चालू घडामोडी आणि दिनविशेष - 15 फेब्रुवारी 2024

एअर इंडियाचा ४७० विमाने खरेदी करण्याचा सर्वात मोठा करार

• टाटा समूहाच्या एअर इंडियाने हवाई वाहतूक क्षेत्रातला सर्वात मोठा करार केला आहे. अमेरिकेच्या बोईंग आणि फ्रांसच्या एअरबस या कंपन्यांकडून ४७० विमाने खरेदी करण्याचा मोठा करार केला आहे. यापैकी एअरबसकडून २५० नवीन एअरक्राफ्ट आणि बोईंगकडून २२० मोठी विमाने घेण्यात येणार आहेत. टाटा समूहाने एअर इंडियाला ताब्यात घेतल्यानंतर व्यवस्थापनात खूप व्यापक बदल केले आहेत. एअर इंडिया आणि एअरबस यांच्यामध्ये पंतप्रधान मोदी आणि फ्रांसचे राष्ट्रपती मॅक्रोन यांच्यात व्हर्चुअल बैठक झाल्यानंतर २५० विमान खरेदी करण्याचा करार झाला. पंतप्रधान मोदी म्हणाले की, हा अतिशय महत्त्वाचा करार असून भारत-फ्रांस यांच्यामधील भागीदारीचा ही महत्त्वाची उपलब्धी आहे. तर जो बायडेन यांनी बोईंग – एअर इंडिया यांच्यामध्ये २२० विमानांच्या खरेदीचा करार झाला असल्याची घोषणा केली.
• टाटा समूहाला एअर इंडियाची पुन्हा मालकी मिळाल्यानंतर कंपनीमध्ये खूप मोठे बदल दिसत आहेत. त्यामुळेच एअर इंडियाच्या ताफ्यात नवीन विमानांचा भरणा केलेला दिसून येत आहे. एअरबस – एअर इंडिया करारादरम्यान पंतप्रधान नरेंद्र मोदी, रतन टाटा, फ्रांसचे राष्ट्रपती इमॅन्यूएल मॅक्रोन आणि एअरबसचे मुख्य कार्यकारी अधिकारी गुइलाम फाउरी व्हिडिओ कॉन्फरन्सिंगद्वारे उपस्थित होते. यावेळी फाउरी यांनी या कराराला ऐतिहासिक करार असल्याचे सांगितले.
• त्यानंतर एअर इंडिया आणि अमेरिकेच्या बोईंग कंपनीच्या दरम्यानही मोठा करार झाला. पंतप्रधान कार्यालयाने सांगितले की, मंगळवारी संध्याकाळी मोदी आणि बायडेन यांच्यात फोनवरुन यासंदर्भात चर्चा झाली. दोघांनीही या कराराबाबत आनंद व्यक्त केला. अमेरिका आणि भारत या दोन्ही देशांमधील व्यापारी संबंध आणखी बळकट करण्याच्या दिशेने उचलले हे महत्त्वाचे पाऊल असल्याचे जो बायडेन यांनी सांगितले.

निकी हॅले अध्यक्षपदासाठी उमेदवारीच्या शर्यतीत

• रिपब्लिकन पक्षाच्या निकी हॅले यांनी रिपब्लिकन पक्षातर्फे अमेरिकेच्या अध्यक्षपदाची उमेदवारी मिळवण्याच्या शर्यतीमध्ये उतरण्याचे जाहीर केले आहे. मंगळवारी एक व्हिडीओ प्रसिद्ध करून त्यांनी त्यासंबंधी घोषणा केली. उमेदवारीसाठी माजी अध्यक्ष डोनाल्ड ट्रम्प यांना आव्हान देणाऱ्या त्या पहिल्या रिपब्लिकन नेत्या ठरल्या आहेत. अमेरिकेत पुढील वर्षी नोव्हेंबरमध्ये अध्यक्षपदाची निवडणूक होणार आहे. त्यापूर्वी पक्षाची उमेदवारी मिळवण्यासाठी जानेवारी २०२४ मध्ये निवडणूक होईल. 
• आर्थिक जबाबदाऱ्या पेलण्यासाठी, सीमा सुरक्षित ठेवण्यासाठी, आपला देश आणि आपला अभिमान यांचे संरक्षण करण्यासाठी अमेरिकेला आता नवीन पिढीतील नेतृत्वाची गरज आहे, असा दावा ५१ वर्षांच्या हॅले यांनी या व्हिडीओ संदेशामध्ये केला. हॅले या दक्षिण कॅरोलिना राज्याच्या दोन वेळा गव्हर्नर होत्या तसेच संयुक्त राष्ट्रांमध्ये अमेरिकेच्या राजदूत म्हणूनही त्यांनी काम पाहिले आहे. निकी हॅले यांचे आई-वडील भारतातून अमेरिकेत स्थलांतरित झाले आहेत. 
• दुसरीकडे विवेक रामस्वामी या भारतीय वंशाच्या अमेरिकी उद्योजकाकडे निकी हॅले यांचे संभाव्य प्रतिस्पर्धी म्हणून पाहिले जात आहे. बायोटेकचे संस्थापक असलेले विवेक रामस्वामी गेल्या काही काळापासून अमेरिकेच्या राजकारणात सक्रिय आहेत. हवामान बदल आणि वर्णभेदासारख्या महत्त्वाच्या मुद्दय़ावर त्यांनी अनेकदा वृत्तवाहिन्यांवर रिपब्लिकन पक्षाची बाजू मांडली आहे. हॅले यांच्याप्रमाणेच रामस्वामी यांचेही आई-वडील भारतातून अमेरिकेमध्ये स्थलांतरित झाले. त्यांचा जन्म सिनसिनाटी येथे झाला आहे. हार्वर्ड आणि येल या प्रतिष्ठित विद्यापीठांमधून त्यांचे शिक्षण झाले आहे आणि त्यांची संपत्ती ५० कोटी डॉलर्सपेक्षा अधिक आहे.

महिला आयपीएलचं वेळापत्रक जाहीर! ४ मार्चपासून रंगणार थरार; पहिल्याच सामन्यात ‘हे’ दोन संघ भिडणार

• महिला प्रीमिअर लीगसाठी (WPL Auction 2023) लिलाव प्रक्रिया नुकतीच पार पडली आहे. त्यानंतर आता बीसीसीआयने महिला प्रीमिअर लीगसाठीचे वेळापत्रक जाहीर केले आहे. या वेळापत्रकानुसार WPL मध्ये एकूण २० सामन असतील. तर ही स्पर्धा एकूम २३ दिवस चालणार आहे.
• अंतिम सामना २६ मार्च रोजी - या वर्षी महिला आयपीएल अर्थात WPL 2023 ला येत्या चार मार्चपासून सुरुवात होणार आहे. या हंगामातील पहिली लढत गुजरात जायंट्स आणि मुंबई इंडियन्स यांच्यात होणार आहे. चार मार्चापासून सुरू झालेल्या या स्पर्धेचा अंतिम सामना २६ मार्च रोजी खेळवला जाणार आहे. हा अंतिम सामना ब्रेबॉर्न स्टेडियममध्ये खेळवला जाईल.
• एकूण २० साखळी सामने खेळवले जातील - WPL च्या या पहिल्या हंगामात एकूण २० साखळी सामने खेळवले जातील. त्यानंतर २ प्लेऑफसामने होतील. या स्पर्धेत एकूण चार दिवस दोन सामने खेळवले जातील. या चार दिवसांत पहिला सामना दुपारी तीन वाजता खेळवला जणार आहे. तर अन्य सर्व सामने रात्री साडे सात वाजता खेळवले जातील. एलिमिनेटर सामना २४ मार्च रोजी डीवाय पाटील स्टेडियमवर खेळवला जाईल.
• हिला आयपीएलसाठी सोमवारी (१४ फेब्रुवारी) लिलाव प्रक्रिया पार पडली. यामध्ये भारतीय महिला क्रिकेट संघाची उपकर्णधार स्मृती मंधानासाठी रॉयल चॅलेंजर्स बंगळुरु संघाने सर्वाधिक रक्कम मोजली आहे. बंगळुरु संघाने मंधानाला संघात घेण्यासाठी तब्बल तीन कोटी ४० लाख रुपये मोजले आहेत. मंधानाची बेस प्राईज ५० लाख रुपये होती.

100 व्या कसोटीपूर्वी पंतप्रधान मोदींनी चेतेश्वर पुजाराला दिला विजयाचा मंत्र

• भारत विरुद्ध ऑस्ट्रेलिया कसोटी मालिकेत टीम इंडिया १-०ने पुढे आहे. शुक्रवारपासून दिल्लीत दुसरी कसोटी खेळली जाणार असून कसोटी विशेषज्ञ चेतेश्वर पुजारासाठी हा सामना खूप खास आहे. ही त्याची १००वी कसोटी असेल आणि या विक्रमाला स्पर्श करण्यापूर्वी त्याने पंतप्रधान नरेंद्र मोदी यांची भेट घेतली आहे. या बैठकीची छायाचित्रेही बीसीसीआयने शेअर केली आहेत. विशेष सामन्यापूर्वी पीएम मोदींनी पुजाराला शुभेच्छाही दिल्या. या भेटीत क्रिकेटपटूची पत्नी पूजाही त्याच्यासोबत होती.
• ३५ वर्षीय मिस्टर डिपेंडंट पुजारा म्हणाला की, “त्याने निवृत्तीची तारीख निश्चित केलेली नाही आणि त्याला एकावेळी एका सामन्यावर लक्ष केंद्रित करायचे आहे. अजून माझ्यात खूप क्रिकेट बाकी आहे.” कसोटी सामन्यापूर्वी पुजारा आणि त्याची पत्नी पूजा यांनी मंगळवारी पंतप्रधान नरेंद्र मोदी यांची भेट घेतली. पुजाराने ट्विट केले की, “आमचे पंतप्रधान नरेंद्र मोदीजी यांना भेटणे हा एक सन्मान होता. माझ्या १००व्या कसोटीपूर्वी मी तुमच्याकडून मिळालेल्या प्रोत्साहनासाठी आभारी आहे. धन्यवाद PMOIndia!” ट्विटला उत्तर देताना पंतप्रधान मोदींनी लिहिले, “आज पूजा आणि तुला भेटून आनंद झाला. तुझ्या १००व्या कसोटीसाठी आणि तुझ्या कारकिर्दीसाठी खूप खूप शुभेच्छा.”
• पंतप्रधान नरेंद्र मोदी यांच्या भेटीदरम्यान चेतेश्वर पुजाराची पत्नी पूजाही त्यांच्यासोबत होती. काही दिवसांपूर्वी या जोडप्याने त्यांच्या लग्नाचा १०वा वाढदिवस साजरा केला. पीएम मोदींची भेट घेतल्यानंतर पुजाराने ट्विट केले की, “पंतप्रधानांना भेटून मला खूप आनंद झाला. त्याच्याशी छान गप्पा झाल्या.” पीएम मोदींनीही ट्विटला उत्तर दिले आणि भविष्यासाठी आणि १००व्या कसोटी सामन्यासाठी शुभेच्छा दिल्या. बीसीसीआयनेही हे ट्विट पुन्हा शेअर केले आहे.

भारतात ‘या’ दिवशी लॉन्च होणार Xiaomi 13 Pro, DSLR ला टक्कर देणार ५० मेगापिक्सलचा कॅमेरा

• Xiaomi ही एक लोकप्रिय मोबाईल उत्पादक कंपनी आहे. Xiaomi कंपनी लवकरच भारतीय बाजारपेठेत आपला आणखी एक स्मार्टफोन लॉन्च करणार आहे . शाओमी कंपनीने Xiaomi 13 Pro बद्दल माहिती दिली आहे. कंपनी आपला फ्लॅगशिप स्मार्टफोन लवकरच लॉन्च करणार असून त्यापूर्वीच याचे फीचर्स समोर आले आहेत.
• Xiaomi 13 Pro चे स्पेसिफिकेशन - सध्या Xiaomi कडून Xiaomi 13 Pro च्या स्पेसिफिकेशनबाबत कोणतीही माहिती देण्यात आलेली नाही. मात्र हा फोन लॉन्च होण्यापूर्वीच त्याचे फीचर्स लॉन्च झाले आहेत. कंपनीने आपल्या स्थानिक बाजारात हा फोन लॉन्च केला असून भारतात देखील त्याच फीचर्स आणि स्पेसिफिकेशनसोबत लॉन्च होणार आहे. आपण याच्या चायना व्हेरिएंटमध्ये बोलायचे झाल्यास त्यामध्ये स्नॅपड्रॅगन 8 जनरेशन 2 हा प्रोसेसर असणार आहे. यामध्ये ६.७३ इंचाचा 2K AMOLED डिस्प्ले मिळतो. त्यामध्ये 12 GB LPDDR5X RAM दिली जाईल आणि 256 GB अंतर्गत स्टोरेज उपलब्ध असणार आहे.
• कसा असणार कॅमेरा - Xiaomi 13 Pro मध्ये कंपनी तुम्हाला DSLR कमरेच्या लेव्हलचा कॅमेरा देणार आहे. भारतात येणाऱ्या फोनचा कॅमेरा Leica ब्रॅंडिंगसह येणार आहे. त्यामध्ये मागील बाजूस ट्रिपल कॅमेरा सेटअप आहे. ज्यात ५० मेगापिक्सलचे तीन कॅमेरे असतील. तसेच वापरकर्त्यांना यामध्ये OIS फिचर देखील मिळेल ज्यामुळे तुम्ही यामधून स्मूथ व्हिडीओ रेकॉर्डिंग करू शकणार तसेच या फोनला ३२ मेगापिक्सलचा सेल्फी कॅमेरा येणार आहे.

भारत-पाकिस्तान सीमेवर छत्रपती शिवाजी महाराजांचा पुतळा; भूमिपूजनासाठी महाराष्ट्रातील गड-किल्ल्यांची माती नेणार

शत्रूंशी लढणाऱ्या जवानांना छत्रपती शिवाजी महाराजांचा आदर्श आणि नैतिक मूल्ये त्यांच्या पुतळ्याकडे पाहून दररोज मिळावीत तसेच शिवरायांचे शौर्य स्मरून शत्रूंसोबत लढण्याचे बळ मिळावे, यासाठी आम्ही पुणेकर संस्थेच्या वतीने छत्रपती शिवाजी महाराजांचा पुतळा थेट भारत-पाकिस्तानच्या सीमेवर उभारण्यात येणार आहे. काश्मीरच्या किरण आणि तगधर-टिटवाल खोऱ्यात दोन ठिकाणी नियंत्रण रेषेजवळ छत्रपती शिवाजी महाराजांच्या पुतळ्याची प्रतिकृती स्थापन करण्यात येणार आहे.

• भारतीय अंतराळ संशोधन संस्थेने (इस्रो) सोमवारी ईओएस-०४ या भूनिरीक्षण उपग्रहासह दोन लहान उपग्रहांचे पीएसएलव्ही-सी ५२ क्षेपणास्त्राच्या साहाय्याने अंतराळात यशस्वी प्रक्षेपण केले. २०२२ सालातील या पहिल्याच प्रक्षेपण मोहिमेचे वर्णन इस्रोने ‘अद्भुत पूर्तता’ असे केले.

• पहाटेच्या अंधारातच ५ वाजून ५९ मिनिटांनी उपग्रहांचे प्रक्षेपण करण्यात आले. सुमारे १९ मिनिटांच्या उड्डाणानंतर पीएसएलव्ही या प्रक्षेपण यानाने तिन्ही उपग्रहांना निर्धारित कक्षेत प्रस्थापित केले, त्यावेळी या मोहिमेचे बारकाईने निरीक्षण करत असलेल्या शास्त्रज्ञांनी टाळय़ा वाजवून आनंद व्यक्त केला.

• सकाळी ६ वाजून १७ मिनिटांनी सर्वप्रथम ईओएस-०४ प्रक्षेपण यानापासून वेगळे झाल्यानंतर इन्स्पायरसॅट-१ व आयएनएस-२ टीडी या लहान उपग्रहांनाही त्यांच्या कक्षेत प्रस्थापित करण्यात आले. मोहिमेचे उद्दिष्ट पूर्णपणे साध्य झाल्याचे इस्रोचे अध्यक्ष एस. सोमनाथ यांनी या यशस्वी प्रक्षेपणानंतर सांगितले. अंतरिक्ष खात्याचे सचिव आणि अंतरिक्ष आयोगाचे अध्यक्ष म्हणून अलीकडेच सूत्रे स्वीकाल्यानंतर आजही ही पहिलीच मोहीम होती.

• १७१० किलोग्रॅम वजनाचा आणि दहा वर्षांचे आयुष्य असलेला ईओएस-४ हा सर्व प्रकारच्या वातावरणात शेती, वनीकरण व वृक्षलागवड, जलविज्ञान आणि पूर आरेखन यांसारख्या कामांसाठी उच्च दर्जाच्या प्रतिमा मिळवण्यासाठी तयार करण्यात आलेला रडार इमेजिंग उपग्रह आहे.

• पंतप्रधान नरेंद्र मोदी यांनी या यशस्वी मोहिमेबद्दल देशातील अंतरिक्ष शास्त्रज्ञांचे अभिनंदन केले आहे.

• युक्रेनवर रशिया हल्ला करण्याची शक्यता आहे, असे इशारे अमेरिका आदी मित्रराष्ट्रांकडून वारंवार दिले जात असले तरी युक्रेनचे अध्यक्ष वोलोदिमिर झेलेन्सकी यांनी ते गांभीर्याने घेतलेले नाही. रशियाचे आणखी काही सैनिक युक्रेनच्या सीमेनजीक आल्याचे रविवारी अमेरिकेने म्हटले असले तरी, रशियाच्या अशा हेतूबाबत अद्याप ठोस पुरावा दिसून येत नाही, असे झेलेन्सकी यांनी म्हटले आहे. 

• दरम्यान, या घडामोडींच्या पार्श्वभूमीवर काही विमान कंपन्यांनी त्यांची युक्रेनच्या सीमाभागातून होणारी उड्डाणे रद्द केली आहेत, किंवा त्यांचा मार्ग बदलला आहे. 

• रशियाच्या फौजांनी युक्रेनभोवती तीन बाजूंनी जमवाजमव केली असून हा एका लष्करी सरावाचा भाग आहे, असे रशियाचे म्हणणे आहे. या स्थितीत युक्रेनच्या नागरिकांनी शांत राहावे, असे झेलेन्सकी सातत्याने सांगत आहेत.  गेल्या आठवडाभरापासून रशियाच्या या हालचालींबाबत अमेरिकेचे अधिकारी युक्रेनला सावधगिरीचा इशारा देत आहेत. येत्या आठवडय़ाच्या आतच रशियाचे युक्रेनवर आक्रमण होईल, असा त्यांचा दावा आहे. पण तो मानण्यास झेलेन्सकी उघडपणे तयार नाहीत.

• गुप्तचर सूत्रांच्या हवाल्याने अमेरिकेच्या अधिकाऱ्यांनी म्हटले आहे की, युक्रेनवर बुधवारी रशिया चाल करणे अपेक्षित आहे.

• भारतीय सुरक्षेला बाधक ठरणाऱ्या ५४ चिनी मोबाइल अ‍ॅपवर बंदी घालण्याचा निर्णय केंद्रीय गृहमंत्र्यांनी सोमवारी घेतला. इलेक्ट्रॉनिक्स आणि माहिती तंत्रज्ञान मंत्रालयालाने या अ‍ॅपवर भारतात बंदी घालण्याची औपचारिक अधिसूचना जारी करण्याच्या सूचना देण्यात आल्या आहेत.

•  बंदी घातलेल्या अ‍ॅपमध्ये स्वीट सेल्फी एचडी, ब्युटी कॅमेरा, म्युझिक प्लेअर, म्युझिक प्लस, व्हॉल्यूम बूस्टर, व्हिडीओ प्लेअर मीडिया, विवा व्हिडीओ एडिटर, नाइस व्हिडीओ बायडू, अ‍ॅपलॉक, अ‍ॅस्ट्राक्राफ्ट यासंह विविध अ‍ॅपचा समावेश आहे.

• चिनी मोबाइल अ‍ॅपवर दुसऱ्यांदा कारवाई करण्याचा निर्णय केंद्र सरकारने घेतला आहे. जून २०२१मध्ये सरकारने ५९ चिनी अ‍ॅपवर बंदी घालण्याचा निर्णय घेतला होता. टिकटॉक, यूसी ब्राऊझर, वुईचॅट, बिगो लाइव्ह यांसह विविध अ‍ॅपचा यामध्ये समावेश होता. हे अ‍ॅप देशाची सुरक्षा, अखंडता आणि सार्वभौमत्व यांस प्रतिकुल असल्याचे त्यावेळी सरकारने सांगितले होते.

• राज्यातील करोना संसर्गाची तिसरी लाट आता ओसरली आहे. दररोज आढळणारी नवीन करोनाबाधितांची संख्या आता कमी झाली आहे. आज (सोमवार) दिवसभरात राज्यात १ हजार ९६६ नवीन करोनाबाधित आढळून आले आहेत. तर, राज्यातील रूग्ण बरे होण्याचे प्रमाण (रिकव्हरी रेट) ९७.६६ टक्के एवढे झाले आहे.

• आज ११ हजार ४०८ रुग्ण बरे होऊन घरी परतले आहेत. राज्यात आजपर्यंत एकूण ७६,६१,०७७ करोनाबाधित रुग्ण बरे होऊन घरी परतले आहेत. तर, राज्यात आज १२ करोना बाधित रुग्णांच्या मृत्यूंची नोंद झाली आहे. सध्या राज्यातील मृत्यूदर १.८२ टक्के एवढा आहे.

• आजपर्यंत तपासण्यात आलेल्या ७,६५,२७,८९५ प्रयोगशाळा नमुन्यांपैकी ७८,४४,९१५ (१०.२५ टक्के) नमुने पॉझिटिव्ह आले आहेत. सध्या राज्यात ३,४८,४०८ व्यक्ती होम क्वारंटाईनमध्ये आहेत तर ८१५ व्यक्ती संस्थात्मक क्वारंटाईनमध्ये आहेत.

• वेस्ट इंडिज आणि दक्षिण आफ्रिकेचे खेळाडू मार्च-एप्रिल महिन्यात होणाऱ्या इंडियन प्रीमियर लीगच्या (आयपीएल) पूर्ण हंगामासाठी उपलब्ध असतील.

• यंदा २७ मार्चपासून मुंबई आणि पुणे येथे ‘आयपीएल’चा १५वा हंगाम खेळवण्यात येण्याची शक्यता असून ऑस्ट्रेलिया, इंग्लंडचे काही नामांकित खेळाडू विविध दौरे तसेच वैयक्तिक कारणांमुळे स्पर्धेतील काही सामन्यांना मुकण्याची शक्यता आहे. परंतु दक्षिण आफ्रिका क्रिकेट मंडळ आणि वेस्ट इंडिज क्रिकेट मंडळाने आपापल्या खेळाडूंना संपूर्ण ‘आयपीएल’ खेळण्याची मुभा दिली आहे. यंदाच्या हंगामात विंडीजचे १७, तर आफ्रिकेचे ११ खेळाडू सहभागी होणार आहेत.

• शिखर धवनकडे पंजाब किंग्ज संघाचे नेतृत्व सोपवण्यात येणार आहे, अशी माहिती विश्वसनीय सूत्रांनी दिली. ३६ वर्षीय धवनला पंजाबने लिलावादरम्यान ८.२५ कोटी रुपयांची बोली लावून संघात सामील केले. ‘‘धवनच्या रूपात अनुभवी खेळाडूचा संघात समावेश केल्यामुळे आम्ही आनंदी आहोत. आम्हाला आमचा कर्णधार मिळाला आहे. पुढील आठवडय़ाभरात याविषयी अधिकृत घोषणा करण्यात येईल,’’ असे पंजाबच्या संघ व्यवस्थापनातील सदस्याने सांगितले.