चालू घडामोडी आणि दिनविशेष - २४ डिसेंबर २०२२

• एक हुद्दा, एक निवृत्तीवेतन (वन रँक वन पेन्शन-ओआरओपी) योजनेअंतर्गत सशस्त्र दलातील कर्मचाऱ्यांच्या निवृत्ती वेतनात सुधारणा करण्यास केंद्र सरकारने शुक्रवारी मंजुरी दिली. या निर्णयाचा लाभ सुमारे २५ लाख निवृत्त सैनिकांना होईल. तसेच हा निर्णय पूर्वलक्ष्यी प्रभावाने, १ जुलै २०१९पासून लागू करण्यात येणार आहे.

• पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत सशस्त्र दलातील निवृत्त कर्मचारी आणि त्यांच्या कुटुंबीयांसाठीच्या ‘एक हुद्दा, एक निवृत्तीवेतन’ योजनेत सुधारणा करण्यास मंजुरी देण्यात आली आली. हा निर्णय पूर्वलक्ष्यी प्रभावाने, १ जुलै २०१९ पासून लागू करण्याचा निर्णय घेण्यात आला, अशी माहिती संरक्षण मंत्रालयातर्फे देण्यात आली.

• जुलै २०१९ ते जून २०२२ या कालावधीतील थकबाकीपोटी निवृत्ती वेतनधारकांना २३,६३८ कोटी रुपये देण्यात येणार आहेत. या निर्णयामुळे ८,४५० कोटी रुपयांचा अतिरिक्त वार्षिक बोजा सरकारवर पडेल, असेही संरक्षण मंत्रालयाने म्हटले आहे.  शहिदांच्या पत्नींना आणि अपंग निवृत्तीवेतनधारकांसह कौटुंबिक निवृत्ती वेतनधारकांनाही या निर्णयाचा लाभ दिला जाईल. थकबाकी चार सहामाही हप्त्यांमध्ये दिली जाईल. तथापि, विशेष कौटुंबिक निवृत्तीवेतनधारक आणि शौर्य पुरस्कार विजेत्यांसह सर्व कौटुंबिक निवृत्ती वेतनधारकांना एका हप्तय़ात थकबाकी दिली जाईल, असेही मंत्रालयाने स्पष्ट केले आहे..

• मागील निवृत्तीवेतनधारकांचे निवृत्ती वेतन २०१८मध्ये निवृत्त झालेल्या सैनिकांच्या किमान आणि कमाल निवृत्तीवेतनाच्या सरासरीच्या आधारावर त्याच श्रेणी व सेवा कालावधीसह पुनर्रनिश्चित केले जाईल, असेही संरक्षण मंत्रालयाने निवेदनात म्हटले आहे. ३० जून २०१९ पर्यंत सेवानिवृत्त झालेल्या सशस्त्र दलातील कर्मचाऱ्यांना या निर्णयाचा लाभ मिळेल, परंतु १ जुलै २०१४ पासून मुदतपूर्व निवृत्त झालेल्यांना मात्र त्यातून वगळण्यात येईल.

• सरकारने २०१५मध्ये एक हुद्दा, एक निवृत्ती वेतन योजनेच्या अंमलबजावणीची घोषणा करून तशी अधिसूचना जारी केली होती. त्यात दर पाच वर्षांनी निवृत्तीवेतनाचा आढावा घेण्याची तरतूद केली होती. माजी सैनिकही निवृत्ती वेतनात सुधारणा करण्याची मागणी करीत होते. 

• केंद्रीय आरोग्य मंत्री मनसुख मांडवीय यांनी आज पुन्हा एकदा राज्यांच्या आरोग्य मंत्र्यांसोबत बैठक घेतली. चीन आणि जपान या दोन्ही देशांमध्ये करोना वाढतो आहे त्यामुळे केंद्र सरकार प्रचंड सावध झाल्याची चिन्हं या बैठकीत दिसून आली आहेत. कारण सलग तीन दिवस करोनावर उपाय योजना करण्यासाठी बैठक घेण्यात येते आहे.

• मनसुख मांडवीय यांनी राज्यांना काय सूचना दिल्या आहेत - नव्या वर्षाच्या स्वागताचा उत्साह लोकांमध्ये मोठ्या प्रमाणावर आहे. तो लक्षात घेऊन टेस्ट- ट्रॅक-ट्रीट आणि व्हॅक्सिनेशन यावर भर द्या अशी महत्त्वाची सूचना दिली आहे

• याशिवाय आणखी महत्त्वाची बाब म्हणजे मास्क लावणं, हात स्वच्छ ठेवणं आणि सोशल डिस्टन्सिंग कसं राहिल हे पाहणं म्हणजेच कोव्हिड प्रोटोकॉल पाळण्याचं नागरिकांना आवाहन करावं अशाही सूचना देण्यात आल्या आहेत.

• केंद्र सरकारने फ्ल्यू किंवा इतर गंभीर आजारांच्या वाढत्या प्रसाराकडे लक्ष ठेवण्याच्या सूचनाही राज्यांना दिल्या आहेत. सगळ्या राज्यांनी कोव्हिड १९ संदर्भातली तयारी करून ठेवा आणि आरोग्य विषयक तयारी सुसज्ज ठेवा अशाही सूचना दिल्या आहेत. आपण आजवर करोनाच्या तीन लाटा पाहिल्या आहेत. जर करोनाची चौथी लाट आली तर त्या लाटेला तोंड देण्यासाठी आवश्यक ती सगळी पावलं उचलावीत असंही केंद्र सरकारने सुचवलं आहे.

• आयपीएल २०२३ साठी, २३ डिसेंबर (शुक्रवार) रोजी कोची येथे खेळाडूंचा मिनी लिलाव होत आहे. सर्व १० फ्रँचायझी संघांसोबतच चाहते आणि क्रिकेटपटूही आयपीएलच्या या मिनी लिलावाची आतुरतेने वाट पाहत आहेत. या लिलाव प्रक्रियेला दुपारी २:३० वाजेपासून सुरुवात झाली आहे. आतापर्यंत पाच खेळाडू सर्वात महागडे ठरले आहेत. ज्यामध्ये एका भारतीयाचा आणि चार विदेशी खेळाडूंचा समावेश आहे.

• इंग्लंडचा अष्टपैलू खेळाडू सॅम करनसाठी सगळेच संघ मैदानात उतरले होते. आयपीएल इतिहासातील आफ्रिकेच्या ख्रिस मॉरिसला मागे टाकत सर्वात मोठी बोली लागणारा तो सर्वात महागडा खेळाडू ठरला. त्याला पंजाब किंग्सने १८.५० कोटी रुपयांना खरेदी केले. टाटा आयपीएल इतिहासातील ही सर्वात मोठी बोली लागली.

• ऑस्ट्रेलियाचा कॅमरून ग्रीनसाठी करननंतर सगळे मागे लागले होते. ज्यामध्ये दिल्ली आणि मुंबई त्याच्यासाठी प्रयत्न करताना दिसले. अखेर मुंबई इंडियन्सने १७.५० कोटी बोली लावून त्याला आपल्या ताफ्यात सामील केले. तसेच तो या लिलावातील दुसरा सर्वात महाग खेळाडू ठरला.

• इंग्लंडचा कर्णधार आणि अष्टपैलू खेळाडू आपला मागील आयपीएलमधील विक्रम मोडणार का? अशी अपेक्षा होती. मात्र तसे काही झाले नाही. तो अपेक्षाप्रमाणे भाव खाऊ शकला नाही. त्याला धोनीच्या चेन्नईने १६.२५ कोटीला खरेदी केले. मागच्या वेळी त्याने १५ कोटीच्या आसपास कमावले होते. तो यंदाच्या लिलावातील तिसरा महागडा खेळाडू ठरला आहे.

• इंग्लंडचा हॅरि ब्रूकसाठी सनरायजर्स आणि राजस्थान रॉयल्स मध्ये चढाओढ सुरु होती. तो १३.२५ कोटी रुपयांना विकला केला. त्याला सनरायझर्स हैदराबादने आपल्या ताफ्यात सामील केले. हॅरि आतापर्यंतच्या लिलावातील चौथा महागडा खेळाडू ठरला आहे.

• आठवडय़ातले सहा दिवस सात ते आठ तासांची शिकवणी, अनेकदा साप्ताहिक सुट्टीतही अतिरिक्त वर्ग आणि एका आठवडय़ात दोन चाचण्या अशा दडपून टाकणाऱ्या वेळापत्रकामुळे कोटा या स्पर्धा परीक्षेच्या देशप्रसिद्ध शिकवणी केंद्रातील विद्यार्थ्यांमध्ये कमालीची अस्वस्थता आहे. त्यामुळे जेईई आणि नीटची तयारी करणारे विद्यार्थी दोन साप्ताहिक सुटटय़ांबरोबरच चाचण्यांची संख्या कमी करण्याची एखमुखी मागणी करीत आहेत.

• स्पर्धा परीक्षांच्या तयारीचे केंद्र म्हणून देशभर प्रसिद्ध असलेल्या राजस्थानमधील कोटा शहरातील शिकवणी वर्गाच्या वेळापत्रकाचा मुद्दा सध्या चर्चेत आहे. स्पर्धा परीक्षेची तयारी करणाऱ्या विद्यार्थ्यांवर सोमवार ते शनिवार दररोज सात ते आठ तासांच्या शिकवणीचा ताण असतो. या आठ तासांत त्यांना अतिशय कमी मोकळा वेळ दिला जातो. त्याशिवाय, काहीवेळा रविवारीही शंका-समाधान सत्रे आणि अतिरिक्त शिकवणी घेतली जाते.

• त्याचबरोबर दर आठवडय़ाला तीन अंतर्गत चाचण्या आणि महिन्याच्या शेवटच्या रविवारी एक मोठी चाचणी घेतली जाते. शिकवणी वर्गाच्या या अभ्यासताणाचा मुद्दा गेल्या महिन्याभरात तीन विद्यार्थ्यांनी केलेल्या आत्महत्यांमुळे चर्चेत आला आहे. आता ‘जेईई’ आणि ‘नीट’ची तयारी करणाऱ्या विद्यार्थ्यांनीच ताण कमी करण्याची मागणी केली आहे.  

• आम्ही वेळेशी स्पर्धा करतो आणि एक दिवसाची विश्रांती घेतली तर अन्य हजारो विद्यार्थ्यांच्या तुलनेत मागे पडतो, असे अभ्यास आणि शिकवण्यांच्या भरगच्च वेळापत्रकानुसार धावणाऱ्या विद्यार्थ्यांचे म्हणणे आहे.

• नेपाळमध्ये जन्मठेपेची शिक्षा ठोठावण्यात आलेला फ्रेंच  ‘सीरियल किलर’ चार्ल्स शोभराजची तुरुंगातून सुटका झाल्यानंतर त्याला काठमांडूतील विमानतळावरून फ्रान्सला पाठवण्यात आले. ७८ वर्षीय शोभराजची गुरुवारी कारागृहातून सुटका झाली  होती.

• मध्यवर्ती कारागृहातून त्याला सोडण्यात आल्यानंतर त्याच्या प्रवासाच्या कागदपत्राचे सोपस्कार इमिग्रेशन अधिकाऱ्यांनी पूर्ण केले. सर्वोच्च न्यायालयाने सुटका केल्यानंतर शोभराजला मायदेशी परत पाठवण्याचे आदेश दिले होते. सुटका झाल्यानंतर दोन दिवसांत ही प्रक्रिया पूर्ण करून त्याला मायदेशात पाठवण्याचे आदेश दिल्यानंतर अधिकाऱ्यांनी शुक्रवारी तातडीने ही प्रक्रिया पूर्ण केली.

• शोभराजला फ्रान्सला पाठवण्यासाठी त्याला शुक्रवारी त्रिभुवन आंतरराष्ट्रीय विमानतळावर नेण्यात आले, अशी माहिती त्याचे वकील गोपाल शिवकोटी चिंतन यांनी दिली. शोभराज प्रथम दोहा आणि त्यानंतर कतार एअरवेजच्या विमानाने संध्याकाळी ६ वाजता पॅरिसला पोहोचेल, असे चिंतन म्हणाले.

• नेपाळमध्ये कायमची बंदी - शोभराजला आयुष्यभर नेपाळला परतण्यापासून रोखले जाणार आहे. एकदा मायदेशी परतल्यानंतर त्याला पुन्हा नेपाळमध्ये प्रवेश करण्यास कायमची बंदी घातली जाणार असल्याचे वृत्त नेपाळमधील वृत्तपत्रांनी दिले आहे. शोभराजवर २०१७ मध्ये हृदय शस्त्रक्रिया झाली होती. त्यामुळे १० दिवस उपचारांसाठी गंगालाल रुग्णालयात दाखल करण्याची विनंती त्याने केली होती, मात्र सर्वोच्च न्यायालयाने त्याची तात्काळ मायदेशी रवानगी करण्याचे निर्देश दिले होते.

चालू घडामोडी आणि दिनविशेष - २४ डिसेंबर २०२१

२४ डिसेंबर चे दिनविशेष पाहण्यासाठी (येथे क्लिक करा)