चालू घडामोडी आणि दिनविशेष - 24 फेब्रुवारी 2024

• लातूर ते टेंभुर्णी या महामार्गाची दुरावस्था पाहून आपल्यालाही शरम वाटते. यापूर्वीच या रस्त्याचे काम पूर्ण होणे गरजेचे होते. मात्र आता लवकरच हा रस्ता चारपदरी महामार्गात रूपांतरित केला जाणार असल्याची घोषणा केंद्रीयमंत्री नितीन गडकरी यांनी केली. धाराशिव जिल्ह्यातील महामार्गाच्या प्रलंबित कामांसाठी २२० कोटी रूपये अधिकचा निधी मंजूर केला आहे. त्यापैकी १७४ कोटी रूपयांच्या विकासकामांचे आज भूमिपूजन होत असल्याची माहिती केंद्रीयमंत्री नितीन गडकरी यांनी दिली.
• धाराशिव शहरातील सिध्दाई मंगल कार्यालय येथे केंद्रीय मंत्री गडकरी यांच्या हस्ते ऑनलाईन पध्दतीने १७४ कोटी रूपयांच्या विकासकामांचे भूमिपूजन करण्यात आले. यावेळी आमदार राणाजगजितसिंह पाटील, सेवानिवृत्त सनदी अधिकारी तथा मित्राचे मुख्य कार्यकारी अधिकारी प्रविणसिंह परदेशी, जिल्हाधिकारी डॉ. सचिन ओम्बासे, जिल्हा पोलीस अधीक्षक अतुल कुलकर्णी, भाजपाचे जिल्हाध्यक्ष संताजी चालुक्य, माजी जिल्हाध्यक्ष नितीन काळे यांच्यासह पदाधिकारी, कार्यकर्ते उपस्थित होते.
• पुढे बोलताना गडकरी म्हणाले की, लातूर-टेंभुर्णी हा मराठवाडा आणि पश्चिम महाराष्ट्राला जोडणारा महत्वाचा मार्ग आहे. मराठवाड्याच्या विकासासाठी तो अत्यंत महत्वपूर्ण आहे. आजच्या घडीला या महामार्गाची प्रचंड दुरावस्था झाली आहे. लवकरच हा महामार्ग चारपदरी केला जाणार आहे. त्यासाठी मंजुरी देण्यात आली आहे. मराठवाड्यात चांगले रस्ते झाले, तरच मराठवाड्याचा विकास होईल आणि शेतकर्‍यांना आपल्या शेतातील उत्पादने कमी वेळात मोठ्या बाजारपेठेत पोहोचवता येतील. त्यातून मराठवाड्याचा सर्वांगीण विकास होईल. त्यामुळेच आपण लवकरात लवकर लातूर ते टेंभुर्णी हा चारपदरी महामार्गही पूर्ण करणार असल्याची घोषणा गडकरी यांनी यावेळी केली.
• पन्नास हजार कोटी रूपयांचा काश्चिर ते कन्याकुमारी हा उत्तरेकडून दक्षिणेला जोडणारा राष्ट्रीय महामार्ग येत्या डिसेंबरपर्यंत पूर्ण होईल. हा महामार्ग धाराशिव जिल्ह्यालाही जोडला जाणार असल्याचे गडकरी यांनी सांगितले. भारत देश प्रगतीच्या दिशेने वाटचाल करत आहे. विदर्भापेक्षाही मराठवाडा आणि परिसरात ऊसाचे उत्पन्न जास्त आहे. बागायती जमिनी सुध्दा अधिक आहेत. त्यामुळे साहजिकच साखर कारखान्यांची संख्या देखील मराठवाड्यात सर्वाधिक आहे. सगळे कारखाने इथेनॉल निर्मिती करू शकतात. मोठ्या प्रमाणात इथेनॉलची निर्मिती झाल्यास अगदी शेतकरी सुध्दा आपली स्कूटर इथेनॉलवरती चालवेल. परिणामी पेट्रोल-डिझेलच्या वाढलेल्या किंमती आपोआप कमी होतील आणि शेतकर्‍यांची प्रगती झाल्याशिवाय राहणार नाही, असे मतही मंत्री गडकरी यांनी व्यक्त केले. देशात शहरांची प्रगती होत आहे, तशीच ती ग्रामीण भागाचीही अपेक्षित आहे. केवळ सिटी स्मार्ट होवून चालणार नाही. तर खेडी सुध्दा स्मार्ट आणि प्रगत झाली पाहिजेत. दुर्गम भागात रस्ते, वीज पुरवठा करून या भागांना शहराशी जोडायला हवे. त्यासोबत मोठे व्यवसाय उभे करून तरूणांच्या हाताला रोजगार उपलब्ध करून देण्याची भावनाही यावेळी बोलून दाखवली.

• बाह्य यंत्रणेच्या माध्यमातून भरती रद्द करण्यात आल्याचे राज्य शासनाने गेल्या वर्षी ऑक्टोबरमध्ये जाहीर केले होते. मात्र, आता राज्य शासनाच्या विविध पदांसाठी भरतीप्रक्रिया राबवून मनुष्यबळ उपलब्ध करून देणाऱ्या महाराष्ट्र लोकसेवा आयोगातच (एमपीएससी) बाह्य यंत्रणेद्वारे भरती केली जाणार असल्याचे समोर आले आहे.
• सामान्य प्रशासन विभागाच्या अतिरिक्त सचिव स्मिता जोशी यांनी या संदर्भातील शासन निर्णय प्रसिद्ध केला. एमपीएससीच्या कार्यालयातील २६ संवर्गासाठी मिळून २७१ पदांच्या सुधारित आकृतिबंधास मंजुरी देण्यात आली आहे. मात्र, लिपिक टंकलेखक संवर्गातील पदोन्नती कोटय़ातील रिक्त असलेल्या २८ पदांवर पदोन्नतीने किंवा एक वर्ष कालावधीसाठी लिपिक टंकलेखकांची २८ काल्पनिक पदे निर्माण करून, त्या पदांच्या सेवा बाह्य यंत्रणेद्वारे घेण्यास शासनाने मंजुरी दिली होती. तसेच एमपीएससीतील मंजूर पदांपैकी ४५ पदे (नामनिर्देशन ४०, पदोन्नती ५) रिक्त आहेत. ती काल्पनिक पदे निर्माण करून बाह्य यंत्रणेद्वारे भरण्याचा प्रस्ताव एमपीएससीने दिला होता.
• लिपिक टंकलेखकांच्या सेवाप्रवेश नियमाप्रमाणे पदोन्नतीने, नामनिर्देशनाद्वारे आणि वाहनचालकामधून कायमस्वरूपी बदलीने नियुक्तीसाठी ४०:५०:१० असे प्रमाण होते. मात्र, एमपीएससी सचिवांनी ते ०५:९०:०५ असे केले आहे. सर्वंकष विचाराअंती लिपिक टंकलेखक संवर्गात ४५ पदे (नामनिर्देशन ४०, पदोन्नती ५) काल्पनिक पदे निर्माण करून ती बाह्य यंत्रणेद्वारे भरण्यास मंजुरी देण्यात आली. त्यात पदोन्नती, नामनिर्देशन कोटय़ातील अर्हताधारक उमेदवार उपलब्ध होईपर्यंत संबंधित पदावरील कर्मचारी बाह्य यंत्रणेद्वारे घेता येतील, असे शासन आदेशात नमूद करण्यात आले आहे.
• राज्याची पदभरती करणारी स्वायत्त संस्था असलेल्या एमपीएससीलाच बाह्य यंत्रणेवर अवलंबून राहावे लागत आहे. पदे रिक्त असणे, पदोन्नती होणे ही प्रक्रिया प्रशासकीय पातळीवरील आहे. रिक्त पदे न भरल्याने एमपीएससीच्या प्रक्रिया संथ गतीने होत आहेत. बाह्य यंत्रणेद्वारे भरती करणे गोपनीयतेच्या दृष्टीने धोकादायक आहे.

• आगामी लोकसभा निवडणुकीत प्रथमच ८० पेक्षा जास्त वय असणारे आणि ४० टक्क्यांपेक्षा जास्त शारीरिक विकलांग असणाऱ्या नागरिकांना घरातून मतदानाची संधी उपलब्ध करून देण्याचा निर्णय घेण्यात आला आहे. त्यानुसार राज्यातील ८० पेक्षा जास्त वयोगटातील तब्बल २६ लाख ७० हजार, तर शारीरिक विकलांग पाच लाख ९० हजार ३८२ नागरिकांना या सुविधेद्वारे घरातून मतदान करता येणार आहे.
• लोकसभा निवडणुकीच्या पार्श्वभूमीवर केंद्रीय निवडणूक आयोगाचे महाराष्ट्राचे मुख्य निवडणूक अधिकारी श्रीकांत देशपांडे यांनी पुणे जिल्ह्याचा शुक्रवारी आढावा घेतला. त्यानंतर पत्रकारांशी बोलताना त्यांनी ही माहिती दिली. देशपांडे म्हणाले, ‘केंद्रीय निवडणूक आयोगाने यंदा प्रथमच ८० पेक्षा जास्त वयोगटातील आणि ४० टक्क्यांपेक्षा जास्त शारीरिक विकलांग नागरिकांसाठी घरातून मतदानाची संधी उपलब्ध करून दिली आहे.
• केंद्रीय निवडणूक आयोगाकडून निवडणुकीची घोषणा झाल्यानंतर पाच दिवसांत जिल्हा प्रशासनाकडून मतदार यादीत नाव असणाऱ्या संबंधित नागरिकांना ‘१२-ड’ हा अर्ज घरोघरी जाऊन दिला जाणार आहे. हा अर्ज या नागरिकांकडून भरून घेतला जाणार आहे. अर्जात संबंधित नागरिकांना घरातून मतदान करणार किंवा प्रत्यक्ष मतदान केंद्रावर जाऊन मतदान करणार, याबाबतची माहिती घेतली जाईल. या अर्जांवर संबंधित जिल्ह्यांचे जिल्हाधिकारी निर्णय घेतील. या नागरिकांनी प्रत्यक्ष मतदान केंद्रावर जाऊन मतदान केल्यास उर्वरित मतदारांना विशेत: तरुणांना त्यातून प्रोत्साहन मिळेल. मात्र, ज्या मतदारांना मतदान केंद्रावर जाऊन मतदान करता येत नाही, त्यांचे मतदान वाया जाऊ नये, म्हणून ही सुविधा सुरू केली आहे.’
• दरम्यान, घरातून मतदान करताना राजकीय पक्ष आणि निवडणुकीतील उमेदवारांचे प्रतिनिधी, निवडणूक अधिकारी प्रत्यक्ष उपस्थित असतील. मतदानाचे चित्रीकरण केले जाणार आहे. यातून या सुविधेची पारदर्शकता जपली जाणार आहे, असेही देशपांडे यांनी सांगितले.

• १९ वर्षाखालील विश्वचषक २०२४ मध्ये भारतासाठी चमकदार कामगिरी करणाऱ्या मुशीर खानने रणजी ट्रॉफीमध्येही शानदार कामगिरी केली आहे. मुशीरने २०२२ च्या अखेरीस मुंबईसाठी रणजी क्रिकेटमध्ये पदार्पण केले. पण पहिल्या तीन सामन्यात केवळ ९२ धावा करणाऱ्या मुशीरने रणजी ट्रॉफीतील पुनरागमन सामन्यात शतक झळकावले आहे. बडोद्याविरुद्धच्या उपांत्यपूर्व फेरीत मुंबईचे दिग्गज फलंदाज एकापाठोपाठ एक अशा कठीण विकेटवर बाद होत होते. मात्र मुशीरने शतक झळकावून संघाला अडचणीतून बाहेर काढले.

मुशीरचे देशांतर्गत क्रिकेटमधील पहिले शतक -

• देशांतर्गत क्रिकेटच्या कोणत्याही फॉरमॅटमधील मुशीर खानचे हे पहिले शतक आहे. त्याने १७९ चेंडूत आपले शतक पूर्ण केले. मुशीरने आपल्या शतकी खेळीत ६ चौकार लगावले. पृथ्वी शॉने मुंबईला वेगवान सुरुवात करून दिली. पृथ्वी ५७ धावांवर बाद झाल्यानंतर मुशीर तिसऱ्या क्रमांकावर फलंदाजीला आला. लवकरच मुंबईची धावसंख्या ९९ धावांवर ५ बाद वरु १४२ धावांवर ५ विकेट अशी झाली. फिरकी गोलंदाजांसाठी खेळपट्टी उपयुक्त होती.

अजिंक्य रहाणे पुन्हा अपयशी ठरला -

• सामन्याच्या पहिल्या डावात मुंबईचा कर्णधार अजिंक्य रहाणे पुन्हा एकदा अपयशी ठरला आहे. रहाणे १३ चेंडूत ३ धावा करून बाद झाला. पृथ्वी शॉने ३३ धावांची खेळी केली. १४२ धावांवर ५ विकेट पडल्यानंतर हार्दिक तमोरने मुशीरला साथ दिली. त्यामुळे मुंबई संघाला पहिला दिवसअखेर ९० षटकानंतर ५ बाद २४८ धावा केल्या. सध्या मुशीर खान २१६ चेंडूत १० चौकारांच्या मदतीने १२८ धावांवर नाबाद आहे. त्याचबरोबर हार्दिक तमोरने १६३ चेंडूत ३० धावांवर नाबाद आहे.

सौराष्ट्रसाठी सर्वाधिक धावा करणारा पुजारा उपांत्यपूर्व फेरीत अपयशी -

• अनुभवी फलंदाज चेतेश्वर पुजारा तिसऱ्या उपांत्यपूर्व फेरीच्या सामन्यात जास्त काळ खेळपट्टीवर टिकू शकला नाही. तामिळनाडूविरुद्ध खेळल्या जात असलेल्या या सामन्यात त्याला केवळ दोन धावा करता आल्या. मात्र, सौराष्ट्रसाठी पुजारा सर्वाधिक धावा करणारा फलंदाज आहे. त्याने १२ डावात ७८३ धावा केल्या आहेत. पुजाराची सर्वोच्च धावसंख्या २४३ धावा आहे. त्याने तीन शतके आणि दोन अर्धशतके केली आहेत. पुजारा सध्या भारतीय संघाबाहेर आहे. सौराष्ट्राने हार्विक देसाईच्या ८३ धावांच्या जोरावर पहिल्या डावात सर्वबाद १८३ धावा केल्या. प्रत्युत्तरात तमिळनाडूने पहिल्या दिवसअखेर १ बाद २३ धावा केल्या.

• भारत आणि इंग्लंड यांच्यातील चौथा कसोटी सामना रांची येथील जेएससीए आंतरराष्ट्रीय स्टेडियमवर खेळला जात आहे. भारतीय संघ व्यवस्थापनाने युवा अनकॅप्ड वेगवान गोलंदाज आकाश दीपला पदार्पणाची संधी मिळाली आहे. भारताकडून कसोटी क्रिकेट खेळणारा आकाश दीप हा ३१३ वा क्रिकेटपटू ठरला आहे. आता आपण पदार्पणवीर आकाश दीप कोण आहे? जाणून घेऊयात.

आकाश दीप कोण आहे?

• आकाश दीपचा जन्म बिहारच्या रोहतास जिल्ह्यातील देहरी गावात झाला. २७ वर्षीय आकाश दीप त्याच्या घातक इनस्विंग गोलंदाजीमुळे निवड समिती आणि भारतीय संघ व्यवस्थापनाच्या नजरेत आला. आकाश दीपने आयपीएलमध्ये ७ सामने खेळले असून त्यात त्याने ६ विकेट्स घेतल्या आहेत. आकाश दीपने २९ प्रथम श्रेणी सामन्यांमध्ये २३.१८ च्या गोलंदाजीच्या सरासरीने १०३ बळी घेतले आहेत. प्रथम श्रेणी क्रिकेटमध्ये आकाश दीपने चार वेळा एका डावात पाच विकेट्स घेतल्या आहेत. याशिवाय आकाश दीपने एका सामन्यात एकदा १० विकेट्स घेण्याचा पराक्रम केला आहे.

रोहितचे जिंकले होते मन -

• आकाश दीप देशांतर्गत क्रिकेटमध्ये बंगाल संघाकडून खेळतो. आकाश दीपने अलीकडेच इंग्लंड लायन्सविरुद्धच्या दोन अनधिकृत कसोटी सामन्यात ११ विकेट्स घेतल्या होत्या. याशिवाय आकाश दीपने इंग्लंड लायन्सविरुद्ध सराव सामन्यात दोन विकेट्स घेतल्या होत्या. इंग्लंड लायन्सविरुद्ध आकाश दीपची गोलंदाजी पाहून निवड समिती आणि भारतीय कर्णधार रोहित प्रभावित झाले होते.

आकाश दीपला मिळाली पदार्पणाची कॅप -

• जसप्रीत बुमराहला या कसोटीतून विश्रांती देण्यात आली आहे. अशा परिस्थितीत त्याच्या जागी आरसीबीचा वेगवान गोलंदाज आकाश दीप पदार्पण केले आहे. पदार्पणाची कॅप मिळवणारा तो भारताचा ३१३ वा खेळाडू आहे. आकाशने देशांतर्गत क्रिकेटमध्ये चमकदार कामगिरी केली होती. त्याला भारतीय संघाचे मुख्य प्रशिक्षक राहुल द्रविड यांनी पदार्पणाची कॅप दिली. यावेळी आकाशची आईही त्याच्या पदार्पणाला उपस्थित होती. पदार्पणाची कॅप मिळाल्यानंतर आकाशने आईला मिठी मारली आणि भावूक झाला.

चालू घडामोडी आणि दिनविशेष - 24 फेब्रुवारी 2023

24 फेब्रुवारी चे दिनविशेष पाहण्यासाठी (येथे क्लिक करा)