चालू घडामोडी आणि दिनविशेष - 25 ऑक्टोबर 2023

Date : 25 October, 2023 | MahaNMK.com

आपल्या मित्रांना पाठवा :
गिनीज बुकात नोंद झालेल्या जगातल्या सर्वात वृद्ध श्वानाचं निधन, ३१ व्या वर्षी घेतला अखेरचा श्वास!
  • फेब्रुवारी २०२३ या महिन्यात बॉबी या श्वानाच्या नावे गिनीज बुक ऑफ वर्ल्ड रेकॉर्ड नोंदवण्यात आला. कारण ३० वर्षे २६६ दिवस जगलेला जगातला तो एकमेव श्वान ठरला होता. मात्र आता वयाच्या ३१ व्या वर्षी त्याने अखेरचा श्वास घेतला. बॉबी नावाच्या श्वानाचं वयाच्या ३१ व्या वर्षी निधन झालं. गिनीज बुक ऑफ वर्ल्ड रेकॉर्डच्या वेबसाईटनेच हे वृत्त दिलं आहे.
  • बॉबी हा श्वान पोर्तुगालच्या लीरिया प्रांतातल्या कॉनकिरोज शहरातल्या एका गावात कोस्टा परिवारात वास्तव्य करत होता. राफिरो डो एलनतेजो या ब्रिडचा तो श्वान होता. खरंतर श्वानाचं आयुष्य हे सरासरी १२ ते १५ वर्षे असतं. मात्र बॉबी हा ३१ वर्षे जगला. अखेर त्याची प्राणज्योत मालवली. याआधी हा रेकॉर्ड ऑस्ट्रेलिनय कॅटल डॉग ब्लुईच्या नावे होता. ब्लुई १९१० ते १९३९ अशी २९ वर्षे जगला होता. मात्र बॉबी हा श्वान ३१ वर्षे जगला. बॉबीच्या जन्माची नोंद लीरियाच्या व्हेटरीनरी मेडिकल सर्विल ऑफ लीरिया मध्ये करण्यात आली आहे.
  • बॉबीचा जन्म ११ मे १९९२ रोजी झाला होता. त्याच्या वयाचं वर्ल्ड रेकॉर्ड नुकतंच म्हणजेच फेब्रुवारी २०२३ मध्ये झालं होतं. त्यानंतर आता याच बॉबी या श्वानाचा मृत्यू झाला आहे. कोस्टा कुटुंबाचा हा पाळीव श्वान होता. त्याची गोष्टही रंजक आहे. ३८ वर्षीय लियोनल कोस्टा म्हणाले होते, माझे वडील शिकारी होते, त्यावेळी मी आठ वर्षांचा होतो आणि आमच्याकडे अनेक पाळीव श्वान होते. त्यामुळे नव्या पिल्लांना आपण नको ठेवुयात असं माझ्या वडिलांनी मला सांगितलं होतं. घरातल्या श्वानांना जेव्हा पिल्लं झाली त्यातच एक बॉबीही होता. माझ्या वडिलांनी इतर पिल्लांना सोडून दिलं. पण बॉबीला त्यांनी पाहिलं नाही. मग तो आमच्याबरोबरच राहिला. माझ्या आईने म्हणजे गीराने बॉबीला वडिलांच्या नजरेस येणार नाही अशा पद्धतीने सांभाळलं. वडिलांना समजलं तेव्हा बराच उशीर झाला होता. पण मग त्यांनीही त्याला स्वीकारलं आणि मग बॉबी हा श्वान आमच्या कुटुंबाचाच एक भाग झाला असं लियोनेलने सांगितलं होतं. जगातल्या सर्वात वृद्ध श्वानाचा आता मृत्यू झाला आहे.
सर्वांत वेगाने वाढणारी अर्थव्यवस्था भारताचीच! केंद्रीय अर्थमंत्रालयाच्या चालू आर्थिक वर्षासाठीच्या अहवालाचा दावा
  • जगातील सर्वांत वेगाने वाढणारी प्रमुख अर्थव्यवस्था म्हणून भारताचे स्थान आर्थिक वर्ष २०२३-२४ मध्ये कायम राहील, असा अंदाज केंद्रीय अर्थमंत्रालयाच्या अहवालात सोमवारी वर्तविण्यात आला. देशांतर्गत भक्कम वित्तीय स्थिती आणि महागाईचा दर सौम्य राहण्याची अपेक्षा यामुळे देशाच्या अर्थव्यवस्थेला गती मिळेल, असेही अहवालात नमूद करण्यात आले आहे.
  • सप्टेंबरचा मासिक आर्थिक पाहणी अहवाल जाहीर करण्यात आला आहे. यानुसार, पर्शियन आखातातील सुरू असलेल्या घडामोडी आणि परिस्थितीत होणाऱ्या बदलांनुसार खनिज तेलाच्या भावात वाढ होण्याची शक्यता यामुळे जागतिक पातळीवरील अनिश्चितता आहे. अमेरिकेत पतधोरण अजूनही कठोर पातळीवर असून, त्यामुळे वित्तीय स्थितीवर परिणाम होऊ शकतो. सध्या अमेरिकेतील भांडवली बाजारांमध्ये वाढ होण्यापेक्षा घसरण होण्याचा धोका अधिक आहे. जर घसरण झाली तर त्याचे परिणाम इतर बाजारांवरही होतील. भू-राजकीय तणावामुळे जागतिक पातळीवर जोखीम वाढू शकते. ही जोखीम आणखी वाढून कायम राहिल्यास त्याचा परिणाम भारतांसह इतर देशांतील आर्थिक घडामोडींवर होऊ शकतो.
  • चालू आर्थिक वर्षात भारताच्या समष्टी अर्थव्यवस्थेविषयक अनुमान चांगले आहेत. देशांतर्गत वित्तीय स्थिती भक्कम आहे. याचबरोबर क्रयशक्ती आणि गुंतवणुकीत वाढ होताना दिसत आहे. आगामी रब्बी हंगामातील उत्पादनाने धान्यसाठ्यामध्ये सुधारणा होईल. खाद्यवस्तूंची महागाई कमी झाली असून, मूळ महागाईही कमी होत आहे. कमी झालेली व्यापारी तूट आणि पुरेशी परकीय गंगाजळी यामुळे भारताची बाह्य आर्थिक स्थिती चांगली आहे. रिझर्व्ह बँकेने निर्मिती, ग्राहक विश्वास, रोजगार आणि महागाईबाबत केलेल्या सर्वेक्षणांचे निष्कर्ष सकारात्मक आले आहेत, असे अहवालात नमूद करण्यात आले आहे.
  • जगात सर्वांत वेगाने वाढणारी अर्थव्यवस्था हे भारताचे स्थान चालू आर्थिक वर्षात कायम राहील, असा अंदाज आंतरराष्ट्रीय नाणेनिधीनेही वर्तविला आहे. जागतिक पातळीवरील अनिश्चितता आणि भू-राजकीय आव्हाने असूनही भारताच्या आर्थिक ताकदीबाबत जागतिक विश्लेषकांचा आत्मविश्वास वाढत आहे.
अखेर चीनच्या ‘बेपत्ता’ संरक्षणमंत्र्यांची हकालपट्टी; जनरल ली शांगफू यांच्या उत्तराधिकाऱ्याची घोषणा अद्याप नाही
  • गेल्या दोन महिन्यांपासून कुणालाही न दिसलेले चीनचे संरक्षणमंत्री ली शांगफू यांची अखेर पदावरून हकालपट्टी करण्यात आली आहे. त्यांच्या जागी कुणाची नेमणूक करणार, हे अद्याप स्पष्ट झाले नसले तरी यामुळे क्षी जिनपिंग यांच्या प्रशासनात सर्व आलबेल नसल्याचे स्पष्ट झाले आहे. अशा पद्धतीने ‘बेपत्ता’ झाल्यानंतर हकालपट्टी झालेले ते दुसरे उच्चपदस्थ आहेत.
  • मार्चमध्ये जिनपिंग यांनी केलेल्या मंत्रिमंडळ फेरबदलांत शांगफू यांना संरक्षणमंत्री करण्यात आले होते. देशातील या दुसऱ्या क्रमांकाच्या मंत्रीपदावर पोहोचलेले शांगफू २९ ऑगस्टला एका भाषणात दिसले होते. अशाच पद्धतीने काही महिन्यांपूर्वी तत्कालीन परराष्ट्रमंत्री चिन गांगदेखील बेपत्ता झाले होते. मंगळवारी चीनच्या सरकारी सीसीटीव्ही वाहिनीने शांगफू आणि चिन गांग यांना पदावरून हटविल्याचे जाहीर केले. यामुळे दोघांच्याही राजकीय कारकीर्दीचा अंत झाल्याचे स्पष्ट झाले असले तरी त्यांच्यावर झालेल्या आरोपांची चौकशी होणार का, याबाबत काहीही स्पष्ट करण्यात आलेले नाही.
  • शांगफू आणि गांग यांचे गायब होणे आणि त्यानंतर झालेली हकालपट्टी याचा संबंध चीनच्या परराष्ट्र धोरणांशी जोडला जात असून जिनपिंग यांच्याबाबत मंत्रिमंडळात नाराजी असल्याचीही चर्चा रंगली आहे. जिनपिंग यांना अन्य कशाहीपेक्षा निष्ठा महत्त्वाची असल्याचे मानले जाते. त्यांनी अलीकडेच काही उच्चपदस्थांवर भ्रष्टाचाराचे आरोप करून चौकशी सुरू केली होती. प्रशासनातील विरोधकांना संपविण्यासाठी जिनपिंग यांनी हे पाऊल उचलल्याचे बोलले जात आहे. शिवाय शांगफू यांच्यावर रशियाकडून अनधिकृतरीत्या शस्त्रास्त्र खरेदी केल्याचा ठपका ठेवून अमेरिकेने त्यांच्यावर प्रवेशबंदी लादली होती. याबाबत अर्थातच चीन सरकारने पूर्णत: मौन आहे.
मराठमोळ्या शास्त्रज्ञाचा अमेरिकेत डंका, बायडेन यांच्या हस्ते सर्वोच्च वैज्ञानिक पुरस्काराने सन्मानित
  • अमेरिकेचे अध्यक्ष जो बायडेन यांनी मंगळवारी व्हाईट हाऊसमध्ये दोन भारतीय-अमेरिकन शास्त्रज्ञांचा सत्कार केला. नॅशनल मेडल फॉर टेक्नोलॉजी अँड इनोव्हेशन या पुरस्काराने या दोन्ही शास्त्रज्ञांचा सन्मान करण्यात आला आहे. अशोक गाडगीळ आणि सुब्रा सुरेश अशी या दोन्ही शास्त्रज्ञांची नावं आहेत. लोकांचे जीव वाचवणाऱ्या वैद्यकीय उपचार पद्धतींना अधिक सक्षम करू शकतील असे शोध लावणे, विविध आजारांशी लढण्यास मदत करणे आणि अन्न सुरक्षा सुधारण्यासह वेगवेगळ्या संशोधन कार्यात महत्त्वाचं योगदान दिल्याबद्दल या दोन भारतीय वंशाच्या शास्त्रज्ञांचा सत्कार करण्यात आला आहे.
  • अशोक गाडगीळ हे अमेरिकेच्या लॉरेन्स बर्कली नॅशनल लॅबोरेटरीत वैज्ञानिक म्हणून काम करत आहेत. तसेच ते कॅलिफोर्निया विद्यापीठात प्राध्यापक म्हणून काम करत आहेत. गाडगीळ यांनी त्यांचं उच्च शिक्षण आयआयटी कानपूर आणि बर्कली विद्यापीठातून पूर्ण केलं आहे. तर सुब्रा सुरेश हे मुळचे मुंबईकर आहेत. ते सध्या कार्नेजी मेलन विद्यापीठाचे अध्यक्ष म्हणून काम पाहत आहेत. सुरेश हे अमेरिकेच्या राष्ट्रीय विज्ञान संस्थेचे संचालकही आहेत. यापूर्वी ते मॅसॅच्युसेट्स इन्स्टिट्युट ऑफ टेक्नोलॉजीच्या अभियांत्रिकी विभागाचे कुलगुरू होते.
  • गाडगीळ आणि सुरेश यांचा गौरव करताना व्हाईट हाऊसने म्हटलं आहे की, आज अमेरिकेचे अध्यक्ष जो बायडेन अनेक शास्त्रज्ञांना नॅशनल मेडल ऑफ सायन्स आणि नॅशनल मेडल फॉर टेक्नोलॉजी अँड इनोव्हेशनने सन्मानित करत आहेत. आपल्या देशाच्या कल्याणासाठी आणि विकासासाठी ज्यांनी नवं तंत्रज्ञान शोधलं आहे, नवे शोध लावले त्यांचा विज्ञान क्षेत्रातल्या देशातील सर्वोच्च पुरस्काराने गौरव करत आहोत. १९५९ पासून या पुरस्काराची सुरुवात करण्यात आली होती.
  • व्हाईट हाऊसने यासंबंधी एक निवेदन जारी केलं आहे. या निवदेनात म्हटलं आहे की, जीवशास्त्र, संगणक विज्ञान, शैक्षणिक विज्ञान, अभियांत्रिकी, भूगर्भशास्त्र, गणित, भौतिकशास्त्र, सामाजिक, व्यावहारिक आणि आर्थिक विज्ञानाच्या क्षेत्रातील योगदानाबद्दल हा पुरस्कार दिला जातो. या क्षेत्रांमध्ये भरीव कामगिरी करणारे शास्त्रज्ञ हे अमेरिकेच्या अध्यक्षांच्या हस्ते विशेष सन्मानास पात्र आहेत.
राज्यात नोव्हेंबरपासून थंडीची तीव्रता वाढणार
  • देशातील विविध राज्यांमध्ये गेल्या काही दिवसात प्रचंड तापमान वाढ दिसून आली. मात्र, गेल्या दोन दिवसांपासून तापमानात थोडी घट झाली असून काही ठिकाणी थंडीची चाहूल लागली आहे. महाराष्ट्रातही काही भागात थंडी जाणवू लागली आहे. दरम्यान, भारतीय हवामान खात्याने नोव्हेंबरच्या सुरुवातीपासून महाराष्ट्रात थंडीची तीव्रता वाढणार असल्याचे सांगितले आहे.
  • अरबी समुद्रात “तेज” चक्रीवादळाची निर्मिती झाली आहे. तसेच बंगालच्या उपसागरात “हमून” चक्रीवादळ तयार झाले आहे. २०१८ नंतर प्रथमच एकाच वेळी दोन चक्रीवादळांची निर्मिती झाली आहे. हवामान खाते यावर लक्ष ठेवून आहे. अरबी समुद्रातील चक्रीवादळामुळे महाराष्ट्रावर आणि गुजरातवर कोणताच विपरीत परिणाम होणार नसल्याचे हवामान खात्याने जाहीर केले.
  • गुजरातमध्ये आगामी पाच ते सहा दिवस हवामान प्रामुख्याने कोरडे राहणार आहे तर महाराष्ट्रात देखील या चक्रीवादळाचा कोणताच परिणाम होणार नसल्याचे सांगितले आहे.

 

आंतरराष्ट्रीय क्रिकेटमध्ये सर्वाधिक धावा करणाऱ्यांत कोहली सहावा :
  • ट्वेन्टी २० विश्वचषक क्रिकेट स्पर्धेत पाकिस्तानविरुद्ध सामना जिंकून देणारी खेळी करताना विराट कोहलीने आंतरराष्ट्रीय क्रिकेटमध्ये सर्वाधिक धावांच्या आघाडीवर सध्याचा प्रशिक्षक राहुल द्रविडला मागे टाकले. सर्वाधिक धावा करणाऱ्या फलंदाजांत कोहली आता सहाव्या क्रमांकावर आला आहे. कोहलीच्या नावावर आता आंतरराष्ट्रीय क्रिकेटमध्ये २४,२१२ धावा असून, यात ७१ शतके आणि १२६ अर्धशतकांचा समावेश आहे. द्रविडच्या नावावर २४,२०८ धावा आहेत. यामध्ये ४८ शतके आणि १४६ अर्धशतकांचा समावेश आहे.

  • पाकिस्तानविरुद्धच्या सामन्यात भारतीय संघ ४ बाद ३१ असा अडचणीत असताना कोहलीने कमालीच्या धीरोदात्तपणे फलंदाजी करून भारताचा विजय साकार झाला. या संपूर्ण खेळीत कोहलीने दाखवलेला संयम, आक्रमकता आणि अखेरच्या षटकात बाईज धावा काढताना दाखवलेली समयसूचकता त्याचे श्रेष्ठत्व सिद्ध करणारी होती. आंतरराष्ट्रीय क्रिकेटमध्ये सर्वाधिक धावा करणाऱ्यांत सचिन तेंडुलकर (३४,३५७ धावा) आघाडीवर असून, त्यानंतर कुमार संगकारा (२८,०१६), रिकी पॉन्टिंग (२७,४८३), महेला जयवर्धने(२५,९५७) आणि जॅक कॅलिस (२५,५३४) यांचा क्रमांक येतो.

  • भारताने मोडला ऑस्ट्रेलियाचा विक्रम - या विजयाने भारतीय संघाने कॅलेंडर वर्षांत सर्वाधिक विजय मिळविण्याचा ऑस्ट्रेलियाचाही विक्रम मोडीत काढला. ऑस्ट्रेलियाने २००३ मध्ये ४७ सामन्यांत ३८ विजय मिळविले होते. भारताने या वर्षी ५६ सामन्यांत ३९ विजय मिळविले आहेत.

भारतीय वंशाचे सुनक ब्रिटनचे नवे पंतप्रधान! ‘ऋषी’ ब्रिटनच्या गडगडलेल्या अर्थव्यवस्थेला नवसंजीवनी देणार :
  • भारतीय वंशाचे ब्रिटनचे नेते ऋषी सुनक यांची ब्रिटनच्या पंतप्रधानपदी निवड करण्यात आली आहे. ब्रिटनचे माजी पंतप्रधान बोरिस जॉन्सन यांनी माघार घेतल्यामुळे सुनक यांचा विजय जवळजवळ निश्चित मानला जात होता. जॉन्सन यांनी माघार घेतल्यानंतर पेनी मॉर्डन्ट यांच्याकडे सुनक यांचे प्रतिस्पर्धी म्हणून पाहिले जात होते. मात्र सत्ताधारी हुजूर पक्षाच्या खासदारांनी सुनक यांना पाठिंबा दिल्यामुळे शेवटी ब्रिटनचे पंतप्रधान म्हणून त्यांच्या नावावर शिक्कामोर्तब करण्यात आले आहे. सुनक हे मागील सात महिन्यांतील ब्रिटनचे तिसरे पंतप्रधान असतील.

  • सत्ताधारी हुजूर पक्षाच्या ‘१९९२ समिती’ने सुनक यांना पक्षाचा नेता म्हणून घोषित केले आहे. म्हणजेच सुनक आता ब्रिटनच्या पंतप्रधानपदी विराजमान होतील. हंगामी पंतप्रधान लिझ ट्रस यांच्याकडून ते पंतप्रधापदाचा पदाभार स्वीकारतील.

  • शर्यत जिंकलीच - ऋषी सुनक दुसऱ्यांदा पंतप्रधानपदाच्या शर्यतीत होते. याआधी जुलै महिन्यात ते लिझ ट्रस यांचे प्रतिस्पर्धी म्हणून पंतप्रधानपदाच्या शर्यतीत उतरले होते. मात्र तेव्हा त्यांना पंतप्रधानपदाने हुलकावणी दिली होती. त्या निवडणुकीत लिझ ट्रस विजयी झाल्या होत्या. मात्र पक्षाचा पाठिंबा गमावल्यामुळे तसेच दिलेली आश्वासने पूर्ण करू न शकल्यामुळे ट्रस यांना अवघ्या ४५ दिवसांत राजीनामा द्यावा लागला. त्यानंतर आता ऋषी सुनक हे दुसऱ्यांदा पंतप्रधानपदाच्या शर्यतीत उतरले होते. यावेळी मात्र हुजूर पक्षातील खासदारांनी त्यांना पाठिंबा दिल्यामुळे त्यांनी पंतप्रधानपदाची शर्यत जिंकली आहे.

‘फिलिप्स’कडून जगभरातील चार हजार कर्मचारी कपात करण्याचा निर्णय :
  • तंत्रज्ञान कंपनी फिलिप्सने एक निवदेन जारी करत लवकरच चार हजार कर्मचाऱ्यांना नोकरीवरून काढणार असल्याची घोषणा केली आहे. मागील काही महिन्यांपासून कंपनीला मोठ्या आव्हानांचा सामना करावा लागत असल्याने उत्पादन घटले आहे. तसेच कंपनीच्या उत्पन्नावरही मोठा प्रभाव पडला आहे. त्यामुळे हा कठीण निर्णय घेत असल्याचे कंपनीकडून सांगण्यात आले आहे.

  • फिलिप्सचे सीईओ रॉय जेकब्स यांनी जारी केलेल्या निवेदनात म्हटले की, ”कंपनीची उत्पन्न वाढवण्यासाठी आम्हाला काही कठोर निर्णय घ्यावे लागत आहेत. इच्छा नसतानाही आम्ही जगभरातील चार हजार कर्मचारी कपात करण्याचा निर्णय घेतला आहे. हा निर्णय आमच्यासाठी कठीण आहे. मात्र, काही कारणास्तव आम्हाला हा निर्णय घ्यावा लागतो आहे.

  • गेल्या काही महिन्यांपासून कंपनीला महागाई, करोना आणि रशिया-युक्रेन युद्ध यामुळे अनेक आव्हानांचा सामना करावा लागतो आहे. याचा परिणाम कंपनीच्या उत्पन्नावर पडला आहे. त्यामुळे नफा वाढवण्यासाठी आता आम्हाला आमच्या खर्चात कपात करावी लागणार आहे.”

क्षी जिनिपग तिसऱ्यांदा चीनचे अध्यक्ष ; माओ यांच्यानंतर सर्वाधिक प्रभावशाली नेते :
  • चीनच्या अध्यक्षपदी क्षी जिनिपग यांची रविवारी तिसऱ्यांदा निवड झाली. चीनच्या कम्युनिस्ट पक्षाच्या सरचिटणीसपदासाठी त्यांची निवड झाली. ते तहहयात चीनच्या सत्तेवर राहतील, अशी शक्यताही व्यक्त होत आहे. पक्षाचे संस्थापक माओ त्से तुंग यांच्यानंतर तिसऱ्यांदा सत्तेवर येण्याची विक्रमी कामगिरी करणारे नेते म्हणून त्यांना ओळखले जाईल.

  • पक्षाच्या अधिकृत निवेदनात नमूद केले आहे, की रविवारी झालेल्या कम्युनिस्ट पक्षाच्या अधिवेशनातील पहिल्या पूर्ण सत्रात जिनिपग यांची पक्षाच्या विसाव्या केंद्रीय समितीचे सरचिटणीस म्हणून निवड करण्यात आली. जिनिपग यांच्या अध्यक्षतेखाली झालेल्या या अधिवेशनात केंद्रीय समितीचे २०३ सदस्य आणि १६८ वैकल्पिक सदस्य उपस्थित होते. या अधिवेशनात जिनिपग यांची केंद्रीय सैन्य आयोगाचे (सीएमसी) अध्यक्ष म्हणूनही नियुक्ती करण्यात आली.

  • चीनमधील ‘क्षी युग’ म्हणून जिनिपग यांची कारकीर्द ओळखली जाईल. आपल्या नव्या कारकीर्दीची पुन्हा सुरुवात करण्यासाठी जिनिपग स्थानिक व परदेशी प्रसारमाध्यमांसमोर रविवारी उपस्थित झाले. जिनिपग यांच्या आधी, माओंचा अपवाद वगळता, जिनिपग यांच्या आधी चीनच्या सर्व अध्यक्षांनी दहा वर्षांच्या कार्यकाळानंतर निवृत्त होण्याचा नियम पाळला होता. मात्र जिनिपग तिसऱ्यांदा अध्यक्षपदाची सूत्रे हाती घेतल्याने हा संकेत संपुष्टात आला. जिनिपग २०१२ मध्ये प्रथम निवडून आले होते. त्यांचा दहा वर्षांचा कार्यकाळ या वर्षी संपणार होता.

  • पक्षात दुसऱ्या क्रमांकाचे मानले जाणारे नेते पंतप्रधान ली क्विंग यांच्यासह अनेक उदारमतवादी नेते शनिवारी पक्षाच्या ३०० सदस्यीय केंद्रीय समितीत स्थान मिळवू शकले नाहीत. चीनच्या साम्यवादी पक्षाच्या पाच वर्षांतून एकदा होत असलेल्या महाअधिवेशनात त्यांची केंद्रीय समितीवर निवड झाली नाही. समितीच्या रविवारी झालेल्या बैठकीत २५ सदस्यीय राजकीय समितीची निवड करण्यात आली. या समितीने सात सदस्यीय स्थायी समितीची निवड केली. या स्थायी समितीने जिनिपग यांची पाच वर्षांच्या तिसऱ्या कार्यकाळासाठी सरचिटणीस म्हणून निवड केली.

  • शनिवारी अपेक्षेनुसार जिनिपग यांची शनिवारी केंद्रीय समितीने निवड केली. त्यानंतर राजकीय व स्थायी समितीत त्यांची सहज निवड झाली. या महाअधिवेशनात पक्षाच्या घटनेत दुरुस्ती करून, तिची मूळ स्थिती पुन्हा लागू करण्यात आली. त्यानुसार जिनिपग यांचे निर्देशांचे पालन करणे सर्व पक्षसदस्यांसाठी बंधनकारक ठरणार आहे. 

‘इस्रो’ची व्यावसायिक यशाची दिवाळी - ‘एलव्हीएम३-एम२’द्वारे ब्रिटिश कंपनीचे ३६ दूरसंचार उपग्रह प्रक्षेपित :
  • भारतीय अवकाश संशोधन संस्थेतर्फे (इस्रो) सर्वात वजनदार उपग्रह प्रक्षेपक ‘एलव्हीएम ३-एम२’चे रविवारी यशस्वी प्रक्षेपण करण्यात आले. ब्रिटिश कंपनीचे ३६ ब्रॉडबँड दूरसंचार उपग्रह यशस्वीरीत्या पूर्वनिश्चित कक्षांमध्ये पोहोचवण्यात आले. ‘इस्रो’ने आपल्या पहिल्याच व्यावसायिक मोहिमेत हे यश मिळवून ऐतिहासिक कामगिरी केली आहे. ब्रिटनची कंपनी वनवेब लिमिटेडने या मोहिमेसेठी ‘इस्रो’ची व्यावसायिक शाखा न्यू स्पेस इंडिया लिमिटेडशी (एनएसआयएल) करार केला होता. वन वेब लिमिटेड ही अंतराळ क्षेत्रात कार्यरत असलेले जगभरात दूरसंचार जाळे असलेली कंपनी आहे. ती सरकारी सेवा आणि उद्योगांना इंटरनेट सेवा प्रदान करते.

  • भारती एंटरप्रायझेस ही ‘वन वेब’मधील प्रमुख गुंतवणूकदार आहे. ‘इस्रो’ व त्याची व्यावसायिक शाखा ‘एनएसआयएल’सोबत भागीदारी असल्याने २०२३ पर्यंत भारतात दूरसंचार सेवा प्रदान करणार आहोत असे ‘वन वेब’ने सांगितले. मात्र, या नव्या मोहिमेतील यशानंतर रविवारी पहाटे ‘इस्रो’चे अध्यक्ष एस. सोमनाथ यांनी जाहीर केले, की ‘इस्रो’मधील शास्त्रज्ञांसाठी दिवाळी लवकर सुरू झाली आहे.

  • ‘इस्रो’ने ‘ट्वीट’ केले, की ‘एलव्हीएम २ एम२/वन वेब इंडिया-१’ मोहीम यशस्वीरीत्या पूर्ण झाली. सर्व ३६ उपग्रह नियोजित कक्षेत पोहोचवले आहेत. श्रीहरिकोटा प्रक्षेपण केंद्रातून रात्री १२ वाजून ७ मिनिटांनी प्रक्षेपण झाल्यानंतर सुमारे ७५ मिनिटांनी सर्व ३६ उपग्रह त्यांच्या नियोजित कक्षेत सोडण्यात आले. ‘एलव्हीएम’ हा उपग्रह प्रक्षेपक आठ हजार किलोपर्यंतचे उपग्रह वाहून नेण्याची क्षमता असलेला ‘इस्रो’चा सर्वात वजनदार प्रक्षेपक आहे.

  • सोमनाथ म्हणाले, की या यशामुळे सतीश धवन अवकाश केंद्रात दिवाळी साजरी करणे सुरू झाले आहे. उपग्रह कक्षेत स्थिर होण्याची प्रक्रिया वेळ घेते. ‘इस्रो’चे माजी प्रमुख के. सिवन आणि ए. एस. किरणकुमार आणि ‘भारती एंटरप्रायझेस’चे संस्थापक अध्यक्ष सुनील मित्तल आदींनी नियंत्रण कक्षातून हे प्रक्षेपण पाहिले.या मोहिमेचे ‘ऐतिहासिक’ असे वर्णन करताना, सोमनाथ यांनी पंतप्रधान नरेंद्र मोदी यांना या यशाचे श्रेय दिले.

25 ऑक्टोबर चे दिनविशेष पाहण्यासाठी (येथे क्लिक करा)

 

Whatsapp Group

© Maha NMK™ | Copyright 2015 - 2023 All Rights Reserved.

Made with ❤ in India.