२००, मुंबई ५००, नागपूर १००, पुणे १,२००, नाशिक १ हजार आणि अमरावती येथून ७०० अशाप्रकारे यात्रेसाठी विशेष बसचे नियोजन केले आहे.

चार तात्पुरती बस स्थानके

• पंढरपूर यात्रेसाठी राज्यभरातील लाखो भाविकांसाठी विविध विभागांतून गाड्या सोडण्यात येणार आहेत. वारकरी, भाविक तसेच पर्यटकांची होणारी गर्दी पाहता एकाच स्थानकावर गर्दी होऊ नये, यासाठी यात्रा कालावधीत पंढरपूर येथे चंद्रभागा, भिमा, पांडुरंग (आयटीआय कॉलेज) व विठ्ठल कारखाना यात्रा स्थानक अशी चार तात्पुरती बस स्थानके उभारण्यात येणार आहेत. दरम्यान, यात्रा काळात बस स्थानकावर पिण्याचे पाणी, सुलभ शौचालय, संगणकीय आरक्षण केंद्र, चौकशी कक्ष, मार्गदर्शन फलक अशा विविध सोयी सुविधा पुरविण्यात येणार असून जास्तीत जास्त प्रवाशांनी, एसटीच्या सुरक्षित प्रवासी सेवेचा लाभ घ्यावा, असे आवाहन एसटी महामंडळाकडून करण्यात आले आहे.

• पतीने विकत घेतलेल्या मालमत्तेवर पत्नीचा समान अधिकार असतो असा महत्त्वाचा निर्वाळा मद्रास उच्च न्यायालयाने सोमवारी दिला. पत्नी घरामध्ये अनेक भूमिका निभावत असते आणि पतीच्या आठ तासांच्या नोकरीपेक्षा त्याला कमी लेखता येणार नाही, असे आदेश न्या. कृष्णन रामसामी यांनी अलीकडेच दिला.
• एका खटल्यामध्ये पतीने पत्नीवर विवाहबाह्य संबंधांचा आरोप ठेवून, मालमत्तेवर मालकीहक्काचा दावा केला होता. खटला सुरू असतानाच फिर्यादीचा मृत्यू झाल्यानंतर त्याच्या मुलांनी खटला पुढे सुरू ठेवला होता. या खटल्याचा निकाल देताना न्यायाधीशांनी काही महत्त्वाची निरीक्षणे नोंदवली.  
• गृहिणी पत्नी थेट आर्थिक कमाई करत नसली तरी, तिने मुलांची देखभाल, स्वयंपाक, सफाई आणि घरातील दैनंदिन व्यवस्था अशा कामांच्या माध्यमातून महत्त्वाची भूमिका बजावली. घरामधील तिच्या योगदानाच्या आधारावरच पतीला परदेशात जाऊन पैसे कमावणे शक्य झाले. इतकेच नाही तर कुटुंब आणि मुलांची काळजी घेताना तिने स्वत:च्या स्वप्नांचा त्याग केला आणि त्यांच्यासाठी संपूर्ण आयुष्य खर्ची घातले असेही न्यायालयाने नमूद केले.

• या वर्षी भारतात होणाऱ्या विश्वचषक क्रिकेट स्पर्धेच्या मुख्य फेरी प्रवेशासाठी सध्या सुरु असलेल्या पात्रता फेरीत सोमवारी नेदरलँड्सने ‘सुपर ओव्हर’ मध्ये वेस्ट इंडिजचा पराभव केला.
• संपूर्ण सामन्यात तब्बल ७४८ धावांचा पाऊस पडला. वेस्ट इंडिजने निकोलस पूरनच्या (नाबाद १०४) शतकी खेळीच्या जोरावर ६ बाद ३७४ धावा केल्या. त्याला किंगची (७६) साथ मिळाली. त्यानंतर आव्हानाचा पाठलाग करताना निदामानुरुच्या (१११) फटकेबाजीच्या जोरावर नेदरलॅँड्सने ९ बाद ३७४ धावा केल्या. सामना बरोबरीत सुटल्यामुळे घेण्यात आलेल्या एका षटकाच्या खेळात नेदरलॅँड्सने बाजी मारली. या पराभवाने दोन वेळच्या विजेत्या वेस्ट इंडिजच्या मुख्य स्पर्धेत खेळण्याचा आशा अंधुक झाल्या आहेत. यापूर्वी त्यांना झिम्बाब्वेने देखील पराभूत केले आहे. सुपर ओव्हरच्या एका षटकांत व्हॅन बीकने सहा चेंडूंत (४,६,४,६,६,४) तीस धावा फटकावून काढल्या. हे आव्हान वेस्ट इंडिजला पेलवले नाही. वेस्ट इंडिजने दोन फलंदाज गमावून केवळ ८ धावा केल्या.
•  
• व्हॅन बीकच्या या तुफानापूर्वी ३७५ धावांच्या आव्हानाचा पाठलाग करताना तेजा निदामानुरु आणि कर्णधार स्कॉट एडवर्डसने पाचव्या विकेटसाठी १४३ धावांची भागीदारी करून नेदरलॅँड्सला विजयाच्या आशा दाखवल्या होत्या. या दोघांनी अवघ्या ९० चेंडूंत ही भागीदारी केली. मात्र, त्यानंतर नेदरलॅँड्सने घाईत १४ धावांत ३ गडी गमावले आणि अखेरच्या दोन षटकांत ३० धावा असे समीकरण राहिले. त्या वेळी खेळपट्टीवर असणाऱ्या बीकने ४९व्या षटकातील पहिल्या तीन चेंडूंत १४ धावा घेतल्या. अखेरच्या षटकांत नेदरलॅण्डसला ६ षटकांत ९ धावांची आवश्यकता होती. मात्र, शेवटच्या चेंडूंवर विजयासाठी १ धाव आवश्यक असताना बीक (१४ चेंडूंत २८) बाद झाल्याने सामना बरोबरीत सुटला.
• त्यापूर्वी, प्रथम फलंदाजी करताना ब्रेंडन किंग (८१ चेंडूंत ७६) आणि जॉन्सन चार्ल्स (५५ चेंडूंत ५४) यांच्या १०१ धावांच्या सलामीनंतर निकोलस पूरनच्या फटकेबाजीने वेस्ट इंडिजचे आव्हान उभे राहिले होते. पूरनने ६५ चेंडूंत १०४ धावांची खेळी करताना ९ चौकार आणि ६ षटकारांची आतषबाजी केली.

चालू घडामोडी आणि दिनविशेष - 27 जून 2022

27 जून चे दिनविशेष पाहण्यासाठी (येथे क्लिक करा)