चालू घडामोडी आणि दिनविशेष - 11 जुलै 2023

• पंतप्रधान नरेंद्र मोदी यांना लोकमान्य टिळक स्मारक ट्रस्टच्या वतीने १ ऑगस्ट २०२३ रोजी लोकमान्य टिळक राष्ट्रीय पुरस्कार देऊन गौरविले जाणार आहे. टिळक स्मारक ट्रस्टचे अध्यक्ष डॉ. दीपक टिळक आणि विश्‍वस्त डॉ. रोहित टिळक यांनी आज पत्रकार परिषदेत पुरस्काराची घोषणा केली. स्मृतिचिन्ह, मानपत्र आणि एक लाख रुपये असे पुरस्काराचे स्वरूप आहे.
• १ ऑगस्ट रोजी लोकमान्य टिळक यांची १०३ वी पुण्यतिथी आहे. यानिमित्त पुण्यात टिळक महाराष्ट्र विद्यापीठाच्या प्रांगणात होणार्‍या सोहळ्यात पंतप्रधान नरेंद्र मोदी यांना पुरस्काराने गौरविले जाईल. यंदा या पुरस्काराचे यंदाचे ४१ वे वर्ष आहे.
• तसेच या सोहळ्यासाठी प्रमुख पाहुणे म्हणून राष्ट्रवादी काँग्रेस पक्षाचे सर्वेसर्वा शरद पवार, राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार, ट्रस्टचे विश्‍वस्त सुशीलकुमार शिंदे यावेळी उपस्थित राहणार आहेत.

• इलेक्ट्रॉनिक्स निर्मितीतील अग्रणी तैवानस्थित ‘फॉक्सकॉन’ कंपनीने अखेर उद्योगपती अनिल अगरवाल यांच्या ‘वेदान्त लिमिटेड’बरोबर सेमिकंडक्टर चिपनिर्मितीच्या प्रकल्पातून बाहेर पडत असल्याचे सोमवारी अधिकृतरीत्या जाहीर केले. यासाठी फॉक्सकॉनने कोणतेही विशिष्ट कारण दिले नसले तरी भागीदारी संपुष्टात आल्याने आधी महाराष्ट्रात नियोजित असलेला आणि ऐन वेळी गुजरातकडे वळविलेला हा प्रकल्प धोक्यात आला आहे.
• जगातील सर्वात मोठी काँट्रॅक्ट इलेक्ट्रॉनिक उत्पादक असलेली फॉक्सकॉन आणि वेदान्त यांनी गेल्या वर्षी गुजरातमधील ढोलेरा येथे सेमिकंडक्टर चिपनिर्मिती प्रकल्प उभारण्यासाठी १९.५ अब्ज डॉलर (सुमारे दीड लाख कोटी रुपये) गुंतवणुकीसाठी करार केला होता. उभय कंपन्यांनी धोरणात्मक गुंतवणुकीसाठी महाराष्ट्राची निवड केली होती; पण आकस्मिकपणे प्रकल्प गुजरातमध्ये साकारत असल्याचे जाहीर करण्यात आले. या प्रकल्पाद्वारे गुजरातला देशातील इलेक्ट्रॉनिक्स उद्योगातील मुख्य केंद्र बनविण्याची पंतप्रधान नरेंद्र मोदी यांची महत्त्वाकांक्षी योजना होती. मात्र सोमवारी फॉक्सकॉनने एका निवेदनाद्वारे आपली वेदान्तबरोबर भागीदारी संपुष्टात आल्याचे जाहीर केले. ‘आता वेदान्तकडे पूर्ण मालकी असलेल्या कंपनीच्या या प्रकल्पातून अंग काढून घेण्यासह त्याच्याशी जुळलेले फॉक्सकॉनचे नावही काढून टाकण्यासाठी आम्ही पाऊल टाकत आहोत.
• फॉक्सकॉनचा या प्रकल्पाशी कोणताही संबंध राहिलेला नाही, परिणामी त्याचे मूळ नाव तसेच ठेवले गेल्यास भविष्यातील भागधारकांसाठी ते संभ्रम निर्माण करणारे ठरेल,’ असे या निवेदनात म्हटले आहे. त्याच वेळी भारताच्या सेमिकंडक्टर क्षमतेच्या विकासाच्या दिशेने प्रयत्नांच्या सफलतेबाबत फॉक्सकॉनने विश्वास व्यक्त केला आहे. या घडामोडींवर वेदान्तकडून लगेच कोणतीही प्रतिक्रिया व्यक्त करण्यात आली नसल्याचे ‘रॉयटर्स’ वृत्तसंस्थेने स्पष्ट केले.
• मूळ करारानुसार, वेदान्तच्या चिपनिर्मिती क्षेत्रातील महत्त्वाकांक्षेत तांत्रिक भागीदार म्हणून फॉक्सकॉनचा या संयुक्त उपक्रमात सहभाग केला होता आणि प्रकल्पासाठी वित्तपुरवठा करणाऱ्या वेदान्तकडे ६० टक्के हिस्सेदारी तर उर्वरित ४० टक्के मालकी फॉक्सकॉनकडे राहणार होती. दरम्यान, फॉक्सकॉन आणि वेदान्त यांच्यात काही मुद्दय़ांवर आधीपासूनच मतभेद असल्याचे उघडकीस आले आहे. केंद्र सरकारच्या सेमिकंडक्टर मोहिमेंतर्गत प्रोत्साहनपर सवलतींसाठी पुन्हा अर्ज करण्यावरून दोन्ही कंपन्यांमध्ये मतभेद होते. संयुक्त कंपनीने यासाठी मागील वर्षी केलेला अर्ज केंद्राने अद्याप मंजूर केलेला नाही.

• Amazon एक ई-कॉमर्स साईट आहे. जिथून ग्राहक आपल्याला हव्या असलेल्या वस्तू खरेदी करू शकतात. भारतीय बाजारासाठी Amazon प्राइम डे सेलची घोषणा करण्यात आली आहे. हा सेल केवळ ४८ तास म्हणजे दोन दिवसांसाठी असणार आहे. या सेलमध्ये असणाऱ्या ऑफर्स या केवळ प्राईम मेंबर्ससाठीच उपलब्ध असणार आहेत. विक्रीदरम्यान अनेक किंमतीमधील स्मार्टफोन उपलब्ध असणार असून त्यावर डिस्काउंट मिळणार असल्याचे जाहीर केले आहे. हा डिस्काउंट केवळ भारतात मिळणार आहे.
• इंडिया टुडे टेकशी बोलताना, Amazon इंडियाचे वायरलेस आणि होम एंटरटेनमेंट सेगमेंटचे डायरेक्टर रणजित बाबू म्हणाले, प्राईम डे सेलदरम्यान iPhone 14 वर मोठा डिस्काउंट मिळणार आहे.
• प्राईम डे सेलमध्ये आयफोन १४ वर एक चांगली ऑफर असेल असा खुलासा त्यांनी केला. खरं तर, आयफोन १४ वरील ऑफर आयफोन १३ पेक्षा खूपच चांगली असेल. कंपनीने ऑफरची किंमत अद्याप उघड केलेली नाही. मात्र नमूद केल्याप्रमाणे आयफोन १४ वरील सेलमधील डिस्काउंट या वर्षातील सर्वात चांगली डिस्काउंट ऑफर असेल. यामध्ये काही चांगल्या एक्सचेंज ऑफर्स असतील त्यामुळे हे डील अधिक आकर्षक होईल.
• आयफोन १३ तुलनेने जुना असल्याने आयफोन १४ वरच डिस्काउंट ऑफर देणे चांगले ठरेल. दरम्यान काही अफवांनुसार आयफोन १५ सिरीज या वर्षाच्या शेवटी लॉन्च होऊ शकते. यामध्ये कंपनी iPhone 15, iPhone 15 Pro, iPhone 15 Pro Max आणि शेवटी, iPhone 15 Plus यासह चार नवीन iPhone मॉडेल्सचे लॉन्चिंग करणे अपेक्षित आहे. मात्र याची सिरीजमधील मॉडेल्सची किंमत आयफोन १४ च्या तुलनेत जास्त असण्याची शक्यता आहे. आयफोन 14 हे सध्या भारतात खरेदी करण्यासाठी सर्वोत्तम iPhone मॉडेल आहे. अधिकृतपणे, भारतात मॉडेलची किंमत ७९,९०० रुपयांपासून सुरू होते.

• महाराष्ट्राच्या पार्थ साळुंखेने ऐतिहासिक कामगिरी करताना युवा जागतिक अजिंक्यपद तिरंदाजी स्पर्धेतील पुरुष रिकर्व्ह विभागात सुवर्णपदकाची कमाई केली. युवा जागतिक स्पर्धेतील रीकव्र्ह गटात सोनेरी यश संपादन करणारा पार्थ भारताचा पहिला पुरुष तिरंदाज ठरला आहे. तसेच भारताने युवा जागतिक तिरंदाजीत आजवरची सर्वोत्तम कामगिरी करताना एकूण ११ पदके पटकावली.
• साताऱ्याच्या पार्थने २१ वर्षांखालील पुरुषांच्या रीकव्र्ह विभागातील अंतिम लढतीत सातव्या मानांकित कोरियाच्या सॉन्ग इन्जुनचा ७-३ असा पराभव केला. १९ वर्षीय पार्थ सुरुवातीला पिछाडीवर होता. पहिला सेट २६-२६ असा बरोबरीत राहिल्यानंतर दुसऱ्या सेटमध्ये सॉन्गने २५-२८ अशी बाजी मारताना एकूण लढतीत आघाडी मिळवली. मात्र, पार्थने दडपणाखाली संयम बाळगताना पुढील तीन सेट अनुक्रमे २८-२६, २९-२६, २८-२६ असे जिंकत सुवर्णपदक आपल्या नावे केले.
• त्याचप्रमाणे २१ वर्षांखालील महिलांच्या रिकर्व्ह विभागात भारताच्या भजन कौरने कांस्यपदक मिळवले. तिने चायनीज तैपेइच्या सु हसीन-यु हिला ७-१ (२८-२५, २७-२७, २९-२५, ३०-२६) असे सहज पराभूत केले.भारताने या स्पर्धेत सहा सुवर्ण, एक रौप्य आणि चार कांस्य अशी एकूण ११ पदके पटकावली. युवा जागतिक अजिंक्यपद तिरंदाजी स्पर्धेतील ही भारताची सर्वाधिक पदके ठरली. मात्र, भारताला पदकतालिकेत दुसऱ्या स्थानावर समाधान मानावे लागले. कोरियाने अग्रस्थान मिळवले.
• पार्थची या स्पर्धेतील कामगिरी उल्लेखनीय ठरली. त्याने कोरियन तिरंदाजाचे वर्चस्व मोडून काढताना सुवर्णयश मिळवले. त्याने यापूर्वी जूनमध्ये सिंगापूर येथे झालेल्या आशिया चषकाच्या तिसऱ्या टप्प्यात रौप्यपदक मिळवले होते. तसेच गेल्या वर्षी या स्पर्धेच्या सुलेमानिया आणि शारजा येथील टप्प्यांत त्याने कांस्यपदके जिंकली होती. २०२१च्या युवा जागतिक स्पर्धेतील पुरुष सांघिक गटात सुवर्णपदक मिळवणाऱ्या भारतीय संघाचा तो सदस्य होता. यंदाच्या स्पर्धेत मिश्र सांघिक गटात पार्थने रिद्धीसह कांस्यपदक मिळवले.
• युवा जागतिक स्पर्धेत सुवर्णपदक मिळवणारा पार्थ साळुंखे हा भारताचा एकूण सहावा तिरंदाज आहे. यापूर्वी दीपिका कुमारी, कोमालिका बारी, पाल्टन हन्सदा, अदिती स्वामी आणि प्रियांश यांनी युवा जगज्जेतेपदाचा मान मिळवला होता.

चालू घडामोडी आणि दिनविशेष - 11 जुलै 2022

11 जुलै चे दिनविशेष पाहण्यासाठी (येथे क्लिक करा)