चालू घडामोडी आणि दिनविशेष - 24 जानेवारी 2024

• महिला इंडियन प्रीमियर लीग ट्वेन्टी-२० क्रिकेटमधील पाच संघांचा लिलाव बुधवारी पार पडणार असून यातून भारतीय क्रिकेट नियामक मंडळाला (बीसीसीआय) ४००० कोटी इतकी रक्कम अपेक्षित आहे.
• महिला ‘आयपीएल’च्या पहिल्या पर्वाचे यंदा आयोजन केले जाणार असून यातील पाच संघांच्या खरेदीसाठी आघाडीचे उद्योग समूह उत्सुक आहेत. तज्ज्ञांच्या अंदाजानुसार, प्रति संघामागे ५०० ते ६०० कोटी रुपयांची विजयी बोली लागण्याची शक्यता आहे. ‘‘महिलांची ‘आयपीएल’ स्पर्धा खूप मोठी आणि मौल्यवान ठरू शकते. प्रत्येक संघाच्या खरेदीसाठी किमान ५०० कोटी रुपयांची विजयी बोली लागू शकेल. ८०० कोटींहून अधिकची बोली लागण्याची शक्यता कमी आहे,’’ असे सूत्रांकडून सांगण्यात आले.
• महिला ‘आयपीएल’मध्ये संघ खरेदीसाठी ३० हून अधिक कंपन्या व फ्रेंचायझींनी पाच लाख रुपये किमतीची निविदा कागदपत्रे घेतली आहेत. यात पुरुष ‘आयपीएल’मधील दहाही संघ, तसेच अदानी समूह, टोरेंट समूह, हलदीरामचे प्रभूजी, काप्री ग्लोबल आणि आदित्य बिर्ला समूह यांसारख्या आघाडीच्या समुहांचा समावेश आहे. यातील काही समुहांनी २०२१ मध्ये पुरुष ‘आयपीएल’चे नवे दोन संघ खरेदी करण्याचा प्रयत्न केला होता.

कार निर्मिती क्षेत्रातील दिग्गज फोर्ड कंपनी युरोपमध्ये तीन हजारांहून अधिक कर्मचाऱ्यांना कामावरून काढणार

• ‘मेटा’, ‘ट्विटर’, ‘स्नॅप’, ‘मायक्रोसॉफ्ट’, विप्रो सारख्या दिग्गज कंपन्यांनी याआधीच आपली कर्मचारी कपात केली आहे. त्यानंतर ‘अॅमेझॉन’ने दहा हजार कर्मचाऱ्यांची कपात करण्याचे ठरवल्याचे वृत्त आहे. करोनानंतर अपेक्षित वृद्धीदर तेवढ्या वेगात न गाठल्याने या बड्या समाजमाध्यम, माहिती-तंत्रज्ञान, ई-वाणिज्य कंपन्या अडचणीत आल्या आहेत. मंदीची चर्चा सुरू असताना या कंपन्या खर्च कमी करत आहेत. दरम्यान, हे टाळेबंदीचे वारे आता ‘आयटी’नंतर ‘ऑटो’ सेक्टरमध्येही शिरल्याचे दिसत आहे. कारण, अमेरिकेतील कार निर्मिती क्षेत्रातील नामांकीत असणाऱ्या फोर्ड कंपनीने युरोपमध्ये तीन हजारांहून अधिक कर्मचाऱ्यांची कपात करण्याचा निर्णय घेतला आहे.
• फोर्ड कंपनीने युरोपमधून ३ हजार २०० कर्मचाऱ्यांना कामावरून कमी करण्याचे ठरवले आहे. एवढेच नाहीतर कंपनीने काही प्रोजेक्ट युरोपमधून अमेरिकेत स्थलांतरित करण्याचाही निर्णय घेतला आहे.
• यासंदर्भात रॉयटर्स या वृत्तसंस्थेने दिलेल्या माहितीनुसार, कंपनी विकास कामातील अडीच हजार नोकऱ्या आणि प्रशासकीय कामातील ७०० नोकऱ्या काढू इच्छित आहे. फोर्ड कंपनीच्या या निर्णयाचा सर्वाधिक फटका जर्मनीतील लोकांना बसणार आहे. फोर्ड कंपनी युरोपमध्ये जवळपास ४५ हजार लोकांना रोजगार देते.

GoMechanic नं केली ७० टक्के कर्मचारी कपातीची घोषणा -

• गेल्या काही दिवसांपासून अनेक बड्या कंपन्यांमधून कर्मचारी कपातीच्या चर्चा सुरू झाल्या आहेत. यामध्ये थेट गुगलपासून अॅमेझॉनपर्यंत अनेक आयटी कंपन्यांचाही समावेश आहे. त्यातच या वर्षी जून महिन्यात मंदी येणार असल्याची जोरदार चर्चा सुरू झाली आहे. या पार्श्वभूमीवर ऑटोमोबाईल सर्विसिंगची सेवा पुरवणाऱ्या GoMechanic या स्टार्टअपनं तब्बल ७० टक्के कर्मचारी कपात करणार असल्याचं जाहीर केलं आहे. यासाठी त्यांनी कंपनीची धोरणं आणि चुकीचे आर्थिक अंदाज जबाबदार असल्याचं म्हटलं आहे.

हिजाबप्रकरणी लवकरच त्रिसदस्यीय पीठापुढे सुनावणी; सरन्यायाधीशांचे संकेत

• कर्नाटकमधील शाळांत हिजाबबंदी करण्याच्या निर्णयाला आव्हान करणाऱ्या याचिकांच्या सुनावणीसाठी सर्वोच्च न्यायालयाचे त्रिसदस्यीय पीठ स्थापन करण्याचा विचार केला जाईल, असे सर्वोच्च न्यायालयाने सोमवारी स्पष्ट केले. याप्रकरणी सर्वोच्च न्यायालयाच्या दोन सदस्यीय पीठातील न्यायमूर्तीनी यापूर्वी परस्परविरोधी निकाल दिला आहे.
• कर्नाटकमधील शाळांत ६ फेब्रुवारीपासून प्रात्यक्षिक परीक्षा सुरू होत असल्याने या खटल्यात आता अंतरिम आदेशाची गरज आहे, असे ज्येष्ठ वकील मीनाक्षी अरोरा यांनी सरन्यायाधीश धनंजय चंद्रचूड आणि न्या. व्ही. रामासुब्रमणियन, न्या. जे. बी. पार्डीवाला यांचा समावेश असलेल्या पीठाच्या निदर्शनास आणले. त्या म्हणाल्या की, काही इयत्तांच्या प्रात्यक्षिक परीक्षा सुरू होणार असून त्या सरकारी शाळांत होतील. त्यासाठी विद्याथ्र्यिनींना तेथे जावे लागणार आहे. हे लक्षात घेता या खटल्यात न्यायालयाच्या अंतरिम आदेशाची गरज आहे.
• त्यावर सरन्यायाधीश म्हणाले की, आम्ही हे तपासून पाहू. हे प्रकरण त्रिसदस्यीय पीठाचे काम आहे. त्यासाठी तारीख दिली जाईल.हिजाब प्रकरणात सर्वोच्च न्यायालयाच्या दोन सदस्यीय पीठाने गतवर्षी १३ ऑक्टोबरला परस्परविरोधी निकाल सुनावला होता. त्यामुळे हे प्रकरण पुढील सुनावणीसाठी यापेक्षा मोठय़ा पीठापुढे ठेवावे, असेही या न्यायमूर्तीनी म्हटले होते. न्या. हेमंत गुप्ता गुप्ता यांनी हिजाबबंदीविरोधातील याचिका फेटाळण्याचा, तर न्या. सुधांशू धुलिया यांनी हिजाबबंदी अयोग्य असल्याचा निर्णय दिला होता. त्यामुळे कर्नाटक उच्च न्यायालयाने दिलेला हिजाबबंदी कायम ठेवण्याचा निर्णय सध्या लागू होतो.

१९४७ चे रेल्वे तिकिट व्हायरल! भारत-पाकिस्तानच्या रेल्वे प्रवासाची किंमत वाचून व्हाल थक्क

• भारत-पाकिस्तान देशाच्या संबंधित अनेक गोष्टींबद्दल जाणून घेण्यासाठी लोकांची उत्सुकता शिगेला पोहोचलेली असते. भारत-पाकिस्तान क्रिकेट सामना असो वा सीमेवरील चकमक, या घडामोडींविषयी बातम्या वाचणं लोकांना आवडतं. विशेष म्हणजे भारत-पाकिस्तान क्रिकेट सामना पाहण्यासाठीही लाखोंच्या संख्येत क्रिकेटप्रेमी स्टेडियममध्ये बसलेले दिसतात. अशातच आता भारत-पाकिस्तानच्या एका नव्या गोष्टीमुळं चर्चेला तोंड फुटलं आहे.
• गेल्या काही दिवसांपासून गाड्यांचे जुने बिल सोशल मीडियावर व्हायरल होताना दिसतात. आताही एका जुन्या रेल्वे तिकिटाच्या व्हायरल पोस्टने सर्वांचे लक्ष वेधून घेतलं आहे. आश्चर्याचा बाब म्हणजे हे रेल्वे तिकिट भारत देशाच्या स्वातंत्र्य काळातील आहे. भारत-पाकिस्तानचं हे रेल्वे तिकिट १९४७ चे आहे. त्यावेळी नऊ प्रवाशांनी पाकिस्तानच्या रावलपिंडी येथून अमृतसरला जाण्यासाठी हे तिकिट काढलं होतं.
• व्हायरल झालेल्या तिकिटाचे दर पाहून सर्वांना आश्चर्याचा धक्का बसला आहे. त्यावेळी ९ लोकांसाठी रेल्वेचे तिकिट दर फक्त ३६ रुपये होते. या जून्या रेल्वे तिकिटाला पाकिस्तानच्या रेल लवर्स नावाच्या एका फेसबुक पेजवर शेअर केलं आहे. पाकिस्तान रेल लवर्सने तिकिटाचं फोटो शेअर करुन म्हटलंय, “१७-०९-१९४७ ला स्वातंत्र्यानंतर ९ लोकांसाठी दिलेल्या एका रेल्वे तिकिटाचा फोटो..रावलपिंडी ते अमृतसरसाठी, ज्याची किंमत ३६ रुपये ९ पैसे आहे. भारतात आलेल्या एका कुटुंबियांचं हे रल्वे तिकिट असण्याची शक्यता आहे. हे रेल्वे तिकिट थर्ड एसी क्लासचं असल्याने, या तिकिटाची किंमत पाहून सर्वच थक्क झाले आहेत.

देशाचा ७३ व्या प्रजासत्ताक दिन बुधवारी असून उपायुक्त हरि बालाजी यांनी ७३ किलोमीटर अंतर धावून अनोख्या पद्धतीने राष्ट्रध्वजाला अभिवादन केले. गेल्यावर्षी अमरावतीमध्ये  त्यांनी प्रजासत्ताक दिनानिमित्त ७२ किलोमीटर अंतर कापले होते.

वांद्रे कुर्ला संकुलापासून ही मोहीम सुरू झाली. यावेळी परिमंडळ १ चे उपायुक्त बालाजी यांच्यासोबत ९ आणखी धावपटू सहभागी झाले होते. तेथून ते मुलुंडला गेले. तेथून पुन्हा वांद्रे कुर्ला संकुल परिसरात परतले. तेथून नरिमन पॉईंटपर्यत ते व त्यांच्या सोबतचे धावपटू धावले. तेथून ते पुन्हा गेट वे ऑफ इंडियाला आले. त्यातील बालाजी यांच्यासह एकूण तीन धावपटूंनी संपूर्ण ७३ किलोमीटरचे अंतर पार पाडले. उर्वरीत सहा जणांनी ५५ किलोमीटर अंतर कापले. शेवटच्या २१ किलोमीटर अंतरात ७० धावपटू सहभागी झाले होते.

त्यानंतर गेट वे ऑफ इंडिया येथे देशाचा तिरंगा झेडा फडकावून अभिवादन करण्यात आले. बालाजी यांनी मध्यरात्री १२ वाजता धावायला सुरूवात केली होती.ते सकाळी साडे आठच्या सुमारास गेट वे ऑफ इंडियाला पोहोचले. बालाजी यांनी गेल्यावर्षीही अमरावतीमध्ये कार्यरत असताना ७२ किलोमीटरचे अंतर धावून पार पाडले होते.

देशात करोनाच्या ओमायक्रॉन या उत्परिवर्तित विषाणू संसर्गाची साथ समूह संसर्गाच्या टप्प्यात असून अनेक महानगरांमध्ये रुग्णसंख्या झपाटय़ाने वाढत असल्याची माहिती ‘इन्साकॉग’ने प्रसिद्ध केली आहे.

‘इन्साकॉग’ने रविवारी प्रसिद्ध केलेल्या आपल्या अहवालात ओमायक्रॉनच्या साथीबद्दलची माहिती देण्यात आली आहे. ओमायक्रॉनचे बहुतेक रुग्ण लक्षणे नसलेले किंवा सौम्य लक्षणे असलेले आहेत, परंतु सध्या मात्र रुग्णालयात दाखल होणारे आणि अतिदक्षता विभागात दाखल कराव्या लागणाऱ्या रुग्णांच्या प्रमाणात वाढ झाली आहे. त्यामुळे धोका कायम आहे, असेही या अहवालात नमूद केले आहे. संसर्गक्षमता अधिक असलेल्या ओमायक्रॉनच्या ‘बीए.२’ या उपप्रकाराचेही अनेक रुग्ण देशात आढळल्याचेही या अहवालात म्हटले आहे. 

ओमायक्रॉन आता समूह संसर्गाच्या टप्प्यावर आहे आणि अनेक महानगरांमध्ये तो प्रबळ असून तेथे बाधितांचे प्रमाण वेगाने वाढत आहे. ओमायक्रॉनचा उपप्रकार ‘बीए.२’च्या रुग्णांची संख्या देशात लक्षणीयरीत्या वाढत आहे. परंतु आरटीपीसीआर चाचणीमध्ये विषाणूच्या तीन जनुकांपैकी एक जनुक आढळत नसल्याने (एस-जीन ड्रॉप आऊट) निष्कर्ष नकारात्मक येण्याची शक्यता या अहवालात वर्तवली आहे. अगदी अलीकडे आढळलेल्या ओमायक्रॉनच्या ‘बी.१.६४०.२’ या उपप्रकाराचे निरीक्षण केले

जात आहे. त्याचा जलद फैलाव झाल्याचा कोणताही पुरावा नाही आणि त्यात रोगप्रतिकारक शक्तीला चकवा देण्याची क्षमता असली तरी, सध्या तरी हा प्रकार चिंताजनक नाही. आतापर्यंत, भारतात त्याचा एकही रुग्ण आढळलेला नाही, असेही ‘इन्साकॉग’ने स्पष्ट केले आहे.

भारतीय ग्रँडमास्टर विदित गुजराथीला टाटा स्टील मास्टर्स बुद्धिबळ स्पर्धेत पहिल्या पराभवाला सामोरे जावे लागले. सातव्या फेरीत हॉलंडच्या जॉर्डन वॅन फोरीस्टने त्याच्यावर मात केली. तसेच विश्वविजेत्या मॅग्नस कार्लसनने भारताच्या आर. प्रज्ञानंदला पराभूत केल्याने विदितला अग्रस्थान गमवावे लागले.

सातव्या फेरीच्या सामन्यात वॅन फोरीस्टने बचावात्मक खेळ करताना विदितला धोका पत्करण्यास भाग पाडले. विदितने ३६व्या चालीत केलेल्या चुकीचा फायदा घेत वॅन फोरीस्टने विजय मिळवला. विदितचा हा स्पर्धेतील पहिला पराभव ठरला. 

कार्लसनने ३४ चालींत प्रज्ञानंदवर मात केली आणि पाच गुणांसह अग्रस्थान पटकावले. अझरबैजानचा शख्रियार मामेदेरोव्ह दुसऱ्या, तर विदित, आंद्रे इसिपेन्को, अनिश गिरी, रिचर्ड रॅपपोर्ट संयुक्तरीत्या तिसऱ्या स्थानावर आहेत.

चॅलेंजर विभागात भारताच्या अर्जुन इरिगेसीला कझाकस्तानच्या रिनात जुमाबायेव्हने बरोबरीत रोखले. या निकालानंतर अर्जुन सहा गुणांसह अग्रस्थानी कायम आहे.

राज्यातील करोनाची तीव्रता नियंत्रणात आल्यानंतर गेल्या २० दिवसांपासून बंद असलेली शाळा- महाविद्यालये सोमवारपासून सुरू करण्याचा निर्णय राज्य सरकारने घेतला. मुख्यमंत्री उद्धव ठाकरे यांनी याबाबतच्या प्रस्तावास हिरवा कंदील दाखविला असून स्थानिक परिस्थितीनुसार बालवाडी ते महाविद्यालय असे संपूर्ण शिक्षण सुरू होणार असल्याची माहिती दिली गेली.

राज्यातील करोना परिस्थिती नियंत्रणात आल्याच्या पार्श्वभूमीवर सोमवारपासून शाळांसोबतच महाविद्यालयेही सुरू करण्याची तयारी उच्च व  तंत्रशिक्षण विभागाने सुरू केली आहे. दरम्यान, शाळा सुरू होत असल्यानं विद्यार्थ्यांची काळजी घेण्याचं आवाहन राज्याचे आरोग्यमंत्री राजेश टोपे यांनी केलंय. ते जालन्यात बोलत होते.

“सोमवारपासून राज्यातील अनेक ठिकाणच्या शाळा सुरू होत आहेत. शाळांनी कोरोना प्रतिबंधात्मक नियम पाळून विद्यार्थ्यांची काळजी घ्यावी. मुलांमध्ये थोडेही लक्षणं आढळल्यास चाचणी करून घ्यावी आणि एखादा विद्यार्थी पॉझिटिव्ह आढळून आल्यास ज्या वर्गातील विद्यार्थी पॉझिटिव्ह आढळून आला तो वर्ग बंद ठेवावा,” अशी सूचना शिक्षण विभागाकडे करण्यात आल्याची माहिती राज्याचे आरोग्यमंत्री राजेश टोपे यांनी दिली आहे.

लोकल सर्कल कम्युनिटी प्लँटफॉर्मनं एक सर्वेक्षण केलं असून या सर्वेक्षणात ६२ टक्के पालकांनी मुलांना शाळेत पाठवण्यास नकार दिल्याचं समोर आलंय. यावर बोलताना पालकांनी काळजी करण्याचं कारण नसून जगभरातील शाळांचा अभ्यास करूनच राज्यातील शाळा सुरू करण्याचा निर्णय घेण्यात आला असून विद्यार्थ्यांचं नुकसान होऊ नये, असाही शाळा सुरू करण्याचा हेतू असल्याचं ते म्हणाले. त्यामुळे पालकांनी काळजी न करता नियम पाळावे असं आवाहन देखील टोपे यांनी केलं.

प्रजासत्ताक दिनानिमित्त राजपथावर होणाऱ्या संचलनाच्या आधी सराव म्हणून आयोजित करण्यात आलेल्या ‘बिटिंग रिट्रिट’च्या कार्यक्रमात यंदा ड्रोन्सची कमाल पहायला मिळाली. नवी दिल्लीमध्ये एकाच वेळी एक हजार ड्रोन्सच्या प्रकाशाने आकाशामध्ये अद्भूत दृष्य पहायला मिळालं.

सालाबादप्रमाणे यंदाही प्रजासत्ताक दिनाच्या काही दिवसांआधीपासून दिल्लीमधील प्रमुख सरकारी इमारती ज्यामध्ये संसद भवन, राष्ट्रपती भवन, पंतप्रधान निवसस्थान, इंडिया गेट यासारख्या ठिकाणांना विद्युत रोषणाई करण्यात आली आहे. या रोषणाईबरोबरच यंदा या सरावामध्ये हवेतील रोषणाईचा नजारा पहाला मिळाला. एकाच वेळी एक हजार ड्रोन्स राजपथावरुन उडताना दिसले.

रात्रीच्या आकाशामध्ये हिरव्या, पांढऱ्या, भगव्या आणि निळ्या रंगामध्ये चमकणारे हे ड्रोन्स एखाद्या पक्षांच्या थव्याप्रमाणे लयबद्ध पद्धतीने हवेमध्ये संचार करत होते. एकाच वेळी या सर्व ड्रोन्सच्या लाईट्स बदलत होत्या. कधी तिरंगा तर कधी केवळ केशरी, हिरवा आणि पांढऱ्या रंगात दिसणारे हे ड्रोन्स राजपथावर जणू सैनिकांप्रमाणे पथसंचलन करत होते असा भास होत होता.

सध्या सोशल नेटवर्किंगवर या ड्रोन्सचे व्हिडीओ व्हायरल झाले आहे. दिल्लीच्या आकाशामध्ये असं दृष्य पहिल्यांदाच पाहणारे अनेक दिल्लीकर थांबून या ड्रोन्सचे व्हिडीओ शूट करतानाचे चित्र पहायला मिळालं.