चालू घडामोडी आणि दिनविशेष - 07 एप्रिल 2023

• अमेरिकेचे राष्ट्राध्यक्ष जो बायडन यांनी AI बद्दल चिंता व्यक्त केली आहे. बायडेन म्हणाले की, AI समाजासाठी धोकादायक ठरू शकतो. मात्र टेक्नॉलॉजी समाजाला कसे प्रभावित करेल हे पाहणे बाकी आहे. याआधी ट्विटरचे सीईओ एलॉन मस्क आणि Apple चे सह-संस्थापक यांनी AI बद्दल चिंता व्यक्त केली होती. मस्क यांनी तर शक्तिशाली AI चा विकास थांबवण्याचा इशाराही दिला आहे.

काय म्हणाले जो बायडेन

• विज्ञान आणि तंत्रज्ञानावरील अध्यक्षांच्या सल्लागार परिषदेच्या बैठकीच्या उद्घाटनप्रसंगी बायडेन म्हणाले की, त्यांची प्रॉडक्ट्स लोकांसाठी लॉन्च करण्यापूर्वी सुरक्षित आहेत याची खात्री करणे ही टेक कंपन्यांची जबाबदारी आहे. एआय धोकादायक आहे का असे विचारले असता बायडेन म्हणाले ते “पाहायचे बाकी आहे” परंतु “ते धोकादायक असू शकते”. याबाबतचे वृत्त रॉयटर्स वृत्तसंस्थेने दिले आहे.
• तसेच जो बायडेन पुढे म्हणाले, AI रोग आणि हवामान बदल यासारख्या आव्हानांना तोंड देण्यास मदत करू शकते. मात्र टेक्नॉलॉजीच्या विकसकांनी “आपल्या समाजासाठी, आपल्या अर्थव्यवस्थेसाठी, आपल्या राष्ट्रीय सुरक्षेसाठी संभाव्य जोखीम” पाहणे आणि संबोधित करणे आवश्यक आहे.
• मानवी-प्रतिस्पर्धी बुद्धिमत्तेसह AI सिस्टीम समाज आणि मानवतेसाठी गंभीर धोका निर्माण करू शकतात. तज्ज्ञांचे म्हणणे आहे की शक्तिशाली AI सिस्टीम केवळ तेव्हाच विकसित केली पाहिजे जेव्हा खात्री असेल की त्याचा प्रभाव सकारात्मक असेल आणि त्यांचे धोके नियंत्रित केले जाऊ शकतात. त्यामुळे अनेक टेक दिग्गजांनी AI बंदीची मागणी केली आहे.

• भारतात चित्रपट, राजकारण आणि क्रिकेट या तीन गोष्टींना प्रचंड महत्त्व आहे. यापैकी क्रिकेट हा सर्व भारतीयांचा धर्मच आहे, आणि याच धर्मातला एक जबरदस्त लोकप्रिय असा एक सण सध्या सुरू आहे तो म्हणजे ‘आयपीएल‘.
• एकेकाळी क्रोमासारख्या बड्या शोरुमच्या बाहेर वेड्यासारखी गर्दी करून क्रिकेट पाहणाऱ्या क्रिकेटप्रेमींचा जत्था हा आता आपआपल्या घरी ६ इंचाच्या मोबाईल समोर मान तुकवून या आयपीएल सामन्यांचा ‘फूल एचडी’मध्ये आनंद लुटत आहे. हे सगळं घडवून आणलं ते उद्योगविश्वातील दिग्गज मुकेश अंबानी आणि त्यांच्या जिओ या कंपनीने. सध्या जिओच्या माध्यमातून संपूर्ण आयपीएल विनामूल्य दाखवण्यात येत आहे.
• २०२३ ते २०२७ पर्यंतचे ‘आयपीएल’ प्रसारणाचे हक्क बीसीसीआयने काही टप्प्यात विभागले. टेलिव्हिजनचे हक्क हे स्टार या चॅनलला मिळाले तर डिजीटल हक्क हे व्हायकॉम १८ या कंपनीला मिळाले.
• हे हक्क मिळवण्यासाठी व्हायाकॉम १८ ने २३ हजार ७५८ कोटी खर्च केले. पण देशातील सर्वांना हा एवढा मोठा खेळ फुकटात दाखवणं नेमकं कसं काय परवडतं? जिओला त्याचा नेमका काय आणि कसा फायदा होणार आहे ते आपण जाणून घेऊया!

• येत्या १० मे रोजी होणाऱ्या कर्नाटक विधानसभा निवडणुकीसाठी ४१ उमेदवारांची दुसरी यादी काँग्रेसने गुरुवारी जारी केली. अलीकडेच आमदारकीचा राजीनामा देऊन काँग्रेसमध्ये प्रवेश केलेल्या तिघांचा यादीत समावेश आहे.पक्षाचे ज्येष्ठ नेते व माजी मुख्यमंत्री सिद्धरामय्या जेथून लढू इच्छितात त्या कोलार मतदारसंघाचा, तसेच जेथून त्यांच्या नावाला याआधीच पसंती मिळाली आहे त्या वरुणा मतदारसंघाचा या यादीत उल्लेख नाही.
• भाजपच्या विधान परिषद आणि विधानसभा आमदारकीचा अलीकडेच राजीनामा देऊन काँग्रेसमध्ये प्रवेश केलेले बाबुराव चिंचनसुर व एन.वाय. गोपालकृष्ण यांना अनुक्रमे गुरुमठकल व मोळकाल्मुरू मतदारसंघांतून उमेदवारी देण्यात आली आहे. जद (एस) पक्षाची आमदारकी सोडलेले एस.आर. श्रीनिवास यांना गुब्बी येथून रिंगणात उतरवण्यात आले आहे. गोपालकृष्ण हे सध्याच्या विधानसभेत विजयनगर जिल्ह्यातील कुडलिगी मतदारसंघातील भाजपचे आमदार होते.
• मंडय़ा जिल्ह्यातील मेलुकोटेची जागा काँग्रेसने सर्वोदय कर्नाटक पक्षाचे दर्शन पुत्तनैया यांच्यासाठी सोडली आहे. शिग्गांव मतदारसंघात मुख्यमंत्री बसवराज बोम्मई यांच्याशी लढत देतील अशी काहीजणांची अपेक्षा असलेले माजी मंत्री विनय कुलकर्णी यांना धारवाडमधून निवडणूक लढण्यास सांगण्यात आले आहे.माजी मुख्यमंत्री धरम सिंह यांचे पुत्र विजय धरम सिंह यांना बसवकल्याणमधून तिकीट मिळाले आहे.

• सध्या जगभरामध्ये आर्थिक मंदीचे कारण देत अनेक दिग्गज टेक कंपन्यांनी आपल्या कर्मचाऱ्यांची कपात केली आहे. एका बाजूने नोकऱ्यांची संख्या कमी होत असतानाच कर्मचारी कपातीचा वेग दुपटीने वाढला आहे. गेल्या वर्षभरामध्ये अनेक आघाडीच्या कंपन्यांनी आपल्या हजारो कर्मचाऱ्यांची कपात केली आहे. यामध्ये Twitter, Meta आणि Apple, Amazon अशा आघाडीच्या कंपन्यांचा समावेश आहे. Amazon ने आपल्या दुसरी फेरीतील कपात देखील केली आहे.  आता ग्रोसरी डिलिव्हरी करणारी कंपनी Dunzo बाबत एक मोठी बातमी समोर येत आहे. या कंपनीमधील अनेक कर्मचाऱ्यांवर कपातीची टांगती तलवार आहे. कारण कंपनी आपल्या कर्मचाऱ्यांनी कपात करणार आहे.

• भारतातील बंगळुरू स्थित स्टार्टअप कंपनी Dunzo पुन्हा एकदा आपल्या अनेक कर्मचाऱ्यांना कामावरून कमी करणार आहे. रिलायन्स रिटेलच्या सहकार्याने चालणारी ही कंपनी आपल्या ३० टक्के कर्मचाऱ्यांची कपात करणार आहे. इकॉनॉमिक टाइम्सच्या रिपोर्टनुसार किराणा वितरित करणारी Dunzo कंपनी आपल्या ३०० कर्मचाऱ्यांची कपात करणार आहे.

• रिपोर्टनुसार Dunzo कंपनीचे संस्थापक आणि सीईओ कबीर बिस्वास यांनी ५ टाऊनहॉल येथे ५ एप्रिल रोजी झालेल्या बॅबिटकीत कर्मचाऱ्यांना कपातीच्या नवीन फेरीबद्दल माहिती दिली. तथापि, डंझोने अद्याप टाळेबंदीच्या नवीन फेरीबद्दल कोणतीही अधिकृत पुष्टी केलेली नाही. नोव्हेंबर २०२२ मध्ये कंपनीने दिल्ली-एनसीआरसह आसपासच्या अनेक भागात आपले काही डार्क स्टोअर्स बंद केले होते. या डार्क स्टोअर्स टीममधून कंपनीने २५ ते ३५ टक्के कर्मचारी काढून टाकले होते. कामावरून काढून टाकण्यात आलेल्या कर्मचाऱ्यांमध्ये कायमस्वरूपी आणि हंगामी अशा दोन्ही कर्मचाऱ्यांचा समावेश करण्यात आल्याचे सांगण्यात येत आहे.

• भारताची तारांकित महिला ग्रँडमास्टर बुद्धिबळपटू कोनेरू हम्पी करोनाच्या भीतीमुळे या वर्षी चीनमध्ये होणाऱ्या आशियाई क्रीडा स्पर्धेत खेळण्याबाबत साशंक आहे. हम्पीने यापूर्वी आशियाई क्रीडा स्पर्धेत दोन सुवर्णपदके पटकावली आहेत.२०२०मध्ये चीन येथेच करोनाचे रुग्ण सर्वप्रथम सापडले होते. येथूनच करोनाचा जगभरात प्रसार झाला. जागतिक आरोग्य संघटनेच्या (डब्ल्यूएचओ) माहितीनुसार, ३ जानेवारी २०२० ते ५ एप्रिल २०२३ या कालावधीत चीनमध्ये ९ कोटी ९२ लाख ३८ हजार ५८६ करोनाचे रुग्ण सापडले असून १ लाख २० हजार ८९६ जणांचा करोनामुळे मृत्यू झाला आहे. परंतु गेल्या २४ तासांत चीनमध्ये नव्या करोनाबाधितांची नोंद झालेली नाही. असे असले तरी हम्पी चीनमध्ये जाणे टाळण्याची शक्यता आहे.
• चीनमधील हांगझोऊ येथे गेल्या वर्षी आशियाई क्रीडा स्पर्धा आयोजित केली जाणार होती. मात्र, करोनाच्या प्रादुर्भावामुळे ही स्पर्धा एका वर्षांने लांबणीवर पडली. आता या वर्षी होणाऱ्या आशियाई क्रीडा स्पर्धेत तब्बल १३ वर्षांनंतर बुद्धिबळ खेळाचे पुनरागमन होणार आहे. या स्पर्धेबाबत विचारले असता हम्पी म्हणाली, ‘‘आशियाई क्रीडा स्पर्धा चीनमध्ये आयोजित केली जाणार असल्याने माझ्या सहभागाबाबत साशंकता आहे.’’
• ‘‘चीनमध्ये ही स्पर्धा होणार असल्याने त्यात खेळायचे की नाही, याबाबत मी साशंक आहे. जून-जुलैपर्यंत मी अंतिम निर्णय घेईन. करोनाच्या भीतीमुळे मला या स्पर्धेतील सहभागाबाबत विचार करावा लागतो आहे. मी आशियाई क्रीडा स्पर्धेत खेळण्यासाठी खूप उत्सुक होते. परंतु ही स्पर्धा चीनमध्ये होणार असल्याचे शल्य आहे,’’ असे ३६ वर्षीय हम्पीने सांगितले.
• यंदा २३ सप्टेंबरपासून खेळवल्या जाणाऱ्या स्पर्धेसाठी हम्पी आणि द्रोणावल्ली हरिका यांचे भारतीय बुद्धिबळ संघातील स्थान निश्चित मानले जात होते. गेल्या वर्षी महाबलीपूरम येथे झालेल्या ऑलिम्पियाड स्पर्धेत ऐतिहासिक कांस्यपदक जिंकणाऱ्या भारतीय महिला संघात हम्पीचा समावेश होता. त्यामुळे तिने आशियाई स्पर्धेतून माघार घेतल्यास भारतासाठी हा मोठा धक्का असेल.

चालू घडामोडी आणि दिनविशेष - 07 एप्रिल 2022

०७ एप्रिल चे दिनविशेष पाहण्यासाठी (येथे क्लिक करा)