चालू घडामोडी आणि दिनविशेष - ०७ जानेवारी २०२३

• गुजरातमधील राजकोट येथे बांधण्यात येत असलेल्या एका छोट्या धरणाला (बंधारा) पंतप्रधान नरेंद्र मोदी यांच्या दिवंगत आई हिराबेन मोदी यांचं नाव देण्यात आलं आहे. हा बंधारा ‘गिर गंगा परिवार ट्रस्ट’च्या उभारण्यात येत आहे. राजकोट-कलावाड मार्गावरील वागुदाद गावाजवळील न्यारी नदीवर हा बंधारा बांधण्यात येत असून यासाठी १५ लाख रुपये खर्च केले जाणार आहेत.

• बुधवारी स्थानिक आमदार आमदार दर्शिता शाह आणि राजकोटचे महापौर प्रदीप देव यांच्या उपस्थितीत या बंधाऱ्याचं भूमीपूजन करण्यात आलं आहे. पंतप्रधान नरेंद्र मोदींच्या आईला आदरांजली म्हणून या बंधाऱ्याचं नामकरण ‘हिराबा स्मृती सरोवर’ असं करण्यात आलं आहे. यामुळे इतरही लोकांनाही आपल्या जवळच्या व्यक्तीच्या स्मरणार्थ दान करण्याठी प्रेरणा मिळेल, हा यामगचा हेतू होता, अशी माहिती ‘गिर गंगा परिवार ट्रस्ट’चे अध्यक्ष दिलीप सखिया यांनी दिली.

• पंतप्रधान मोदी यांच्या आई हिराबेन मोदी यांचं ३० डिसेंबर रोजी वयाच्या ९९ व्या वर्षी निधम झालं. अहमदाबाद येथील एका रुग्णालयात उपचार सुरू असताना त्यांची प्राणज्योत मालवली. त्यामुळे हिराबेन मोदी यांच्या स्मरणार्थ राजकोट येथील बंधाऱ्याला ‘हिराबा स्मृती सरोवर’ नाव देण्याचा निर्णय ‘गिर गंगा परिवार ट्रस्ट’ने घेतला.

• विशेष म्हणजे या ट्रस्टने देणगीदारांनी केलेल्या आर्थिक मदतीतून गेल्या चार महिन्यांत सुमारे ७५ छोटे बंधारे बांधले आहेत. या नवीन बंधाऱ्याचे काम दोन आठवड्यात पूर्ण होणार असून सुमारे २५ दशलक्ष लिटर पाणी साठवण्याची त्याची क्षमता असेल. यात एकदा पाणी साठले की ते नऊ महिने ते आटणार नाही. यामुळे भूजल साठा वाढण्यास मदत होईल व परिसरातील गावातील शेतकरी व पशुपालकांना त्याचा लाभ होईल.

• मागील अनेक दिवसांपासून ट्विटर ही मायक्रोब्लॉगिंग साईट वेगवेगळ्या कारणामुळे चर्चेत आहे. मात्र आता ट्विटर वापरकर्त्यांची चिंता वाढवणारी माहिती समोर येत आहे. २०० दसलक्षपेक्षा अधिक ट्विटर वापरकर्त्यांचा इमेल अॅड्रेस लीक झाला असून तो एका ऑनलाईन हॅकिंग फोरमवर पब्लिश करण्यात आला आहे, असा दावा एका सिक्योरिटी रिसर्चरने केला आहे. मात्र या दाव्यावर ट्विटरने अद्याप कोणतेही स्पष्टीकरण किंवा प्रतिक्रिया दिलेली नाही.

नेमका दावा काय आहे?

• जवळपास २०० दसलक्षपेक्षा अधिक ट्विटर वापरकर्त्यांचे मेल अॅड्रेस लीक झाल्याचा दावा करण्यात येत आहे. याबाबत इस्रायली सायबर सिक्योरिटी मॉनिटरिंग फर्म हडसन रॉकचे सहसंस्थापक अलॉन गल यांनी लिंक्डइनवर सविस्तर माहिती दिली आहे. “या घटनेमुळे हॅकिंग, टार्गेटेड फिशिंग आणि डॉक्सिंग याला बळ मिळणार आहे. ही एक महत्त्वपूर्ण घटना आहे,” असे अलॉन गल म्हणाले आहेत.

• या मेल अॅड्रेस लिकबाबत अलॉन गल यांनी २४ डिसेंबर रोजी सोशल मीडियावर पोस्ट केलीहोती. मात्र ट्विटरने अद्याप या दाव्यावर कोणतीही प्रतिक्रिया दिलेली नाही. तसेच ट्विटरने या दाव्यानंतर कारवाईला सुरुवात केली आहे की नाही, याबाबतही अद्याप अस्पष्टता आहे.

• दरम्यान, या मेल आयडी अॅड्रेसच्या कथित लिकसंदर्भात अधिक माहिती अद्याप उपलब्ध झालेली नाही. तसेच या घटनेमागील हॅकर्सचीही माहिती मिळालेली नाही. अब्जाधीश एलॉन मस्क यांनी ट्विटरवर ताबा मिळवण्याच्या अगोदर म्हणजेच २०२१ साली सुरुवातीच्या काळात ही हॅकिंग झाली असावी, असा प्राथमिक अंदाज लावला जात आहे.

• रशियाचे रशियाचे अध्यक्ष व्लादिमीर पुतिन यांनी त्यांच्या सैन्याला शुक्रवारी ३६ तासांचा युद्धविरामाचा एकतर्फी दिलेला आदेश संदिग्ध आहे, असे युक्रेनचे म्हणणे आहे.

• युक्रेनच्या अधिकाऱ्यांनी रशियाचे हे पाऊल एक खेळी असल्याचे सांगून फेटाळून लावला आहे. मात्र, त्यांनी युक्रेनचे सैन्य युद्धविरामाचे पालन करतील किंवा नाही, याबाबत कोणतीही माहिती दिली नाही. दुसरीकडे युक्रेनने युद्ध सुरू ठेवल्यास प्रत्त्युत्तर देण्यात येईल किंवा नाही, याबाबत रशियानेही स्पष्टीकरण दिले नाही.

• सुमारे ११ महिन्यांच्या युद्धकाळात रशियाकडून पहिल्यांदा घोषित युद्धविराम मास्कोच्या प्रमाणवेळेनुसार शुक्रवारी दुपारी सुरू झाला. तो शनिवारी मध्यरात्रीपर्यंत सुरू राहणार आहे. युद्धविरामाच्या उल्लंघनाचे आतापर्यंत कोणतेही वृत्त नाही.

• रशियामध्ये पारंपरिक नाताळनिमित्त (ज्युलियन कॅलेंडरनुसार) सात जानेवारीला सार्वजिनक सुटी असते. या निमित्त युद्धविराम जाहीर करावा, अशी मागणी रशियाच्या पुराणमतवादी चर्चचे प्रमुख पॅट्रिआर्क किरिल यांनी केले होते.

• युक्रेन आणि पाश्चमात्य अधिकाऱ्यांनी सद्भावनेच्या संकेतामागे संशयास्पद हेतू असल्याची शंका व्यक्त केली आहे. युक्रेनचे राष्ट्रपती वालोदिमिर झेलेंक्सी यांनी रशियाच्या हेतूवर संशय व्यक्त करताना रशियाने नव्या दमाने युद्ध सुरू करण्यासाठी हा ‘युद्धविराम’ जाहीर केला आहे, असा आरोप केला.

• श्रीलंकेविरुद्ध शनिवारी होणाऱ्या निर्णायक तिसऱ्या आणि अखेरच्या ट्वेन्टी-२० सामन्यात विजय मिळवत मालिका जिंकण्याचे भारताचे लक्ष्य असेल. या सामन्यात चमकदार  कामगिरी करायची झाल्यास भारतीय जलदगती गोलंदाज आणि आघाडीच्या फळीतील फलंदाजांना चांगली कामगिरी करावी लागेल. पहिल्या सामन्यात अखेरच्या चेंडूवर विजय मिळवल्यानंतर भारताला दुसऱ्या सामन्यात १६ धावांनी पराभूूत व्हावे लागले.

• युवा वेगवान गोलंदाजांच्या निराशाजनक कामगिरीमुळे भारताला पराभूत व्हावे लागले. मात्र, उमरान मलिक आणि शिवम मावी यांना अशा परिस्थितीतूनही खूप काही शिकण्यास मिळाले असेल. दुखापतीतून पुनरागमन करणारा वेगवान गोलंदाज अर्शदीप सिंगने गेल्या सामन्यात आपल्या दोन षटकांत पाच नोबॉल टाकले. पहिल्याच षटकात त्याने तीन नोबॉल टाकत ट्वेन्टी-२० मध्ये नोबॉलची हॅट्ट्रिक करणारा तो भारतीय गोलंदाज बनला. पहिल्या सामन्यात पदार्पण करणाऱ्या मावी आणि अर्शदीप यांच्या नोबॉलचा फटका भारताला बसला. त्यामुळे कर्णधार हार्दिक पंडय़ाला फिरकी गोलंदाजांवर अवलंबून राहावे लागले. त्यामुळे निर्णायक सामन्यात विजय मिळवायचा झाल्यास गोलंदाजांना कामगिरी उंचवावी लागेल.

फलंदाजांच्या कामगिरीकडे नजर

• आघाडीच्या फलंदाजीच्या फळीला पुन्हा एकदा अपयश आले. शुभमन गिलला सलग दुसऱ्यांदा फलंदाजीत यश मिळाले नाही. राहुल त्रिपाठीलाही पहिल्या सामन्यात चमक दाखवता आली नाही. अर्धा संघ ६० धावांच्या आत परतल्यानंतर अक्षर पटेल आणि सूर्यकुमार यादव यांनी चांगली फलंदाजी केली. त्यामुळे तिसऱ्या सामन्यातही त्यांच्याकडून चमकदार कामगिरीची अपेक्षा असेल. अक्षरच्या रूपाने भारताला अष्टपैलू खेळाडू मिळाला आहे. निर्णायक सामन्यात संघात बदल करण्याची शक्यता कमीच आहे.

• आशिया चषकविजेत्या श्रीलंकेने गेल्या सामन्यात विजय मिळवत जोरदार पुनरागमन केले. तरीही त्यांच्या मध्यक्रमाकडून चांगल्या खेळीची अपेक्षा संघाला असेल. राजकोटची खेळपट्टी ही फलंदाजीसाठी अनुकूल असण्याची शक्यता आहे. त्यामुळे नाणेफेक ही या सामन्यात निर्णायक ठरण्याची शक्यता आहे.

०७ जानेवारी चे दिनविशेष पाहण्यासाठी (येथे क्लिक करा)