चालू घडामोडी आणि दिनविशेष - 03 नोव्हेंबर 2023

Date : 3 November, 2023 | MahaNMK.com

आपल्या मित्रांना पाठवा :
सचिन तेंडुलकरचा १६ वर्षे जुना विश्वविक्रम मोडण्यासाठी विराट सज्ज, फक्त ‘इतक्या’ धावांची आहे गरज
  • विराट कोहलीसाठी २०२३ चा विश्वचषक आत्तापर्यंत चांगलाच ठरला आहे. या स्पर्धेत भारताकडून सर्वाधिक धावा करणारा विराट हा दुसरा फलंदाज ठरला आहे. इंग्लंडविरुद्धच्या गेल्या सामन्यात विराट कोहली शून्यावर बाद झाला होता, आता हे विसरून विराटला पुन्हा एकदा मोठी खेळी खेळायला आवडेल. त्याचवेळी, श्रीलंकेसोबतच्या आजच्या सामन्यात विराट कोहलीच्या नावावर भारताचा माजी सलामीवीर सचिन तेंडुलकरचा खास विक्रम आहे. विराट हा विक्रम मोडण्यापासून फक्त ३४ धावा दूर आहे.

एका कॅलेंडर वर्षात सर्वाधिक वेळा हजार धावा करण्याचा विक्रम -

  • एका कॅलेंडर वर्षात सर्वाधिक १००० धावा करण्याच्या बाबतीत सचिन तेंडुलकर पहिल्या क्रमांकावर आहे. त्याने सात वेळा हा पराक्रम केला आहे. याशिवाय विराट कोहलीने एका कॅलेंडर वर्षात सात वेळा एक हजारहून अधिक धावा केल्या आहेत. आज श्रीलंकेविरुद्धच्या सामन्यात विराट कोहलीला या बाबतीत सचिन तेंडुलकरला मागे टाकण्याची सुवर्णसंधी आहे. या वर्षी विराट कोहलीने आंतरराष्ट्रीय क्रिकेटमध्ये ९६६ धावा केल्या आहेत.

विराटने एक हजार धावा कधी-कधी केल्या आहेत?

  • वर्ष २०११: ३४ सामन्यांमध्ये ४७.६२च्या सरासरीने १३८१ धावा (४ शतके आणि ८ अर्धशतके)
  • वर्ष २०१२: १७ सामन्यात ६८.४०च्या सरासरीने १०२६ धावा (५ शतके आणि ३ अर्धशतके)
  • वर्ष २०१३: ३४ सामन्यात ५२.८३ च्या सरासरीने १२६८ धावा (४ शतके आणि ७ अर्धशतके)
  • वर्ष २०१४: २१ सामन्यांमध्ये ५८.५५ च्या सरासरीने १०५४ धावा (४ शतके आणि ५ अर्धशतके)
  • वर्ष २०१७: २६ सामन्यांमध्ये ७६.८४ च्या सरासरीने १४६० धावा (६ शतके आणि ७ अर्धशतके)
  • वर्ष २०१८: १४ सामन्यात १३३.५५ च्या सरासरीने १२०२ धावा (६ शतके आणि ३ अर्धशतके)
  • वर्ष २०१९: २६ सामन्यांमध्ये ५९.८६ च्या सरासरीने १३७७ धावा (५ शतके आणि ७ अर्धशतके)
धर्माचे अधिष्ठान दिल्यास नव्या संस्कृतीची ओळख ; राज्यपालांचे प्रतिपादन
  • महाराष्ट्राचे राज्यपाल रमेश बैस यांच्या पुढाकाराने राजभवनात छत्तीसगड, मध्य प्रदेश, आंध्र प्रदेश, हरियाणा , कर्नाटक, केरळ, पंजाब व तमिळनाडू या राज्यांचा तसेच पाच केंद्रशासित प्रदेशांचा स्थापना दिन बुधवारी साजरा करण्यात आला. धर्माचे अधिष्ठान दिल्यास वेगवेगळय़ा राज्यांतील नव्या संस्कृतीची ओळख होईल, असे प्रतिपादन राज्यपालांनी केले. 
  • राज्यपाल म्हणाले की, आद्य शंकराचार्यानी संपूर्ण देशाला समान संस्कृतीच्या धाग्याने जोडण्याच्या उद्देशाने देशाच्या वेगवेगळय़ा दिशांना चार मठांची स्थापना केली. धर्माचे अधिष्ठान दिल्यास लोक एका भागातून दुसऱ्या भागात पर्यटनाला जातील व त्यातून त्यांना नव्या संस्कृतीची ओळख होईल.
  • ‘एक भारत, श्रेष्ठ भारत’ हा उपक्रम देखील प्रत्येक राज्याने इतर राज्यांची संस्कृती जाणून घ्यावी, या हेतूने सुरू केल्याचे त्यांनी सांगितले.राज्यपालांच्या हस्ते यावेळी ज्येष्ठ तेलुगू अभिनेते सुमन तलवार, चित्रोत्पला लोक कला परिषदेचे संचालक राकेश तिवारी, तेलुगू कला समितीचे एम.के. रेड्डी आणि कुचीपुडी नृत्यांगना नादिया यांचा सत्कार करण्यात आला.
महिलांना दरमहा ४,००० पर्यंत लाभ शक्य! राहुल गांधी यांचे तेलंगणात आश्वासन
  • तेलंगणा विधानसभा निवडणुकीत काँग्रेसला सत्ता मिळाली तर महिलांना दरमहा चार हजार रुपयांपर्यंत लाभ मिळू शकेल, असे आश्वासन पक्षाचे नेते राहुल गांधी यांनी गुरुवारी दिले. काँग्रेस सत्तेत आल्यास महिलांना सामाजिक पेन्शन, स्वयंपाकाच्या गॅस सिलिंडरवर बचत आणि सरकारी बसमधून मोफत प्रवास दिला जाईल असे राहुल म्हणाले.
  • तेलंगणातील कालेश्वरम प्रकल्पाच्या मेदिगड्डा धरणाजवळ अंबातीपल्ली येथे महिलांच्या मेळाव्यात बोलताना राहुल यांनी काँग्रेसला मतदान करण्याचे आवाहन केले. तेलंगणामध्ये बीआरएस सरकारने १ लाख कोटी रुपयांची लूट केल्याचा आरोप त्यांनी केला. राज्याचे मुख्यमंत्री के चंद्रशेखर राव यांनी कथितरीत्या ‘लुटलेला’ सर्व पैसा लोकांना परत देण्याचा निर्णय काँग्रेसने घेतला आहे असे ते म्हणाले. मुख्यमंत्र्यांच्या भ्रष्टाचारामुळे तेलंगणातील महिलांना सर्वाधिक फटका बसला, असा आरोपही राहुल यांनी  केला.
  • चार हजार रुपयांचा हिशेब मांडताना राहुल यांनी सांगितले की, सामाजिक पेन्शन म्हणून महिलांच्या बँक खात्यात दरमहा २,५०० रुपये जमा केले जातील. सध्या एक हजार रुपयांना मिळणारा गॅस सिलिंडर ५०० रुपयांना दिला जाईल आणि सरकारी बसमध्ये प्रवास करून दरमहा एक हजार रुपये वाचतील, अशा प्रकारे महिलांना दरमहा चार हजार रुपयांपर्यंत लाभ मिळू शकतो असे ते म्हणाले.
पडत्या रुपयाची नीचांकी लोळण
  • डॉलरच्या तुलनेत रुपयात घसरण झाली असून रुपयाने ८३.३३ असा नवीन नीचांक बुधवारी नोंदविला. डॉलरमागे आणखी ९ पैशांनी घसरून इतिहासात प्रथमच रुपयाने ८३.३५ ही नीचांकी पातळी दिवसातील व्यवहारात गाठली. भांडवली बाजारात परदेशी संस्थात्मक गुंतवणूकदारांकडून अविरतपणे समभाग विक्रीचा मारा कायम आहे. परिणामी देशांतर्गत भांडवली बाजारातदेखील घसरण झाल्याने रुपया अधिक कमजोर झाला आहे. याचबरोबर पश्चिम आशियातील भू-राजकीय अनिश्चिततेमध्ये खनिज तेलाच्या किमती वाढल्याने जगभरातील भांडवली बाजारावर त्याचे पडसाद उमटले आहेत.
  • आंतरबँक परकीय चलन बाजारात बुधवारच्या सत्रात रुपयाने ८३.२६ या नीचांकापासून व्यवहारास सुरुवात केली. दिवसअखेरीस ९ पैशांची तूट दर्शवत रुपयाचे मूल्य प्रति डॉलर ८३.३३ या सार्वकालिक नीचांकपदी जाऊन स्थिरावले. सत्रादरम्यान ते ८३.३५ पातळीपर्यंत गडगडले होते. मंगळवारच्या सत्रात रुपया ८३.२४ या पातळीवर स्थिरावले होते.
  • जगभरात सर्वत्रच बडय़ा गुंतवणूकदारांची जोखीमयुक्त मालमत्तांमधून माघार सुरू असून, तुलनेने सुरक्षित पर्यायांकडे त्यांचा पैसा वळला आहे. परिणामी सर्वच प्रमुख जागतिक चलनांचा मूल्य ऱ्हास सुरू आहे. अमेरिकेत रोख्यांच्या परतावा दरात सुरू असलेली उसळी हे अमेरिकी डॉलरला मिळत असलेल्या मजबुतीचेच प्रतिबिंब आहे.
ब्राझीलच्या साखरेचा जगाला दिलासा…जाणून घ्या कसे?
  • ब्राझीलमध्ये उसाची उपलब्धता चांगली असल्यामुळे गाळप हंगाम महिनाभर लांबण्याचा अंदाज आहे. यंदा ब्राझीलचे साखर उत्पादन ४२१ लाख टनांवर जाण्याचा अंदाज आहे. एल निनोमुळे जगभरातील अन्य देशांत साखर उत्पादनात घट होण्याचा अंदाज आहे. त्या पार्श्वभूमीवर जागतिक साखर बाजाराला ब्राझीलमधील उत्पादनामुळे काहीसा दिलासा मिळणार आहे.
  • आंतरराष्ट्रीय साखर संघटनेने (आयएसओ) दिलेल्या माहितीनुसार यंदा ब्राझीलमध्ये उसाची उपलब्धता चांगली आहे. साखर उताराही चांगला मिळत आहे. सामान्यपणे नोव्हेंबर महिन्यात ब्राझीलमधील गाळप हंगाम संपतो. यंदा तो एक महिना जास्त म्हणजे डिसेंबरअखेर चालण्याचा अंदाज आहे. मागील दोन वर्षे ब्राझील दुष्काळाच्या समस्येला सामोरे जात होता. त्याचा परिणाम साखर उत्पादनावर होत होता. मागील वर्षी ब्राझीलचे साखर उत्पादन ३८० लाख टनांवर थांबले होते. यंदा ४२०. ६० लाख टनांहून जास्त उत्पादन होण्याचा अंदाज आहे.
  • जागतिक साखर बाजारात तुटीची शक्यता जागतिक साखर संघटनेने व्यक्त केली आहे. यंदा जागतिक साखर बाजारात ४०.३६ लाख टन साखरेचा तुटवडा भासण्याची शक्यता आहे. जगभरात दर वर्षी सुमारे १६६८.९७० लाख टन साखरेचा वापर होतो. यंदा एल निनोमुळे आशियाई देशात साखर उत्पादनात घटीचा अंदाज आहे. थायलंडमध्ये दर वर्षी सुमारे ११० लाख टन उत्पादन होते. यंदा उत्पादन ८० लाख टनांपर्यंत जाण्याचा अंदाज आहे. एल निनोसह अन्य कारणांमुळे भारत, चीन, थायलंड, अमेरिका आणि युरोपीय देशांत साखर उत्पादनात घट होण्याचा अंदाज जागतिक साखर संघटनेने व्यक्त केला आहे.
  • साखर उत्पादन करणाऱ्या जगातील आघाडीच्या दहापैकी सहा देशांतील साखर उत्पादनाला एल निनोचा फटका बसणार आहे. ब्राझीलमधील साखर उत्पादनाचे आकडे दिलासादायक आहेत. यंदा ब्राझीलचे साखर उत्पादन ४२१ लाख टनांवर जाण्याचा अंदाज जागतिक साखर संघटनेने (आयएसओ) व्यक्त केला आहे.

 

चॅम्पियन्स लीग  फुटबॉल - बार्सिलोनाच्या विजयात टॉरेसची चमक :
  • फेरान टॉरेसच्या दोन गोलच्या जोरावर बार्सिलानने चॅम्पियन्स लीग फुटबॉलमध्ये व्हिक्टोरिया प्लाझान  संघावर ४-२ अशा फरकाने विजय मिळवला. बार्सिलोनाने आक्रमक सुरुवात केली. सहाव्याच मिनिटाला मार्कोस अलोन्सोने गोल झळकावत संघाला आघाडी मिळवून दिली. यानंतर टॉरेसने (४४व्या मि.) गोल करत संघाला मध्यांतरापर्यंत २-० अशा स्थितीत पोहोचवले.

  • दुसऱ्या सत्रात प्लाझानच्या टॉमस चॉरीने गोल करत आघाडी २-१ अशी कमी केली. टॉरेसने (५४व्या मि.) यानंतर प्रतिस्पर्धी संघाच्या बचावाला भेदत गोल झळकावत संघाला आघाडी ३-१ अशी केली. चॉरीने (६३व्या मि.) पुन्हा एकदा गोल करत आघाडी ३-२ अशी कमी केली. सामन्याच्या ७५व्या मिनिटाला पाब्लो टोरेने प्लाझानच्या बचावफळीला भेदत आघाडी ४-२ अशी भक्कम केली. संघाने अखेपर्यंत ही आघाडी कायम राखत विजय नोंदवला.

  • अन्य सामन्यात,  मोहम्मद सलाह आणि डार्विन न्युनेजने झळकावलेल्या गोलच्या जोरावर लिव्हरपूलने नापोलीवर २-० असा विजय मिळवला.

मराठा समाजाच्या विद्यार्थ्यांनाही वार्षिक ६० हजार निर्वाह भत्ता ; मंत्रिमंडळ उपसमितीच्या बैठकीत निर्णय :
  • मराठा समाजातील विद्यार्थ्यांना सामाजिक न्याय विभागाच्या निकषानुसार अनुसूचित जाती-जमाती, इतर मागास प्रवर्गातील विद्यार्थ्यांप्रमाणेच वर्षांला ६० हजार रुपये निर्वाह भत्ता देण्याचा निर्णय बुधवारी घेण्यात आला. मंत्रिमंडळ उपसमितीचे अध्यक्ष तथा उच्च व तंत्र शिक्षणमंत्री चंद्रकांत पाटील यांनी ही माहिती दिली.

  • छत्रपती शाहू महाराज संशोधन, प्रशिक्षण व मानव विकास संस्था (सारथी) या अंतर्गत वसतिगृह, शिष्यवृत्ती योजनांच्या अंमलबजावणीबाबत मंत्रिमंडळ उपसमितीच्या बैठकीत हा निर्णय घेण्यात आला.

  • मराठा समाजाच्या विद्यार्थ्यांसाठी सारथी संस्थेने सर्व जिल्ह्यांमध्ये डिसेंबरपासून १०० मुलांचे वसतिगृह सुरू होईल, याचे कालबद्ध नियोजन करण्याची सूचना पाटील यांनी केली. याबाबत विभागीय स्तरावर आढावा घेऊन या कामाला गती द्यावी, वसतिगृहासाठी आवश्यक नियमावली तयार करावी, यासाठी उच्च व तंत्र शिक्षण विभाग, सारथी, महाज्योती, संबंधित जिल्हाधिकारी यांनी एकत्रित बैठक घेऊन अंतिम नियमावली सादर करण्याचे आदेशही पाटील यांनी बैठकीत दिले.

  • मराठा समाजातील गुणवंत विद्यार्थी परदेशातील नामांकित विद्यापीठामधील उच्च शिक्षणापासून वंचित राहू नये, यासाठी ओबीसी विद्यार्थ्यांना लागू असलेल्या शिष्यवृत्तीप्रमाणे पदव्युत्तर पदवीसाठी प्रति वर्षी ३० लाख रुपयांच्या मर्यादेत आणि पीएचडीसाठी ४० लाख रुपयांच्या मर्यादेत परदेशी शिष्यवृत्ती योजना सुरू करण्याचा निर्णय घेण्यात आल्याचेही त्यांनी सांगितले.

फ्रान्सच्या नौदलाने दिली मुंबईला भेट :
  • गेल्या काही दशकांत भारत आणि फ्रान्स यांच्यातील संरक्षण क्षेत्राशी संबंधित सहकार्य वेगाने वाढले आहे. भारत आणि फ्रान्स या दोन देशांचे संबंध अधिक घट्ट करण्यासाठी फ्रान्स नौदलाच्या एकोनिट जहाजाने मुंबईतील नौदल विभागाला पाच दिवसीय सदिच्छा भेट दिली.

  • एकोनिट जहाजाचे कमांडर जीन-बर्ट्रांड गयॉन यांच्या नेतृत्वाखाली फ्रान्सच्या नौदलाने २८ ऑक्टोबर ते २ नोव्हेंबर या कालावधीत नौदलाच्या मुंबईतील तळाला भेट दिली. फ्रान्सचे नौदल अधिकारी आणि कर्मचाऱ्यांनी भारतीय नौदलाच्या अधिकारी आणि कर्मचाऱ्यांशी विविध व्यावसायिक आणि सामाजिक विषयांवर संवाद साधला. या भेटीचा समारोप भारतीय नौदलाच्या वेस्टर्न फ्लीटच्या युद्धनौकेसह समुद्रातील सरावाने झाला.

  • याप्रसंगी कमांडिंग ऑफिसर कमांडर गयॉन यांनी वेस्टर्न नौदल कमांडचे चीफ ऑफ स्टाफ व्हाइस ॲडमिरल कृष्णा स्वामीनाथन यांची भेट घेतली.

  • एकोनिट जहाजाची मुंबई भेट ही बाब दोन्ही नौदलांमधील वाढत्या सहकार्याचे आणि त्यांच्यातील वाढीव आंतरकार्यक्षमतेचे द्योतक आहे. शांतता आणि स्थिरता हे समान हिताचे असल्याने दोन्ही देशांचे नौदल त्यासाठी एकत्रितपणे काम करण्यास कटिबद्ध आहे, अशी माहिती भारतीय नौदल विभागाकडून देण्यात आली.

राज्यातील केंद्रीय मंत्र्यांकडे १६ लोकसभा मतदारसंघांची जबाबदारी :
  • भाजपच्या ‘मिशन १४४’अंतर्गत राज्यातील लोकसभा मतदारसंघांची जबाबदारी केंद्रीय मंत्र्यांकडे देण्यात आली आहे. आता राज्यातील आठ केंद्रीय मंत्र्यांकडे प्रत्येकी दोन लोकसभा मतदारसंघांची जबाबदारी दिली जाणार आहे. यासंदर्भातील बैठक दिल्लीत बुधवारी प्रदेशाध्यक्ष चंद्रशेखर बावनकुळे यांच्या उपस्थितीत झाली.

  • भाजपच्या केंद्रीय नेतृत्वाच्या मार्गदर्शनाखाली २०२४ मधील लोकसभा निवडणुकीत राज्यात ४५ जागा लढवल्या जातील. त्यासंदर्भातील पूर्वतयारी पूर्वीच सुरू झाली होती. त्यापुढील टप्प्यात राज्यातील केंद्रीय मंत्र्यांकडेही १६ लोकसभा मतदारसंघांची जबाबदारी दिली जाणार असल्याची माहिती बावनकुळे यांनी दिली.

  • केंद्रीय राज्यमंत्री भागवत कराड, भारती पवार, कपिल पाटील, रावसाहेब दानवे या मंत्र्यांवर प्रामुख्याने ही जबाबदारी असेल. याशिवाय केंद्रीय मंत्री पीयूष गोयल, नितीन गडकरी, नारायण राणे तसेच राष्ट्रीय लोकशाही आघाडीचे घटक पक्ष असलेल्या रिपब्लिकन पक्षाचे खासदार रामदास आठवले यांनाही या मोहिमेत सहभागी करून घेतले जाणार आहे.

  • प्रत्येक मंत्र्याकडे कोणते दोन लोकसभा मतदारसंघ द्यायचे या संदर्भात बैठकीत सविस्तर चर्चा झाली. भाजपची पक्ष संघटना व केंद्र-राज्य सरकार यांच्यातील समन्वयासाठी मुंबईतही बैठक घेतली जाणार असल्याचे बावनकुळे यांनी सांगितले.

ज्येष्ठ सामाजिक कार्यकर्त्यां इलाबेन भट कालवश :
  • ज्येष्ठ महिला हक्क कार्यकर्त्यां आणि ‘सेल्फ एम्प्लॉइड वुमेन्स असोसिएशन’च्या (सेवा) संस्थापिका इलाबेन भट यांचे वृद्धापकाळाने निधन झाले. त्या ८९ वर्षांच्या होत्या. सेवा भारत या संस्थेने ट्विटरच्या माध्यमातून याबाबत माहिती दिली.

  • पंतप्रधान नरेंद्र मोदी यांनी इलाबेन यांना आदरांजली वाहिली. ‘इलाबेन भट यांच्या निधनाबाबत ऐकून दु:ख झाले. महिला सक्षमीकरण, सामाजिक कार्य आणि तरुणांमध्ये शिक्षणाचा प्रसार व्हावा यासाठी केलेल्या कामासाठी त्या दीर्घकाळ स्मरणात राहतील. त्यांचे कुटुंबीय आणि सहकाऱ्यांचे सांत्वन करतो,’ असे ट्वीट पंतप्रधानांनी केले. गांधीवादी कार्यकर्त्यां असलेल्या इलाबेन यांनी १९७२ साली सेवा संस्थेची स्थापना केली. १९९६ पर्यंत सरचिटणीस म्हणून त्यांनी संस्था नावारूपाला आणली.

  • मार्च २०१५ ते ऑक्टोबर २०२२ असा दीर्घकाळ गुजरात विद्यापीठाच्या कुलगुरू म्हणून त्यांनी काम केले. त्यांना १८८५ साली पद्मश्री आणि १९८६ साली पद्मभूषण पुरस्कारांनी सन्मानित करण्यात आले. आंतरराष्ट्रीय स्तरावर रामन मॅगसेसे पुरस्कार, रॅडक्लिफ पुरस्कारांनी त्यांना गौरवण्यात आले होते.  अमेरिकेच्या माजी परराष्ट्रमंत्री हिलरी क्लिंटन यांनी इलाबेन यांचा उल्लेख ‘आपल्या आयुष्यातील हिरो’ असा केला होता.

03 नोव्हेंबर चे दिनविशेष पाहण्यासाठी (येथे क्लिक करा)

Whatsapp Group

© Maha NMK™ | Copyright 2015 - 2023 All Rights Reserved.

Made with ❤ in India.