चालू घडामोडी आणि दिनविशेष - 24 नोव्हेंबर 2023

Date : 24 November, 2023 | MahaNMK.com

आपल्या मित्रांना पाठवा :
चीन मास्टर्स बॅडमिंटन स्पर्धा : सात्त्विक-चिराग जोडी, प्रणॉय उपांत्यपूर्व फेरीत
  • भारताचा अनुभवी बॅडमिंटनपटू एचएस प्रणॉय, तसेच सात्त्विकसाईराज रंकीरेड्डी व चिराग शेट्टी या आघाडीच्या जोडीने गुरुवारी चीन मास्टर्स बॅडमिंटन स्पर्धेच्या उपांत्यपूर्व फेरीत धडक मारली.जागतिक अजिंक्यपद स्पर्धेतील कांस्यपदक विजेत्या प्रणॉयने डेन्मार्कच्या मॅग्नस योहानसेनला २१-१२, २१-१८ असे पराभूत केले. पुरुष एकेरीत प्रणॉय हा एकमेव भारतीय खेळाडू आव्हान टिकवून आहे. आठव्या मानांकित प्रणॉयची गाठ आता जपानच्या कोडाइ नाराओकाशी पडणार आहे.
  • योहानसेनविरुद्ध सामन्यात प्रणॉयने चांगली सुरुवात करताना पहिला गेममध्ये ६-१ अशी आघाडी घेतली; परंतु योहानसेनने जोरदार पुनरागमन करताना १४-११ अशी आघाडी घेतली. यानंतर प्रणॉयने खेळ उंचावत सलग गुण मिळवले आणि पहिला गेम २१-१२ अशा फरकाने जिंकला. दुसऱ्या गेममध्ये दोन्ही खेळाडूंनी उत्तम खेळ केला. एक वेळ गेम १८-१८ असा बरोबरीत होता. मात्र, प्रणॉयने काही चांगले फटके मारत सलग तीन गुणांची कमाई केली आणि गेमसह सामना जिंकला.
  • अग्रमानांकित आणि आशियाई क्रीडा स्पर्धेतील सुवर्णपदक विजेत्या सात्त्विक-चिराग जोडीने जपानच्या अकिरा कोगा व ताइची सेइतो जोडीला २१-१५, २१-१६ असे नमवले. भारतीय जोडीचा सामना आता इंडोनेशियाच्या लियो रोली कार्नाडो आणि डॅनियल मार्टिन जोडीशी होणार आहे. सामन्याच्या सुरुवातीपासूनच आक्रमक खेळ करणाऱ्या भारतीय जोडीने प्रतिस्पर्धी जोडीला पुनरागमनाची फारशी संधी दिली नाही.
भारताने ऑस्ट्रेलियाचा दोन गडी राखून उडवला धुव्वा, इशान-सूर्यकुमारने झळकावली अर्धशतकं
  • भारत आणि ऑस्ट्रेलिया यांच्यातील पाच सामन्यांच्या टी-२० मालिकेला गुरुवारी (२३ नोव्हेंबर) सुरुवात झाली. उभय संघांमधील पहिला सामना विशाखापट्टणम येथील डॉ. वाय.एस. राजशेखर रेड्डी क्रिकेट स्टेडियमवर खेळला गेला.
  • भारताचा नवा कर्णधार सूर्यकुमार यादवने नाणेफेक जिंकून गोलंदाजी करण्याचा निर्णय घेतला. ऑस्ट्रेलियाने २० षटकात तीन विकेट गमावत २०८ धावा केल्या.
  • प्रत्युतरात टीम इंडियाने १९.५ षटकांत आठ विकेट गमावत २०९ धावा करत सामना जिंकला. रिंकू सिंगने शेवटच्या चेंडूवर षटकार ठोकला, पण शॉन अॅबॉटचा चेंडू नो-बॉल होता. अशा स्थितीत रिंकूच्या खात्यात या सहा धावा जमा झाले नाहीत. त्याचबरोबर नो-बॉलची एक धाव मिळाल्याने टीम इंडिया विजय ठरली.
सोलापूर शिवसेनेचे पहिले जिल्हाप्रमुख बाबूराव वडणे यांचे निधन
  • सोलापूर जिल्ह्यात शिवसेना शाखेची सर्वप्रथम स्थापना केलेले आणि पक्षाचे पहिले जिल्हा प्रमुख बाबूराव नागनाथ वडणे (वय ८७) यांचे वृध्दापकाळाने गुरूवारी दुपारी निधन झाले. त्यांच्या पार्थिवावर रूपाभवानी हिंदू स्मशानभूमीत अंत्यसंस्कार करण्यात आले.
  • शिवसेनाप्रमुख बाळासाहेब ठाकरे यांनी १९६६ साली शिवसेना स्थापन केल्यानंतर त्यांच्या विचारांनी प्रभावित होऊन बाबूराव वडणे यांनी त्याच सुमारास सोलापुरात शिवसेना शाखा स्थापन करून पक्षाची बांधणी केली होती. पक्षाच्या जिल्हाप्रमुखपदाची जबाबदारी त्यांच्यावरच सोपविण्यात आली होती. १९८२-८३ पर्यंत ते शिवसेना जिल्हाप्रमुख होते. अलिकडे वृध्दापकाळात त्यांनी सार्वजनिक जीवनातून निवृत्ती घेतली होती. पण शिवसेनेचे पहिले जिल्हाप्रमुख त्यांच्या विषयी शिवसैनिकांमध्ये आदर होता.
  • गेली दोन महिने ते आजारपणामुळे बिछान्यावर खिळून होते. त्यांच्या पश्चात पत्नी, दोन मुले, दोन मुली, सुना, नातवंडे परिवार आहे. त्यांच्या निधनाबद्दल उध्दव ठाकरे गटाचे जिल्हाप्रमुख पुरूषोत्तम बरडे, शहरप्रमुख विष्णू कारमपुरी तसेच एकनाथ शिंदे गटाचे शिवसेना जिल्हा संपर्क प्रमुख प्रा. शिवाजी सावंत, जिल्हाप्रमुख अमोल शिंदे आदींनी तीव्र दुःख व्यक्त करून त्यांना श्रध्दांजली अर्पण केली.
राज्यातील शाळांमध्ये आता ‘वाचन चळवळ’, शालेय शिक्षण विभागाची मान्यता
  • राष्ट्रीय संपादणूक सर्वेक्षणात इयत्ता तिसरीच्या ३० टक्केपेक्षा जास्त मुलांना लहान मजकूर, पाचवीपर्यंतच्या ४१ टक्के मुलांना त्यांच्या श्रेणीचा योग्य मजकूर वाचता येत नसल्याचे आढळून आले आहे. मात्र आता हे चित्र बदलण्यासाठी राज्यातील शाळांमध्ये वाचन चळवळ राबवण्याचा निर्णय राज्य शासनाने घेतला आहे.
  • विद्यार्थी भाषा नैसर्गिकरित्या शिकतात. मात्र विद्यार्थ्यांनी वाचन जाणीवपूर्वक शिकले पाहिजे. इयत्ता दुसरीमध्ये मुलांना वाचन येणे अपेक्षित आहे. प्रत्यक्षात विद्यार्थ्यांकडून वाचन होत नसल्याचे राष्ट्रीय संपादणूक सर्वेक्षणातून समोर आले आहे. त्यामुळे २०२६ पर्यंत राज्यातील तिसरीपर्यंतचे प्रत्येक मूल ओघवते वाचन करू शकेल, आठवीपर्यंतचे प्रत्येक मूल शिकण्यासाठी वाचू शकेल हे सुनिश्चित करणारी आनंददायी वाचनाची चळवळ निर्माण करण्याच्या उद्देशाने आता राज्यात वाचन चळवळ राबवली जाणार आहे. या वाचन चळवळीत शालेय शिक्षण विभाग, राज्यसरकार, युनिसेफ, रीड इंडिया आणि प्रथम बुक्स या संस्थांचा सहभाग आहे.
  • मुलांना वाचनाची सवय लावण्यासाठी महाराष्ट्र प्राथमिक शिक्षण परिषदेच्या राज्य प्रकल्प संचालकांकडून मार्गदर्शक सूचना तयार केल्या जातील. राज्यातील शासनमान्य शाळा आणि खासगी शाळांमध्ये हा उपक्रम राबवला जाईल. मात्र खासगी शाळांना पुस्तके दिली जाणार नाहीत. उपक्रमात वर्षभरातील काही तारखा निश्चित करून शाळेत वाचन वर्ग आयोजित केले जातील. त्यात विद्यार्थी पुस्तकांची देवाणघेवाण करतील. त्याशिवाय शालेय स्तरावर शाळेच्या वेळापत्रकातच साप्ताहिक दोन वाचन तासिकांचा समावेश करणे, गोष्टींचा रविवार उपक्रमाअंतर्गत दर शनिवारी ई-पुस्तके उपलब्ध करून देणे, आनंदाचा तासअंतर्गत ‘ड्रॉप एव्हरीथिंग अँड रीड’ या उपक्रमाअंतर्गत शाळेच्या वेळापत्रकात किंवा शाळा सुरू होण्यापूर्वी १५-२० मिनिटे शिक्षक आणि मुलांसाठी कथा पुस्तके वाचण्यासाठी आनंदाचा तास वेळा पत्रकात समाविष्ट केला जाईल.

ब्रँड अ‍ॅम्बेसिडरची नियुक्ती

  • मुलांना वाचनाच्या संधी उपलब्ध करण्यासाठी लोकसहभाग, मुलांना वाचनाचे महत्त्व समजावणे, मराठी भाषेचा नवीन वाचक वर्ग तयार करणे, मुलांवर चांगले संस्कार करणे, कथा, कादंबऱ्या, कविता, नाटकांतून रसास्वादाची दृष्टी निर्माण करण्याचा या चळवळीचा उद्देश आहे. या उपक्रमासाठी ब्रँड अ‍ॅम्बेसिडरची नियुक्ती केली जाणार आहे.
बिल गेट्स यांचं वक्तव्य चर्चेत! “तीन दिवसांचा कामाचा आठवडाही शक्य.. मशीन्स…”
  • माणसांच्या कामांचे तास किती असावेत? यावर मायक्रोसॉफ्टचे बिल गेट्स यांनी एक महत्त्वाचं भाष्य केलं आहे. त्यांनी असं म्हटलं आहे की तीन दिवसांचा आठवडा असला तरीही ठीक आहे. तसंच एआयबद्दलही त्यांनी भाष्य केलं आहे. AI मुळे तुमची नोकरी जाईल असं नाही मात्र यामुळे गोष्टी बदलतील इतकं नक्की असंही बिल गेट्स यांनी म्हटलं आहे.

तीन दिवसांचा आठवडा असायला काय हरकत आहे?

  • बिल गेट्स म्हणाले तीन दिवसांचा आठवडा असेल तरीही काही हरकत नाही. एका पॉडकास्टमध्ये बिल गेट्स यांनी हे भाष्य केलं आहे. नोकऱ्यांमध्ये AI सारखं कृत्रीम तंत्रज्ञान येतं आहे त्याविषयी काय सांगाल? असं विचारलं असता बिल गेट्स म्हणाले एक दिवस असाही येऊ शकतो की खूप मेहनत करावी लागणार नाही. आपल्या जगतात अशी एक वेळ येऊ शकते की आठवड्यातले तीन दिवसच काम केलं तरीही चालणार आहे. काही दिवसांपूर्वीच इन्फोसिसचे नारायण मूर्ती यांनी युवकांनी ७० तास काम केलं पाहिजे असं म्हटलं होतं. त्यानंतर आता बिल गेट्स यांचं हे वक्तव्य चर्चेत आहे.
  • एक असंही जग असू शकतं जिथे मशीन द्वारे जेवण तयार केलं जाईल, जीवनावश्यक वस्तू तयार केला जातील आणि लोकांना आठवड्यात पाच दिवसांऐवजी फक्त तीन दिवस काम करावं लागेल. एआयबाबत बिल गेट्स म्हणाले की याचा प्रभाव नक्कीच मोठा पडणार आहे. मात्र माणसांचं काम AI संपवणार नाही. कामच्या पद्धतींमध्ये बदल किंवा ज्याला फरक म्हणता येतील असे होतील, असंही बिल गेट्स म्हणाले. इंडियन एक्स्प्रेसने हे वृत्त दिलं आहे. लोकांना कमी कालावधीसाठी काम करु देण्यास हरकत नसलेले बिल गेट्स हे एकमेव व्यावसायिक नाहीत. जेपी मॉर्गनचे सीईओ जेमी डिमन यांनीही साडेतीन दिवसांचा आठवडा आणि बाकी सुट्ट्या असतील असं एक वक्तव्य केलं होतं.
  • इन्फोसिसचे संस्थापक नारायण मूर्ती यांनी तरुणांना आठवड्यातून ७० तास काम करण्याचा विचार करायला हवा अशी टिप्पणी केल्यानंतर ऑनलाइन वादाला तोंड फुटले होतं. पॉडकास्टमध्ये, मूर्ती म्हणाले होती की भारताची कार्य उत्पादकता जगात सर्वात कमी आहे आणि देशाचा विकास सुनिश्चित करण्यासाठी, तरुणांनी आठवड्यातून किमान ७० तास काम करणे आवश्यक आहे. नारायण मूर्ती यांच्या विधानावरून वाद सुरु असताना सुधा मूर्ती यांनी नारायण मूर्ती हे स्वतः आठवड्यातून ८० ते ९० तास काम करतात असे म्हणत ट्रोलर्सना उत्तर दिले होते. तर अन्यही काही व्यावसायिकांनी मूर्ती यांच्या विधानाला अनुमोदन दिलं होतं तर काहींनी त्यांना विरोध दर्शवला होता. बिल गेट्स यांच्या वक्तव्यामुळे नारायण मूर्ती यांच्या त्या वक्तव्याची आठवण झाली आहे.

 

अबब! मच्छीमाराला सापडला ३१ किलोचा Gold Fish, २० वर्षांपूर्वी सोडला पाण्यात, त्यानंतर काय घडलं :
  • जगातील सर्वात मोठ्या गोल्ड फिशपैकी एक समजला जाणारा ३१ किलोचा मासा एका मच्छीमाराला मासेमारी करताना पाण्यात सापडला. ब्रिटनमध्ये राहणाऱ्या एका मच्छीमाराने हा गोल्ड फिश शर्थीचे प्रयत्न करुन पाण्यात शोधला. जवळपास २० वर्षांपूर्वी हा गोल्ड फिश पाण्यात सोडण्यात आला होता. गोल्ड फिश समुद्रात किंवा तलावाच्या पाण्यात क्वचितच आढळतो. त्यामुळे याला जादुई गोल्ड फिश असं म्हटलं जातं.

  • एका मच्छीमाराने नारंगी रंगाचा गोल्ड फिश पकडला. २० वर्षांपूर्वी या माशाला पाण्यात सोडण्यात आले होते. त्यानंतर हा मासा पाण्यात क्वचितच दिसायचा. एका फिशरी मॅनेजरने सांगितलं की, या गोल्ड फिशचं आरोग्य आजही ठणठणीत आहे. हा मासा जगातील सर्वात मोठ्या गोल्ड फिशपैकी एक आहे, असा दावा केला जात आहे.

  • या माशाला पकडण्यासाठी एंडी हैकेटने जवळपास २५ मिनिटं पाण्यात शोध घेतला. कॅरट नावाच्या या गोल्ड फिशला पकडल्यानंतर पुन्हा त्याला पाण्यात सोडण्यात आलं. हायब्रिड प्रजातीचा हा मासा खूप आकर्षक आहे. डेली मेल ने दिलेल्या माहितीनुसार, कॅरटला २० वर्षांपूर्वी जेसन काउलरने पाण्यात सोडलं होतं. फिशरी मॅनेजर जेसनने म्हटलं की, या माशाचं आरोग्य आजही उत्तम आहे. एंडीने गोल्ड फिश पकडल्यामुळं आम्ही त्याला शुभेच्छा देत आहोत. हा मासा सर्वात वेगळा आहे.

  • हा गोल्ड फिश पाण्यात क्वचितच लोकांना दिसतो. एंडी हॅकेटनं ३१ किलोचा गोल्ड फिश पकडण्यासाठी शर्थीचे प्रयत्न केले. २०१९ मध्ये जेसन फुगेटनं अमेरिकेच्या मिनोस्टामध्ये असाच एक मासा पकडला होता. पण त्यांचं वजन १८ किलो होतं. एंडीने म्हटलं की, मला या गोल्ड फिशबाबत माहिती होती की, हा मासा फ्रांसमध्ये ब्लूवॉटर लेक्समध्ये उपलब्ध आहे. पण मी या गोल्ड फिशला पकडेल, असं मला कधी वाटलं नव्हतं. दरम्यान, एंडीने हा मासा पकडल्यानंतर त्याच्यासोबत फोटोही काढले आणि त्यानंतर त्याने या माशाला सुरक्षितपणे पाण्यात सोडलं.

टिपू सुलतानवरील पुस्तकाच्या विक्री, वितरणाला स्थगिती :
  • टिपू सुलतानावरील एका पुस्तकाच्या वितरण आणि विक्रीला बंगळूरुतील न्यायालयाने अंतरिम स्थगिती दिली आहे. या पुस्तकात म्हैसूरचा राजा असलेल्या टिपू सुलतानाबद्दल चुकीची माहिती छापली असल्याचा आरोप करण्यात आल्यानंतर न्यायालयाने हा निर्णय घेतला. अतिरिक्त शहर दिवाणी आणि सत्र न्यायालयात मंगळवारी याबाबत सुनावणी झाली. ‘टिपू निजा कनसुगालू’ (टिपूचे खरे स्वप्न) या पुस्तकाचे लेखक, प्रकाशक असलेल्या अयोध्या पब्लिकेशन आणि मुद्रक असलेल्या राष्ट्रोत्थान मुद्रणालय यांना हे पुस्तक विकण्यास आणि त्याचे वितरण करण्यासा ३ डिसेंबरपर्यंत तात्पुरता मनाई आदेश जारी केला आहे.

  • कन्नड भाषेतील हे पुस्तक ऑनलाइन प्लॅटफॉर्मवरही विक्री करण्यास मनाई करण्यात आल्याचे न्यायालयाच्या आदेशात म्हटल आहे. या पुस्तकाची छपाई करण्यास आणि छापलेली पुस्तके संग्रहित करण्यास मात्र कोणतही मनाई करण्यात आलेली नाही.

  • जिल्हा वक्फ बोर्ड समितीचे माजी अध्यक्ष बी. एस. रफिउल्ला यांनी या पुस्तकाविरोधात न्यायालयात धाव घेतली होती. हे पुस्तक टिपूबद्दल चुकीची माहिती देत असून या पुस्तकाला कोणताही ऐतिहासिक आधार व पुरावा नसल्याचा दावा रफिउल्ला यांनी केला. या पुस्तकात वापरलेला ‘तुरुकारू’ हा शब्द मुस्लीम समाजाचा अवमान करणारा आहे.

  • या पुस्तकाच्या प्रकाशनामुळे अशांतता आणि जातीय तेढ निर्माण होईल, तसेच सार्वजनिक शांततेचा मोठय़ा प्रमाणात भंग होऊ शकतो, असा दावा त्यांनी केला. त्यानंतर न्यायालयाने तिन्ही प्रतिवादींना तातडीच्या नोटीस बजावल्या आणि प्रकरणाची सुनावणी ३ डिसेंबरपर्यंत पुढे ढकलली.

ट्विटर संपणार म्हणणाऱ्यांना एलॉन मस्क यांचा उलट सवाल; म्हणाले, “ट्विटरने आत्तापर्यंत…” :
  • ट्विटरमधील नोकरकपात त्यानंतर कंपनीच्या कार्यपद्धतीला कंटाळून सुरू झालेले राजीनामासत्र पाहता ट्विटरच्या भवितव्याबाबत काही युजर्संकडून प्रश्न उपस्थित केले जात आहे. एलॉन मस्क यांनी कंपनीचा ताबा घेतल्यानंतर झालेल्या घडामोडींमुळे ही मायक्रो ब्लॉगिंग साईट टिकणार नाही, असा कयास काही युजर्सकडून बांधला जात आहे. या टीकाकारांना एलॉन मस्क यांनी प्रत्युत्तर दिलं आहे. “ट्विटरने आत्तापर्यंत संपायला नको होतं का?” असा उलट सवाल करत अनेक उलथापालथीनंतरही कंपनी टिकून असल्याचं अप्रत्यक्षरित्या मस्क यांनी ठासून सांगितलं आहे.

  • ‘स्पेसएक्स’ आणि ‘टेस्ला’चे प्रमुख एलॉन मस्क यांनी हात जोडून टीकाकारांना दुसऱ्या प्लॅटफॉर्म्सचा वापर करण्यास सांगितल्यानंतर त्यांनी आज पुन्हा टीकाकारांना लक्ष्य केलं आहे. हात जोडलेला इमोजी वापरून हिंदीत ‘नमस्ते’ असं ट्वीट मस्क यांनी केलं होतं. ट्विटर खरेदी करताच मस्क यांनी एकूण कर्मचाऱ्यांपैकी जवळपास ५० टक्के कर्मचाऱ्यांना घरचा रस्ता दाखवला आहे. “कार्यक्षम पद्धतीने जास्त तास काम करण्याची तयारी ठेवा अथवा कंपनी सोडून जा”, असा इशारा ईमेलद्वारे एलॉन मस्क यांनी देताच कंपनीत राजीनामासत्र सुरू झाले आहे.

  • बऱ्याच देशांमध्ये #RIPTwitter हा हॅशटॅग ट्रेंड होत आहे. मोठ्या संख्येने कर्मचारी कामावरुन काढून टाकण्यात आल्यानंतर हा सोशल मीडिया प्लॅटफार्म वापरण्यासाठी सुरक्षित आहे का? असा सवाल नेटकऱ्यांकडून उपस्थित केला जात आहे. ट्विटरचे माजी मुख्य माहिती सुरक्षा अधिकारी लीया किस्नर, मुख्य गोपनीयता अधिकारी डेमियन किरन यांच्यासह अनेक वरिष्ठ अधिकारी आधीच कंपनी सोडून गेले आहेत.

मँचेस्टर युनायटेडपासून रोनाल्डो विभक्त :
  • विश्वचषक स्पर्धेच्या तिसऱ्या दिवशीच अर्जेटिनाच्या पराभवाचा धक्का फुटबॉल चाहत्यांना बसला. त्या धक्क्यातून सावरत नाही तो मॅंचेस्टर युनायटेडने रोनाल्डोला तातडीने मुक्त केल्याची घोषणा केली. रोनाल्डो आणि फुटबॉल चाहत्यांना हा धक्काच होता. रोनाल्डोचा व्यवस्थापक जॉर्ज मेंडेस अनेक क्लबबरोबर चर्चा करत आहे. मात्र, ३७ वर्षीय रोनाल्डो कुठल्या क्लबकडून खेळणार हे अजून स्पष्ट होत नाही. रोनाल्डो कोणाकडून खेळणार याचे उत्तर आता विश्वचषक फुटबॉल स्पर्धा संपेपर्यंत तरी मिळणार नाही. युरोपियन लीग असो वा अगदी सौदी अरेबियातील एक क्लब त्याच्यासाठी उत्सुक असले तरी विश्वचषक स्पर्धा संपेपर्यंत यावर कुणी निर्णय घेईल असे वाटत नाही.

  • रोनाल्डो मॅंचेस्टर युनायटेड सोडणार याचे संकेत गेले काही दिवस मिळतच होते. रोनाल्डोने एका मुलाखतीत क्लबने आपला विश्वासघात केल्याचे आणि क्लबचे काही भागीदार आपल्याला संघाबाहेर ठेवू इच्छित असल्याचे सांगितले होते. मॅंचेस्टरचे नवे व्यवस्थापक एरिक टेन हैग यांच्याशी देखील रोनाल्डोचे सूर जुळत नव्हते. या सगळय़ाची परिणीती रोनाल्डोला मुक्त करण्यात झाली. मॅंचेस्टरकडून खेळण्याची रोनाल्डोची ही दुसरी वेळ होती. रोनाल्डोने मॅंचेस्टरसाठी ३४६ सामने खेळताना १४५ गोल केले आहेत.

  • मँचेस्टर युनायटेडसोबत परस्पर सामंजस्याने मी  क्लब सोडण्यास तयार झालो आहे. क्लब आणि चाहत्यांचा मी नेहमीच आभारी राहीन. त्यांच्याविषयी असलेले माझे प्रेम कधीच कमी होणार नाही. पण नव्या आव्हानांचा शोध घेण्याची हीच योग्य वेळ असल्याचे वाटल्याने हा निर्णय घेतला.

24 नोव्हेंबर चे दिनविशेष पाहण्यासाठी (येथे क्लिक करा)

Whatsapp Group

© Maha NMK™ | Copyright 2015 - 2023 All Rights Reserved.

Made with ❤ in India.