चालू घडामोडी आणि दिनविशेष - 22 जून 2023

• कनिका अहुजाची अष्टपैलू कामगिरी आणि तिला श्रेयंका पाटील व मन्नत कश्यप या फिरकी गोलंदाजांची साथ यामुळे भारताच्या २३ वर्षांखालील संघाने बांगलादेशला ३१ धावांनी नमवत उदयोन्मुख महिला आशिया चषक ट्वेन्टी-२० क्रिकेट स्पर्धेचे जेतेपद पटकावले.
• महिला प्रीमियर लीगच्या (डब्ल्यूपीएल) पहिल्या हंगामात रॉयल चॅलेंजर्स बंगळूरुकडून खेळताना प्रभावी कामगिरी करणाऱ्या कनिकाने बुधवारी बांगलादेशविरुद्धच्या अंतिम सामन्यात अप्रतिम खेळ केला. डावखुऱ्या कनिकाने २३ चेंडूंत चार चौकारांच्या मदतीने नाबाद ३० धावांचे योगदान दिले. यानंतर तिने ऑफ-स्पिन गोलंदाजी करताना २३ धावांत २ बळी मिळवले. तसेच ऑफ-स्पिनर श्रेयंका पाटील (१३ धावांत ४ बळी) आणि डावखुरी फिरकी गोलंदाज मन्नत कश्यप (२० धावांत ३ बळी) यांनीही अचूक टप्प्यावर मारा करताना भारताच्या यशात महत्त्वाची भूमिका बजावली.
• हाँगकाँग येथे झालेल्या या स्पर्धेच्या अंतिम सामन्यात भारताने नाणेफेक जिंकून प्रथम फलंदाजी करताना २० षटकांत ७ बाद १२७ अशी धावसंख्या केली. कर्णधार श्वेता सेहरावत (१३), उमा छेत्री (२२) आणि दिनेश वृंदा (३६) यांनी सुरुवातीला चांगली फलंदाजी केल्यानंतर भारतीय संघ मधल्या षटकांत अडचणीत सापडला. मात्र, कनिकाने अखेरीस फटकेबाजी करत भारताला १२५ धावांचा टप्पा ओलांडून दिला. प्रत्युत्तरात बांगलादेशने सुरुवातीपासूनच ठरावीक अंतराने गडी गमावले. त्यांची एकही फलंदाज २० धावांचा टप्पा ओलांडू शकली नाही. अखेरीस बांगलादेशचा डाव १९.२ षटकांत ९६ धावांतच संपुष्टात आला आणि भारताने स्पर्धेचे जेतेपद मिळवले.

अंतिम फेरीपूर्वी केवळ एक सामना

• हाँगकाँग येथे झालेल्या या स्पर्धेत पावसाने सातत्याने व्यत्यय आणला. या स्पर्धेतील एकूण १५ पैकी आठ सामने पावसामुळे रद्द करावे लागले. विशेष म्हणजे भारताने अंतिम फेरीपूर्वी केवळ एक सामना खेळला. त्यांनी सलामीच्या लढतीत यजमान हाँगकाँगच्या संघाला नमवले होते. त्यानंतर नेपाळ आणि पाकिस्तानविरुद्धचे साखळी सामने, तर श्रीलंकेविरुद्धचा उपांत्य फेरीतील सामना पावसामुळे एकही चेंडू न टाकता रद्द करण्यात आला होता. मात्र, त्यानंतरही अ-गटाच्या गुणतालिकेत अग्रस्थानी राहिल्याने भारताला अंतिम फेरी गाठण्यात यश आले.

• अनुभवी फुटबॉलपटू ख्रिस्तियानो रोनाल्डोने आणखी एक खास कामगिरी आपल्या नावावर केली आहे. रोनाल्डोने २० जून रोजी पोर्तुगालसाठी २०० वा आंतरराष्ट्रीय सामना खेळला. आइसलँडविरुद्धच्या सामन्यात हा खास टप्पा गाठणाऱ्या रोनाल्डोने विजयी गोल करत हा आनंद खास पद्धतीने साजरा केला. या युरोपियन चॅम्पियनशिप पात्रता सामन्यात पोर्तुगालच्या संघाने १-० असा विजय मिळवला.
• ख्रिस्तियानो रोनाल्डोचाही या सामन्यापूर्वी गिनीज वर्ल्ड रेकॉर्डने गौरव केला. रोनाल्डोने यावर्षी सर्वाधिक आंतरराष्ट्रीय सामने खेळणाऱ्या कुवेतच्या बद्र अल-मुतावाचा १९६ सामन्यांचा विक्रम मोडला. आइसलँडविरुद्धच्या या सामन्यात रोनाल्डोनेही ८९व्या मिनिटाला गोल नोंदवून आपल्या शैलीत हा दुहेरी आनंद साजरा केला.
• ३८ वर्षीय ख्रिस्तियानो रोनाल्डोने पदार्पणानंतर जवळपास २० वर्षांनी २०० आंतरराष्ट्रीय फुटबॉल सामने पूर्ण केले आहेत. त्याचबरोबर रोनाल्डोच्या नावावर १२३ आंतरराष्ट्रीय गोल नोंदवले गेले आहेत. रोनाल्डोने त्याच्या २०० व्या सामन्यासंदर्भात यूईएफए वेबसाइटला दिलेल्या निवेदनात ही एक अविश्वसनीय कामगिरी असल्याचे म्हटले आहे.
• आपल्या २०० व्या सामन्याबाबत ख्रिस्तियानो रोनाल्डोने एका निवेदनात म्हटले आहे की, मला या टप्प्यावर पोहोचून खूप आनंद होत आहे. हा असा क्षण आहे ज्याची तुम्ही कधीच अपेक्षा केली नसेल. २०० आंतरराष्ट्रीय सामने खेळणे ही खरोखरच अविश्वसनीय कामगिरी आहे. या सामन्यात विजयी गोल करणे संघासाठी अतिशय संस्मरणीय ठरले. आम्ही यापेक्षा चांगले खेळू शकलो नसतो. पण हे खेळात घडते. हा विजय माझ्यासाठी खूप संस्मरणीय राहिल.

• International Day of Yoga 2023 आंतरराष्ट्रीय योग दिनानिमित्त भारतासह जगभरात अनेकांनी उत्साहाने योगासने केली. शहरे आणि गावांमध्ये सामूहिक योगासनांचे आयोजन करण्यात आले होते. लडाखमधील उंच भागात, केरळमध्ये पाण्याखाली, आयएनएस विक्रांतवर, वंदे भारत आणि मुंबईच्या लोकल, खुली मैदाने ते बंदिस्त सभागृहांमध्ये सामूहिक योग कार्यक्रम आयोजित करण्यात आले. राष्ट्रपती द्रौपदी मुर्मु, उपराष्ट्रपती जगदीप धनखड यांच्यासह विविध मंत्र्यांनीही यामध्ये सहभाग घेतला. अमेरिका, ब्रिटन, नेपाळ, दक्षिण कोरिया इत्यादी देशांमध्येही लोकांनी उत्साहाने योगदिनामध्ये सहभाग घेतला.

योग प्रसार, प्रचारावरून श्रेयवाद; काँग्रेस-भाजपमध्ये जोरदार जुंपली

• नवी दिल्ली : पंतप्रधान नरेंद्र मोदी बुधवारी ‘संयुक्त राष्ट्रां’मध्ये विश्वयोग दिन साजरा करत असताना, योग प्रसार-प्रचाराचे श्रेय लाटण्यावरून भाजप आणि काँग्रेस यांच्यामध्ये जोरदार जुंपली होती. देशाचे पहिले पंतप्रधान पंडित जवाहरलाल नेहरू यांनी आंतरराष्ट्रीय स्तरावर योग लोकप्रिय केल्याचा दावा काँग्रेसने केला. त्यामुळे संतप्त झालेल्या भाजपने, गांधी कुटुंबासाठी मोदींचे योगदान नाकारण्याचा प्रयत्न होत असल्याची टीका केली.
• ’योगाला लोकप्रिय करण्यात पं. नेहरूंचा मोलाचा वाटा होता, त्यांनीच योगाला राष्ट्रीय धोरणाचा भाग बनवले. आंतरराष्ट्रीय योग दिनानिमित्त आम्ही नेहरूंचे आभार मानतो.. आपल्या शारीरिक आणि मानसिक आरोग्यामध्ये प्राचीन कला आणि तत्त्वज्ञानाचे महत्त्व जाणून घेऊया आणि आपल्या जीवनात त्याचा अंतर्भाव करूया, असे ट्वीट काँग्रेसने केले. या ट्वीटसोबत  पं. नेहरूंच्या योगाभ्यासाचे छायाचित्रही ट्वीट केले.
• ’पण काँग्रेसचे खासदार शशी थरूर यांनी काँग्रेसच्या ट्वीटचे कौतुक करताना योगप्रसार करणाऱ्या प्रत्येक सरकारचे अभिनंदन केले पाहिजे, असे मत व्यक्त केले. थरूर यांनी ट्वीटमधून अप्रत्यक्षपणे पंतप्रधान मोदींची तरफदारी केल्यामुळे काँग्रेसच्या श्रेयवादाच्या ट्वीटमधील हवा काढून घेतली गेली. योग हा जगभरातील आपल्या ‘सॉफ्ट पॉवर’चा महत्त्वाचा भाग असल्याचा युक्तिवाद मी अनेक वर्षे केला असून तो ओळखला जात असल्याचे पाहून खूप आनंद झाला, असे ट्वीट थरूर यांनी केले.
• ’योगाची थट्टा (राहुल गांधींचे ट्वीट) करण्यापासून ते आता गांधी कुटुंबासाठी श्रेय लाटण्याचा काँग्रेसचा प्रयत्न पाहता काँग्रेसने एक वर्तुळ पूर्ण केले आहे. २०१५ पासून जागतिक स्तरावर योगाला ओळख मिळू लागली असून त्याबद्दल काँग्रेसने देशवासीयांचे किमान आभार तरी मानले पाहिजे, असे ताशेरे भाजपचे प्रवक्ता शेहजाद पूनावाला यांनी ओढले.

• भारताचे पंतप्रधान नरेंद्र मोदी तीन दिवसीय अमेरिका दौऱ्यावर गेले आहेत. काल (२० जून) ते अमेरिकेसाठी रवाना झाले. या भेटीत ते अमेरिकेचे राष्ट्राध्यक्ष जो बिडेन यांच्यासोबत किमान तीन बैठका घेणार आहेत. यामध्ये एक खासगी बैठक तर, एक डिनर असणार आहे. पंतप्रधान नरेंद्र मोदी अमेरिकेचे उपराष्ट्रपती कमला हॅरिस आणि परराष्ट्र सचिव अँटनी ब्लिंकन यांनी संयुक्तपणे आयोजित केलेल्या स्नेहभोजनालाही जाणार आहेत. तसंच, युएस काँग्रेसच्या नेत्यांकडूनही मोदींचं स्वागत केलं जाणार आहे.
• परराष्ट्र सचिव विनय क्वात्रा यांनी पंतप्रधानांच्या आगामी राज्य दौऱ्याची माहिती देताना सांगितले की, “आमच्या नात्यातील हा एक मैलाचा दगड आहे. ही एक अतिशय महत्त्वाची भेट आहे. २०१४ पासून मोदींनी सहा वेळा अमेरिकेला भेट दिली आहे. या भेटीदरम्यान, सह-उत्पादन, सह-विकास आणि पुरवठा बदल राखण्यासाठी संरक्षण उद्योगांमध्ये जवळून भागीदारी करण्यासाठी दोन्ही बाजू एक रोडमॅपवर काम करत आहेत.
• दोन्ही देशांमध्ये व्यापार आणि गुंतवणूक संबंध मजबूत करण्यावर लक्ष केंद्रित करण्यात येणार आहे. मोदींच्या या भेटीमुळे दूरसंचार, अंतराळ आणि उत्पादन क्षेत्रातील तंत्रज्ञान क्षेत्रात सखोल संबंध निर्माण होणार आहेत. परराष्ट्र सचिव क्वात्रा म्हणाले की, संरक्षण औद्योगिक सहकार्य रोडमॅप हा पंतप्रधान मोदींच्या यूएस दौऱ्याचा एक महत्त्वाचा परिणाम असेल अशी अपेक्षा आहे. भारत आणि अमेरिकेतील संबंधांचा मुख्य स्तंभ म्हणजे संरक्षण सहकार्य आहे, असंही क्वात्रा म्हणाले.
• पंतप्रधान नरेंद्र मोदी वॉशिंग्टन डीसीला जातील. तिथे ते राष्ट्राध्यक्ष बिडेन आणि फर्स्ट लेडी जिल बिडेन यांना भेटणार आहेत. २२ जून रोजी मोदींचे व्हाईट हाऊसमध्ये औपचारिक स्वागत केले जाईल, त्यानंतर बिडेन यांच्यासोबत औपचारिक द्विपक्षीय बैठक होईल.राष्ट्राध्यक्ष बिडेन आणि फर्स्ट लेडी जिल बिडेन गुरुवारी संध्याकाळी मोदींच्या सन्मानार्थ स्नेहभोजनाचेही आयोजन केले आहे.

• अयोध्येतील राम मंदिर दर्शनासाठी केव्हा खुले होणार, याकडे अवघ्या राम भक्तांचं लक्ष लागून राहिलं आहे. राम मंदिराच्या उभारणीचं काम सुरू असून येथे जाऊन दर्शन घेण्यास रामभक्त आतुर आहेत. दरम्यान, २०२४ पर्यंत राम मंदिर दर्शनसाठी खुलं होणार असल्याचं याआधीही सांगण्यात आलं होतं. आता त्याही पुढे जाऊन एक महत्त्वाची अपडेट समोर आली आहे.
• राम मंदिराच्या गाभाऱ्यात मूर्तीची प्रतिष्ठापना कधी होणार, याबाबतची माहिती समोर आली आहे. रामजन्मभूमी तीर्थ क्षेत्र ट्रस्टच्या सदस्याने दिलेल्या माहितीनुसार १४ किंवा १५ जानेवारी म्हणजे मकर संक्रांतीच्या दिनानिमित्त गाभाऱ्यात मूर्तीची प्राणप्रतिष्ठा होण्याची शक्यता आहे. हिंदुस्थान टाईम्सने यासंदर्भातील वृत्त दिले आहे.
• २०२० मध्ये सुरू झालेल्या मंदिराच्या बांधकामावर ट्रस्ट देखरेख करत आहे. ट्रस्टच्या सदस्यांनी सांगितले की मूर्तीची स्थापना डिसेंबरमध्ये होण्याची शक्यता नाही. “डिसेंबरमध्ये मूर्ती स्थापनेसाठी कोणताही शुभ दिवस नाही. हिंदू कॅलेंडरनुसार, जेव्हा सूर्य दक्षिण गोलार्धातून उत्तर गोलार्धात जातो तेव्हाच मकर संक्रांतीपासून प्राणप्रतिष्ठेचे विधी होऊ शकतो. १४ किंवा १५ जानेवारीला होणारी मकर संक्रांती हा रामलल्लाच्या मूर्तीच्या स्थापनेचा सर्वात शुभ दिवस आहे”, ट्रस्टच्या एका सदस्याने नाव न सांगण्याच्या अटीवर ही माहिती दिली.
• ट्रस्टचे सरचिटणीस चंपत राय यांनी जानेवारी महिन्यात सांगितले होते की, “२०२४ मध्ये मकर संक्रांतीच्या दिवशी राम लल्लाच्या मूर्तीची प्राणप्रतिष्ठा (अभिषेक) सोहळा होऊ शकतो.”

चालू घडामोडी आणि दिनविशेष - 22 जून 2023

22 जून चे दिनविशेष पाहण्यासाठी (येथे क्लिक करा)