चालू घडामोडी आणि दिनविशेष - 16 ऑगस्ट 2023

• विदेशी थेट गुंतवणुकीप्रमाणेच कृषी, शिक्षण, ऊर्जा, पायाभूत सुविधा, आरोग्य आणि पर्यटन अशा सर्व क्षेत्रात आपला महाराष्ट्र देशात प्रथम क्रमांकावर असून, आगामी काळातही तो अव्वल स्थानावरच राहील असा ठाम विश्वास व्यक्त करीत राज्याचे अव्वल स्थान कायम ठेवण्यासाठी आपण सर्व जण शपथबद्ध होऊ या, असे आवाहन मुख्यमंत्री एकनाथ शिंदे यांनी मंगळवारी केले.
• स्वातंत्र्यदिनी एकनाथ शिंदे यांच्या हस्ते मंत्रालयाच्या प्रांगणात ध्वजारोहण झाले. याप्रसंगी मुंबई उच्च न्यायालयाचे मुख्य न्यायाधीश देवेंद्र कुमार उपाध्याय, मुख्य सचिव मनोज सौनिक, अपर मुख्य सचिव सुजाता सौनिक, राजशिष्टाचार विभागाच्या अपर मुख्य सचिव मनीषा म्हैसकर, माहिती व जनसंपर्क महासंचालक जयश्री भोज, भारतीय सेनेच्या तिन्ही दलाचे मुंबई येथील प्रमुख अधिकारी यांच्यासह वरिष्ठ पोलीस अधिकारी, मंत्रालयातील अधिकारी कर्मचारी उपस्थित होते.
• समाजातील शेवटच्या घटकाला स्वातंत्र्य आणि विकास अनुभवता यावा यासाठी गरजूंच्या वेदनेवर फुंकर घालता आली पाहिजे. तळागाळातील लोकांपर्यंत शासकीय योजना पोहोचल्या पाहिजेत, असा शासनाचा मानस असून स्वराज्याचे रूपांतर सुराज्यात झाले पाहिजे, असे मत शिंदे यांनी व्यक्त केले.
• केंद्राप्रमाणेच राज्यातही विकासाची, प्रगतीची गंगा वाहावी यासाठी गेले वर्षभर काम करता आले याचा विशेष आनंद होत असून राज्य आणि केंद्र सरकार यांच्यातील समन्वयाचा नवा अध्याय लिहिला जात असल्याचे त्यांनी यावेळी सांगितले. शासन आपल्या दारीसारख्या क्रांतिकारी योजनेत सव्वा कोटीपेक्षा जास्त लाभार्थ्यांना करोडो रुपयांचे लाभ दिले. केवळ एक रुपयात पीक विमा योजना जाहीर करून देशाच्या इतिहासात पहिल्यांदाच दीड कोटी शेतकऱ्यांना या योजनेचा लाभ दिला. आपत्तीग्रस्त शेतकऱ्यांना प्रसंगी निकषाबाहेर जाऊन मदत केली. आजवर साडेबारा हजार कोटी रुपयांपेक्षा जास्त मदत सरकारने बळीराजाला दिली आहे, असेही शिंदे यांनी आवर्जून सांगितले.

• महसूल विभागाअंतर्गत तलाठी भरतीसाठी आलेल्या अर्जांचा जिल्हानिहाय तपशील जाहीर करण्यात आला. त्यानुसार पुणे, रायगड या जिल्ह्यांतून सर्वाधिक अर्ज दाखल झाले असून, तर मुंबई शहर आणि वाशिम जिल्ह्यांतून सर्वांत कमी अर्ज आले.
• भूमी अभिलेख विभागाचे अपर जमाबंदी आयुक्त आणि तलाठी भरती परीक्षेचे समन्वयक आनंद रायते यांनी ही माहिती दिली. टीसीएस या खासगी कंपनीमार्फत तलाठी भरती परीक्षा घेतली जाणार आहे. या परीक्षेसाठी राज्यभरातील जिल्ह्यांतून मिळून एकूण १० लाख ४१ हजार ७१३ अर्ज दाखल झाले आहेत. उच्च शिक्षित उमेदवारांनीही या परीक्षेसाठी अर्ज भरला आहे. १७ ऑगस्ट ते १२ सप्टेंबर या कालावधीत होणाऱ्या या परीक्षेचे नियोजनही करण्यात आले आहे.
• तलाठी भरती परीक्षेसाठी सर्वाधिक अर्ज दाखल झालेल्या जिल्ह्यांमध्ये पुणे जिल्हा आघाडीवर आहे. पुणे जिल्ह्यातून सर्वाधिक एक लाख १४ हजार ६८४, रायगड जिल्ह्यातून १ लाख ५३७, नाशिक जिल्ह्यातून ६८ हजार ३८, अहमदनगर जिल्ह्यातून ६१ हजार ६३३, सोलापूर जिल्ह्यातून ५८ हजार ९७७, नागपूर जिल्ह्यातून ५७ हजार ८७२, चंद्रपूर जिल्ह्यातून ५६ हजार ९३० अर्ज दाखल झाले.
• तर सर्वांत कमी अर्ज दाखल झालेल्या जिल्ह्यांमध्ये वाशिम जिल्ह्यातून २ हजार ६३६, मुंबई शहरातून ३ हजार ७९३, अकोला जिल्ह्यातून ६ हजार ४०४ मुंबई उपनगरातून ७ हजार ६८९, लातूर जिल्ह्यातून ८ हजार ३१, गडचिरोली जिल्ह्यातून ९ हजार २०, गोंदिया जिल्ह्यातून ९ हजार ३३० अर्ज दाखल झाले.

• केंद्र सरकारकडून स्वातंत्र्यदिनी विविध केंद्रीय आणि राज्य दलातील एकूण ९५४ पोलीस कर्मचाऱ्यांना सेवा पदके जाहीर केली आहेत. देशभरातील २३० जवानांना पोलीस पदक प्रदान करण्यात येणार आहे. यामध्ये शौर्यासाठी राष्ट्रपती पोलीस पदकाचाही समावेश करण्यात आला आहे.
• स्वातंत्र्यदिनी आणि प्रजासत्ताक दिनानिमित्त वर्षांतून दोनदा ही पदके जाहीर केली जातात. महाराष्ट्रातील ७६ पोलिसांना पदके जाहीर झाली असून त्यातील ३ पोलीस अधिकाऱ्यांना ‘राष्ट्रपती पोलीस पदक’ तर, ३३ पोलिसांना ‘पोलीस शौर्य पदक’ आणि ४० पोलिसांना ‘पोलीस पदक’ जाहीर करण्यात आले आहे.
• राज्याचे अतिरिक्त पोलीस महासंचालक प्रवीण साळुंके, पिंपरी-चिंचवडचे पोलीस आयुक्त विनय कुमार चौबे आणि विशेष पोलीस महानिरीक्षक, अमरावती, जयंत नाईकनवरे यांना विशिष्ट सेवेसाठी राष्ट्रपती पोलीस पदक जाहीर झाले आहे. तसेच गुणवत्तापूर्ण सेवेसाठी प्रवीणकुमार पडवळ (पोलीस सहआयुक्त, मुंबई शहर), विजय पाटील (पोलीस उप महानिरीक्षक, एसीबी,मुंबई) आदींना राष्ट्रपती पदक प्रदान करण्यात येणार आहे. सीआरएफ अधिकारी लौक्राकपम इबोमचा सिंग यांना राष्ट्रपती पोलीस पदक प्रदान करण्यात येणार आहे. त्यांच्या सेवेतील हे दुसरे शौर्य पदक आहे. याव्यतिरिक्त विशेष सेवेसाठी ८२ राष्ट्रपती पोलीस पदके आणि गुणवंत सेवेसाठी ६४२ पोलीस पदके देण्यात येणार आहेत.
• राष्ट्रपती पोलीस शौर्य पदक आणि शौर्य पोलीस पदक ही दोन्ही पदके जीवन आणि मालमत्ता वाचविणे, गुन्हेगारी रोखणे किंवा गुन्हेगारांना पकडणे यातील विशिष्ट शौर्याच्या आधारावर प्रदान केली जातात. पोलीस सेवेतील विशिष्ट विक्रमासाठी राष्ट्रपती पोलीस पदक दिले जाते. तसेच गुणवान सेवेसाठी पोलीस पदक साधनसंपत्ती आणि कर्तव्याची निष्ठेद्वारे वैशिष्टय़कृत मौल्यवान सेवेसाठी प्रदान केले जाते.

• इंग्लंडचे पंतप्रधान ऋषी सुनक यांनी रामायण पठणाच्या एका कार्यक्रमाला हजेरी लावली. यावेळी त्यांनी मोठं विधान केलं. “मी या ठिकाणी इंग्लंडचा पंतप्रधान म्हणून नाही, तर एक हिंदू म्हणून उपस्थित आहे,” असं मत ऋषी सुनक यांनी व्यक्त केलं. ते मंगळवारी (१५ ऑगस्ट) भारतीय स्वातंत्र्य दिनाच्या निमित्ताने इंग्लंडमधील केंब्रिज विद्यापीठात आध्यात्मिक गुरू मोरारी बापू यांनी आयोजित केलेल्या कार्यक्रमात बोलत होते.
• ऋषी सुनक यांनी या कार्यक्रमात आपल्या मनोगताची सुरुवात ‘जय सिया राम’ असं म्हणत केली. ते म्हणाले, “भारतीय स्वातंत्र्य दिनाच्या निमित्ताने केंब्रिज विद्यापीठात आयोजित मोरारी बापू यांच्या राम कथेला उपस्थित राहणं माझ्यासाठी सन्मानाची गोष्ट आहे. आज मी या ठिकाणी इंग्लंडचा पंतप्रधान म्हणून उपस्थित नाही, तर एक हिंदू म्हणून उपस्थित आहे.”

“मला आपली श्रद्धा धाडस, हिंमत आणि ताकद देते”

• “माझ्यासाठी श्रद्धा ही खूप व्यक्तिगत गोष्ट आहे. ही श्रद्धा मला जीवनाच्या प्रत्येक प्रसंगात मार्गदर्शन करत असते. पंतप्रधान होणं ही फार मोठी सन्मानाची गोष्ट आहे, पण हे सोपं काम नाही. या पदावर असताना खूप कठीण निर्णय घ्यावे लागतात. कठोर निर्णय घ्यावे लागतात. अशावेळी देशासाठी सर्वोत्तम काम करण्यासाठी मला आपली श्रद्धा धाडस, हिंमत आणि ताकद देते,” असं मत ऋषी सुनक यांनी व्यक्त केलं.

“माझ्यासाठी भगवान राम कायमच प्रेरणा देणारे”

• “माझ्यासाठी भगवान राम कायमच प्रेरणा देणारे आहेत. त्यांच्याकडून मला धाडसाने जीवनातील आव्हानांचा सामना करण्यासाठी, माणूसकीने सरकार चालवण्यासाठी आणि निस्वार्थपणे काम करण्यासाठी प्रेरणा मिळते,” असंही ऋषी सुनक यांनी नमूद केलं.

• रशियाचे अध्यक्ष व्लादिमीर पुतिन, फ्रान्सचे अध्यक्ष इमॅन्युएल मॅक्रॉन, ऑस्ट्रेलियाचे पंतप्रधान अँथनी अल्बानीज आणि अमेरिकेचे परराष्ट्र सचिव अँटनी ब्लिंकन यांनी मंगळवारी भारताला ७७ व्या स्वातंत्र्य दिनाच्या शुभेच्छा दिल्या. भारताबरोबरची त्यांची ‘खास’, ‘विशेषाधिकारप्राप्त’, आणि ‘धोरणात्मक’ भागीदारी अधोरेखित केली.
• राष्ट्रपती द्रौपदी मुर्मू आणि पंतप्रधान नरेंद्र मोदी यांना देण्यात आलेल्या शुभेच्छा संदेशात रशियन अध्यक्ष पुतिन म्हणाले की, ‘‘प्रादेशिक आणि जागतिक अजेंडय़ावरील महत्त्वाच्या समस्यांचे निराकरण करण्यासाठी दोन्ही राष्ट्रे रचनात्मक भागीदारीद्वारे सर्व क्षेत्रांमध्ये फलदायी द्विपक्षीय सहकार्याला चालना देत राहतील, असा विश्वास आहे. आम्ही भारताबरोबरच्या विशेष धोरणात्मक भागीदारीच्या संबंधांना खूप महत्त्व देतो.’’

चालू घडामोडी आणि दिनविशेष - 17 ऑगस्ट 2022

16 ऑगस्ट चे दिनविशेष पाहण्यासाठी (येथे क्लिक करा)